Hiob 41 - BAIBLO ALOO NGMAMI KLƆUKLƆU Ɔ

¹ Anɛ o ma nyɛ ma sá nyaka kɛ gbowe lo? Anɛ o ma nyɛ maa ngɔ kpa kɛ fi e lilɛ kɛ muɔ si lo?

² Anɛ o ma nyɛ maa ngɔ tangme kɛ wo e gugwɔ mi lo? Anɛ o ma nyɛ maa ngɔ gbowe kɛ wo e tsitsa mi lo?

³ Anɛ e ma kpa mo pɛɛ ke o ngmɛɛ e he lo? Anɛ e maa fa kue ha mo ke o na lɛ mɔbɔ lo?

⁴ Anɛ e kɛ mo maa so kaa e ma sɔmɔ mo daa lo?

⁵ Anɛ o kɛ lɛ ma fiɛ kaa a kɛ lohwe pɛlitsɛ fiɛɔ, aloo o maa fi lɛ ha o mawayi ɔmɛ nɛ a kɛ lɛ nɛ fiɛ lo?

⁶ Anɛ jua yeli ma nyɛ maa wo e he jua lo? Anɛ a maa poo lɛ kpɔ nya kpɔ nya nɛ a jua ha jua yeli lo?

⁷ Anɛ o ma nyɛ ma tsɛ̃ kɛ̃ɛ̃hi babauu kɛ wo e he womi mi lo? Anɛ o ma nyɛ maa ngɔ akplɔ kɛ gbɔ e yi mi lo?

⁸ Moo ta e he si kake nɛ o hyɛ, nɛ e be mo jloe kaa o ta e he si enyɔne; o hɛ be nɔ jee gblegbleegble.

⁹ Nɔ tsuaa nɔ nɛ maa na nyaka kikɛ nɛ ɔ, sawale maa nu lɛ, nɛ e maa nɔ si bum ngɛ zugba.

¹⁰ Katsɛ ko katsɛ ko be nɛ ma nyɛ maa wo e hɛ mi la. Ke ja a, lɛɛ mɛnɔ lɛ ma nyɛ maa da imi ye hɛ mi?

¹¹ Mɛnɔ lɛ e kɛ nyaka ya kpe kunɔ hyɛ nɛ e he je mi? Dɛbi! Je ɔ mi tsuo ɔ, nɔ ko nɔ ko be!

¹² Nyaka a, tsa pi fiɛmi lohwe ji lɛ; a je blɔ bɔ lɛ, nɛ e ngɛ he wami saminya. E nɔmlɔ tso ɔ he níhi, e nanehi, kɛ e kpɔhi yeɔ ní nɛ ɔmɛ a he odase.

¹³ Mɛnɔ ma nyɛ ma kpɔ e he toto ɔ? E he womi ɔ nɛ ngɛ kaa gbaja nɛ e kpla a, mɛnɔ ma nyɛ maa hɛ lɛ nɔ́ nɛ maa gbu lɛ kɛ je kpo?

¹⁴ E nya kɛ e mi lunguhi gbeyegbeye ɔ, mɛnɔ ma nyɛ ma bli?

¹⁵ E he toto saminyawiiwi ɔmɛ ngɛ kaa tsɛ̃ihi nɛ a fi ngɔ bla, nɛ a to mɛ za nɔ za nɔ. A he wa pe tɛ.

¹⁶ A tsa a sibi a nya pɛpɛɛpɛ, bɔ nɛ kɔɔhiɔ po be nyɛe maa gu a kpɛti.

¹⁷ A tsa, nɛ a mɛtɛ a sibi a he saminya, bɔ nɛ nɔ́ ko nɔ́ ko be nyɛe ma gba mi.

¹⁸ Ke e tsile kɛkɛ la kpɛ; e hɛngmɛhi ngɛ hleii kaa mɔtu pu la.

¹⁹ La hii tsoe ngɛ e nya mi, nɛ la lilɛhi tuɔ kɛ jeɔ mi pueɔ si.

²⁰ La su ku jeɔ e gugwɔ puɔhi a mi kaa lamuɔ nɛ jeɔ buɛ, loo kutu nɛ ngɛ fiae mi.

²¹ Ke e wo mumi kikɛ nɛ ɔ, e haa nɛ hã tsɛ̃ɔ, nɛ la lilɛhi tuɔ kɛ jeɔ e nya mi.

²² E kuɛ ngɛ kpakpataa; ke o kɛ lɛ kpe ɔ, ja sawale nu mo.

²³ E he womi he wa kpɛkpɛtɛɛ; e be bɔdɔbɔdɔ, nɛ e be tsuãã hulɔ.

²⁴ E tsui he wa kaa tɛ! Ee, e tsui he wa kaa wɛ.

²⁵ Ke e wó e he nɔ kikɛ nɛ ɔ, katsɛmɛ tete po yeɔ gbeye; sawale nuɔ mɛ tsuo pɛpɛɛpɛ.

²⁶ Klaate ko klaate ko be nɛ maa plaa lɛ. Akplɔ, loo kɛ̃ɛ̃ ko be nɛ maa ye lɛ awi.

²⁷ Dade ngɛ kaa nga ha lɛ; akɔblee hu ngɛ kaa tso nɛ sa kɛkɛ.

²⁸ Kɛ̃ɛ̃ mi bi ko be nyɛe maa wo lɛ fo; amlami tɛ ngɛ kaa nga ha lɛ.

²⁹ Tsokpoti ngɛ kaa nga ha lɛ, nɛ ke akplɔ ngɛ pɛe kɛ ma a, e muɔɔ.

³⁰ Totohi nɛ ngɛ e mi si ɔ ngɛ kaa buɛ kokoehi nɛ a nya ba. E ngmlãã si ngɛ mɔsɔ mi kaa nɔ́ nɛ blɛfo lɛ e ngɛ gblɛe.

³¹ E haa nɛ wo fiaa kaa nyu ngɛ buɛ mi, nɛ e fiaa hwɔli kaa nu ngɛ tɔ mi.

³² Ke e be kikɛ nɛ ɔ, e jeɔ blɔ ngɛ e se futaa. Bɔ nɛ blɔ ɔ nɔ hii kpɛe ha a, o ma de ke wo ɔ puɛ mua.

³³ Nɔ́ ko nɔ́ ko be je nɛ ɔ mi nɛ ngɛ kaa lɛ; e li nɔ́ nɛ a tsɛɛ ke fɔ̃.

³⁴ E bui lohwe ko lohwe ko; lohwe nɛ kle kaa mɛni po, e bui. Lohwehi nɛ a he ngɛ gbeye tsuo a matsɛ ji lɛ.