Hiob 38 - BAIBLO ALOO NGMAMI KLƆUKLƆU Ɔ

Yawɛ ha Hiob heto

¹ Kɛkɛ nɛ Yawɛ kɛ Hiob tu munyu kɛ je kɔɔhiɔ nɛ nya wa mi.

Yawɛ

² Mɛnɔ ji mo nɛ o kɛ munyu puu nɛ juɛmi be mi biɔ mi ye nile he sane?

³ Da si kaa nyumu, nɛ o ha mi sanehi nɛ ma bi mo ɔ a heto.

⁴ Benɛ i to je ɔ sisi ɔ, jije o ngɛ? Ke o le ɔ, ha mi heto.

⁵ Je ɔ kami kɛ e blimi ɔ, mɛnɔ lɛ tsɔɔ? Mɛnɔ lɛ fɔ kpa kɛ susu? Tse o ma nyɛ ma ha heto!

⁶ Mɛni nɔ a fia e sisi tomi ɔmɛ kɛ ma? Mɛnɔ lɛ to kɔ nya tɛ ɔ?

⁷ Jamɛ a ligbi ɔ mɔtu ɔ, dodoe ɔmɛ tsuo la, nɛ Mawu bimɛ ɔmɛ tsuo hwɔ lele.

⁸ Benɛ wo ɔ hia kɛ ma babaaba kaa nɔ́ nɛ zugba a nitsɛ mi mi lɛ e je ɔ, mɛnɔ lɛ nga sinya a kɛ tsi wo ɔ nya?

⁹ Imi lɛ i ngɔ bɔku kɛ ha wo ɔ he; imi lɛ i ngɔ diblii kpii kɛ blaa lɛ.

¹⁰ Imi lɛ i po huzu kɛ wo wo ɔ he, nɛ i ma nya agbo kɛ e se dade.

¹¹ I de wo ɔ ke, “Moo fia kɛ ba su hiɛ ɔ pɛ; koo be he! O we oslɔke ngua amɛ ɔ, he nɛ a ma ba ta ji nɛ ɔ nɛ.”

¹² Hiob, o wami be ɔ tsuo mi ɔ, anɛ o fa hyɛ ke je nɛ na, nɛ je na lo?

¹³ Anɛ o fa hyɛ ke mɔtu la a nɛ nu je ɔ kɛ yaa si a ma huanya yiwutsotsɛmɛ kɛ je a laami hehi lo?

¹⁴ Piani la haa nɛ a naa yoku ɔmɛ, kɛ kɔ̃ ɔmɛ saminya kaa bɔ nɛ a naa zahi ngɛ bo mi, aloo nya sɔumi nɔ́ ngɛ tabo zu mi ɔ.

¹⁵ Piani la nya wa tsɔ ha yayami peeli. E tsiɔ mɛ blɔ nɛ a nyɛ we nɛ a tsuɔ yi wu tso ní.

¹⁶ Pahi nɛ ngɛ wo ɔ sisi ɔ, anɛ o ya a kasa nya hyɛ lo? O nyɛɛ ngɛ muɔ voo ɔ nɛ ngɛ lejɛ ɔ mi hyɛ lo?

¹⁷ Agbohi nɛ ngɛ ni gbogboehi a je, he nɛ wo diblii kpii ɔ, anɛ nɔ ko bli nya kɛ tsɔɔ mo hyɛ lo?

¹⁸ Anɛ o le je ɔ blimi lo? Ke o le ɔ, ha mi heto.

¹⁹ Jije a guu kɛ yaa la hi he? Diblii hu jije e hi he ngɛ?

²⁰ Anɛ o ma nyɛ maa tsɔɔ mɛ a huzu nya, nɛ o kpale mɛ kɛ ba a hi he ekohu lo?

²¹ Ee, o ma nyɛ; nɔkɔtɔma ji mo. Jamɛ a be ɔ, tse a fɔ mo!

²² Hehi nɛ i toɔ snoo, kɛ gbiɛ ngo ngu ngɛ ɔ, o ya lejɛ ɔmɛ hyɛ lo?

²³ I ngɔ mɛ ngɔ to lejɛ ɔ ngɛ haomi, loo ta nɛ maa ba he.

²⁴ Jije a guu kɛ yaa he nɛ pu jeɔ kɛ baa, aloo he nɛ beleku kɔɔhiɔ fiaa kɛ jeɔ?

²⁵ Mɛnɔ lɛ gba nyu dɔ kɛ ha hiɔmi nɛ nɛɛ piapiaapia a? Mɛnɔ lɛ je blɔ ha hiɔwe simi, kɛ oslabai gbami?

²⁶ Mɛnɔ lɛ haa nɛ hiɔmi nɛɛ ngɛ zugba nɔ he nɛ nɔmlɔ adesa ko be kaa nga kplanaa nɔ kikɛ nɛ ɔ?

²⁷ Zugba nɛ gbo, aloo zugba nɛ pee nga kplanaa a, mɛnɔ lɛ haa lɛ nyu loko nga puɛɔ ngɛ nɔ?

²⁸ Hiɔmi nɛ nɛɛ ɔ, e ngɛ tsɛ lo? Bɔ́ hu, mɛnɔ lɛ fɔ lɛ?

²⁹ Mɛnɔ muklii mi nyu tɛ je? Hiɔwe bɔ́ ɔ, mɛnɔ lɛ fɔ lɛ?

³⁰ Nyu ɔ wluaa gaganii, nɛ e he waa kaa tɛ.

³¹ Dodoehi nɛ a tsɛɛ ke Kungwɔ kɛ e bimɛ ɔ, anɛ o ma nyɛ maa fi mɛ kɔsɔkɔsɔ lo? Huɛ etɛ ɔ, o ma nyɛ maa pɛne e mi mi fimi nɔ́ ɔ lo?

³² Anɛ o ma nyɛ maa tsɔɔ dodoehi blɔ ngɛ a be mi lo? O ma nyɛ maa tsɔɔ Je kpaago kɛ e bimɛ ɔmɛ blɔ lo?

³³ Anɛ o le mlaahi nɛ a kɛ tsuɔ ní ngɛ hiɔwe lo? O ma nyɛ ma ha jamɛ a mlaa amɛ nɛ tsu ní ngɛ zugba a nɔ lo?

³⁴ Anɛ o ma nyɛ maa wo gbi nɛ nyu babauu maa je bɔku ɔmɛ a mi ba pɔ mo lo?

³⁵ Anɛ o ma nyɛ ma fa oslabai ke e gba, nɛ e ma he nɔ ke, “Ma pee kaa bɔ nɛ o fa mi ɔ” lo?

³⁶ Mɛnɔ lɛ ha nɔmlɔ adesa nile? Mɛnɔ kɛ juɛmi wo nɔmlɔ yi mi?

³⁷ Mɛnɔ lɛ le ní bɔ nɛ sa nɛ e ma nyɛ maa kane bɔkuhi ngɛ hiɔwe? Mɛnɔ ma nyɛ ma plɛ nyu buɛ mi bɔku ɔmɛ a nya ngɔ ka si,

³⁸ nɛ tabo zu ɔ ma pɔtɔ maa pee mɔsɔ; nɛ lɔ ɔ se ɔ, e maa pee zu kpɔ longolongohi?

³⁹ Mo lɛ o haa jata niye ní nɛ e yeɔ lo? Mo lɛ o haa jata bimɛ ní nɛ a yeɔ nɛ a tɔɔ,

⁴⁰ be mi nɛ a buu si ngɛ tɛ puɔhi a mi, loo a wo ka ngɛ a muɔhi a mi?

⁴¹ Mɛnɔ lɛ haa kuakualabite niye ní? Ke hwɔ ngɛ kuakualabite bimɛ yee, nɛ a ngɛ niye ní hlae kɛ bee, nɛ a kpa ngmlaa tsɛ mi ɔ, mɛnɔ lɛ haa mɛ niye ní?