Hiob 40 - BAIBLO ALOO NGMAMI KLƆUKLƆU Ɔ

^1-2 Hiob, o ke o kɛ Mawu Ope ɔ maa hua munyu he. Anɛ o ma ha yi, aloo o maa ya nɔ? Ha mi heto!

Hiob

^3-4 I kpa mo pɛɛ, pi nɔ ko kulaa ji mi. Mɛni heto ma ha mo? I be munyu tue hu.

⁵ I tu munyu pe bɔ nɛ sa nɛ ma tu; i pa be nɔ́ ko dee hu.

⁶ Kɛkɛ nɛ Yawɛ kɛ Hiob tu munyu ekohu kɛ je kɔɔhiɔ nɛ nya wa mi.

Yawɛ

⁷ Jehanɛ, da si kaa nyumu! Ma bi mo sane, nɛ o ha mi heto.

⁸ Anɛ o ngɛ hlae nɛ o bu mi fɔ kaa i yi dami sane, konɛ moo lɛɛ o wo o he nguɔ kaa o nɔ́ da lo?

⁹ Anɛ o ngɛ he wami kaa imi Mawu ɔ lo? Anɛ o ma nyɛ maa wo gbi kaa imi lo?

¹⁰ Ke ja a, dla o he, nɛ o he nɛ pee fɛu. Wo ablade tade saminyayoo, konɛ o hɛ mi nɛ ba nyami.

¹¹ Hyɛ he woli! O mi mi nɛ fu mɛ nɛ o ba mɛ si.

¹² Ee, hyɛ mɛ nɛ o ba mɛ si. Moo naa yiwutsotsɛmɛ a nɔ ngɛ a hi he ɔmɛ.

¹³ Moo pu mɛ tsuo ngɛ tabo zu mi, nɛ o fi a hɛ mi ngɛ gbeje.

¹⁴ Ke o pee ja a, lɛɛ imi hu ma je o yi, nɛ ma de ke o ma nyɛ ma he mo nitsɛ o yi wami.

¹⁵ Hyɛ pa mi suɔ! I bɔ lɛ, kɛ mo tsuo. E kpeɔ nga kaa na.

¹⁶ Se hyɛ bɔ nɛ e nɔmlɔ tso ɔ he wa ha; hyɛ bɔ nɛ e pani ɔmɛ ti ha!

¹⁷ E hlemi ngɛ tlɔmɔɔ kaa seda tso. Panihi nɛ hɛɛ e fiɔ ɔmɛ ɔ a he wa saminya.

¹⁸ E wuhi a he wa kaa akɔblee, nɛ e nanehi ngɛ kaa dade.

¹⁹ Lɛ ji ye nibɔ ní ɔmɛ a kpɛti nɔ́ nɛ ngɛ nyakpɛ pe mɛ tsuo. E bɔlɔ ɔ pɛ ji nɔ nɛ ma nyɛ maa ye e nɔ.

²⁰ E naa niye ní ngɛ yo ɔmɛ a nɔ; lejɛ ɔ lɛ pu mi lohwehi tsuo ya fiɛɔ ngɛ.

²¹ E buɔ si ngɛ mio tsohi a sisi, nɛ e laa e he ngɛ ngɔwuhi a kpɛti ngɛ pa mi.

²² Mio tso ɔmɛ peeɔ hɔ̃ kɛ haa lɛ, nɛ ngɔwu ɔmɛ bɔleɔ lɛ kɛ kpeɔ ngɛ nyu ɔ mi.

²³ Ke pa a he wa tete po, e yi gbeye. Ke Yordan pa a nitsɛ fia kɛ ba pue e hɛ mi pohu, e bui tete.

²⁴ Anɛ nɔ ko ma nyɛ maa nu lɛ kɛ gbowe lo? Anɛ nɔ ko ma nyɛ maa wo e gugwɔ mi ga lo?