Hiob 39 - BAIBLO ALOO NGMAMI KLƆUKLƆU Ɔ

¹ Anɛ o le be nɛ pu mi apletsihi fɔɔ lo? O na odabɔ nɛ ngɛ fɔe hyɛ lo?

² Anɛ o le nyɔhiɔ abɔ nɛ a hɛɛɔ mi lo? O le be nɛ a fɔɔ lo?

³ O le bɔ nɛ a buɔ si, nɛ a fɔɔ, nɛ a haomi ɔmɛ jeɔ a nɔ lo?

⁴ A bimɛ ɔmɛ waa saminya ngɛ nga a nɔ; a jeɔ a nyɛmɛ ɔmɛ a he, nɛ a kpale we kɛ bɛ hu.

⁵ Nga mi teji ɔmɛ ɔ, mɛnɔ lɛ ha nɛ a ye a he? Mɛnɔ lɛ ngmɛɛ a he loko a ngɛ kpae ɔ?

⁶ Imi lɛ i ha mɛ nga kplanaa a, nɛ a kɛ pee a hi he, kɛ ngo zugba a hulɔ, konɛ a hi lejɛ ɔ.

⁷ A sume ma nguahi a mi he nɛ huhui ngɛ; a hla we nɛ nɔ ko nɛ jɔɔ a kã he nɛ a tsu ní ha lɛ.

⁸ Yo ɔmɛ a nɔ ji a ní yemi he; a yeɔ ba mumu tsuaa ba mumu ngɛ lejɛ ɔ.

⁹ Anɛ pu mi okpɔngɔ maa suɔ nɛ e tsu ní ha mo lo? Anɛ e maa suɔ nɛ e hwɔ o lohwehi a ní yemi he lo?

¹⁰ Anɛ o ma nyɛ maa wo pu mi okpɔngɔ kpa nɛ e hu ha mo lo? Anɛ o ma nyɛ ma ha nɛ e gbla dade kpakplaa kɛ hu o ngmɔ mi lo?

¹¹ Anɛ o maa ngɔ o hɛ ngɔ fɔ e he wami ɔ nɔ, konɛ e tsu o ní tsumi kpakpataa a ha mo lo?

¹² Anɛ o heɔ yeɔ kaa e ma kpa ní ha mo, nɛ e kɛ o blɛfo ɔ ma ba wo blɛfo gba mi ha mo lo?

¹³ Mo lɛ o ha pu mi klakumi e pɛli saminyayoo ɔ lo? Duguma tsɛli, kɛ e pɛli ɔmɛ nɛɛ, mo lɛ o ha lɛ?

¹⁴ Duguma siɔ e hluihi ngɛ zugba, konɛ la nɛ jeɔ zu mi ɔ nɛ ha a he nɛ dɔ la.

¹⁵ E hɛ jeɔ nɔ kaa nane ko ma nyɛ maa ywia mɛ, loo pu mi lohwe ko ma ba naa nɔ.

¹⁶ E waa e bimɛ ɔmɛ yi mi kaa nɔ́ nɛ pi e bimɛ ji mɛ. E hia we lɛ tete kaa e gbo yaka dengme.

¹⁷ Imi Mawu lɛ i pee lɛ kuasia, nɛ i ha nɛ nile bɔ lɛ kikɛ nɛ ɔ nɛ.

¹⁸ Se ke e bɔni fo tumi kikɛ nɛ ɔ, e muɔɔ okpɔngɔ kɛ e nɔ hilɔ.

¹⁹ Mo Hiob lɛ o ha okpɔngɔ e he wami ɔ lo? Mo lɛ o ha lɛ bwɔmi gagaa ngɛ e kuɛ he ɔ lo?

²⁰ Mo lɛ o haa nɛ e tuɔ kaa baalɛ ɔ lo? Mo lɛ o haa nɛ e fliɔ e gugwɔ mi wawɛɛ kɛ woɔ nɔ he gbeye ɔ lo?

²¹ E kɛ bua jɔmi siɔ si glɛi glɛi glɛi ngɛ kɔ̃ ɔ mi, nɛ e kɛ e he wami tsuo gbɔɔ fo kɛ yaa ta.

²² E li nɔ́ nɛ a tsɛɛ ke fɔ̃; e tui klaate nya fo.

²³ Kɛ̃ɛ̃ mi bihi hii a sibi a he hae ngɛ e se mi; akplɔ kɛ tsɛ̃i hii kpɛe nylamnylam.

²⁴ Ke titimati ɔ pɛ kikɛ nɛ ɔ, e dɛ si dii; e kɛ hɛdɔ kɛ mi mi fumi nɛ nya wa gbɔɔ fo kɛ yaa ta.

²⁵ Ke titimati ɔ pɛ kɛkɛ e fli e gugwɔ mi wawɛɛ. E nuɔ ta he fu ngɛ tsitsaa lokoo. E nuɔ nɛ asafoatsɛmɛ ɔmɛ ngɛ gbi woe, nɛ ose ngɛ pɛe ngɛ ta a mi.

²⁶ Mo lɛ o tsɔɔ kayo temi loko e gbɛɛ e pɛlihi a mi, nɛ e teɔ kɛ yaa leneyi je ɔ lo?

²⁷ Mo lɛ o deɔ kɔle loko e ya peeɔ e tsu ngɛ hiɔwe lokoo ɔ lo?

²⁸ Tɛ sa mi e hiiɔ; lejɛ ɔ ji e we; tɛ sa kɛ e nya piɔpiɔɔpiɔ ɔ ji e mɔ.

²⁹ Ke e ngɛ lejɛ ɔ, e hɛngmɛ hyɛɛ nɔ́ kɛ yaa tsitsaa kaa e maa na lohwe ko nɛ e ye lo.

³⁰ Ke e na lohwe gbogboe ko kikɛ nɛ ɔ, e ya maa si ngɛ lejɛ ɔ, nɛ e bimɛ ɔmɛ nuɔ muɔ.