Hiob 4 - BAIBLO ALOO NGMAMI KLƆUKLƆU Ɔ

Kekleekle ní sɛɛmi Elifaz

^1-2 Hiob, anɛ ke i bi mo munyu ɔ, o mi mi ma fu lo? I nyɛ we nɛ ma ma ye nya nɛ ma pee dii hu.

³ O tsɔɔ nihi babauu ní. Ni nɛmɛ nɛ a nine mi je wu hu, o wo mɛ he wami.

⁴ Nɔ nɛ miɔ nɛ e maa nɔ si ɔ, o munyu ɔ nuɔ lɛ kɛ daa si ekohu. Nakutsohi nɛ gbɔjɔ ɔ, o woɔ mɛ he wami, nɛ a teɔ si ekohu.

⁵ Amlɔ nɛ ɔ, haomi ba o nɔ nɛ o jija, nɛ o nyɛ we nya nɛ o da.

⁶ Tse o jaa Mawu! Anɛ lɔ ɔ wui mo bua lo? O peeɔ nɔ́ nɛ da blɔ! Anɛ lɔ ɔ ha we mo hɛ nɔ kami lo?

⁷ Susu o yi mi! Anɛ o le nɔ ko nɛ pee we yayami nɛ e hɛ mi kpata lo? Anɛ o le dalɔ ko nɛ a gbe lɛ yaka gu lo?

⁸ Nɔ́ nɛ imi i le ji kaa nihi nɛ huɔ yayami ngmɔ, nɛ a duɔ yayami wu ɔ, yayami yiblii lɛ a kpaa.

⁹ Mawu ngɔɔ abofu kɛ kpataa a hɛ mi kaa bɔ nɛ ahumi puɛɔ ní ɔ.

¹⁰ Yiwutsotsɛmɛ huãã, nɛ a pɛɛ kaa jata, se Mawu jɔɔ a he nɛ e kũɔ a lunguhi.

¹¹ A gboɔ kaa jata nɛ nɛ lohwe nɛ e gbe nɛ e ye, nɛ a bimɛ ɔmɛ tsuo gbɛɛ kɛ fĩaa.

¹² Nɔ ko ju si ba tu mi munyu ko zaa ngɛ ablɛgbi mi be ko.

¹³ Munyu nɛ ɔ he susumi ha nɛ dekla nu mi, nɛ i hwɔ we mahe nyɔ ɔ mi tsuo.

¹⁴ I ye gbeye, nɛ i kpokpo, nɛ ye kpɔhi a nya tsuo do blibliibli.

¹⁵ Kɛkɛ nɛ mumi ko ba po ye hɛ mi fli, nɛ gbeye sɔuu ha nɛ fĩɛ ngmangu pue ye nɔ.

¹⁶ I na kaa nɔ́ ko daa si ngɛ lejɛ ɔ; i hyɛ, se i li nɔ́ nɛ ji. Lejɛ ɔ pee dii; kɛkɛ nɛ i nu nɛ gbi ko pɛ ke,

¹⁷ “Anɛ nɔmlɔ adesa maa da ngɛ Mawu hɛ mi lo? Anɛ nɔmlɔ adesa he ma tsɔ ngɛ e bɔlɔ ɔ hɛ mi lo?

¹⁸ Mawu tsɔli ɔmɛ ngɛ hiɔwe tete po Mawu he we mɛ yi. E bɔfo ɔmɛ nitsɛnitsɛmɛ po, e naa tɔmi ngɛ a he.

¹⁹ Nɛ mo nɛ tabo zu lɛ a kɛ puɛ mo, nɛ o ngɛ kaa bunyuku kɛkɛ! Mo nɛ a ma nyɛ maa naa o nɔ kaa bɔ nɛ a naa wɔyewɔye nɔ ɔ, moo lɛɛ o susu kaa Mawu ma he mo maa ye lo?

²⁰ Mɔtu ɔ, nɔ ko maa hi hɛ ngmengmle. Se loko du ma bu ɔ, e gbo momo nɛ nɔ ko nɔ ko li.

²¹ Ke a he e he wami tsuo ngɛ e dɛ ɔ, kɛkɛ ɔ, e gbo be mi nɛ e li nɔ́ ko.”