Hiob 37 - BAIBLO ALOO NGMAMI KLƆUKLƆU Ɔ

¹ Nɔ́ nɛ ɔ ha ye tsui po, nɛ e ngɛ fiae kplakplaakpla.

² Nyɛɛ bu tue! Mawu wo gbi, nyɛɛ bu tue; nyɛɛ bu hoo nɛ ngɛ pɛe kɛ je e nya mi ɔ tue.

³ E haa oslabai gbaa ngɛ hiɔwe, nɛ e kpɛɔ ngɛ je ɔ kɔ nya he tsuaa he.

⁴ Kɛkɛ ɔ, hiɔwe siɔ wawɛɛ kɛ nyɛɛɔ se. Jamɛ a be ɔ tsuo oslabai ɔ ngɛ la pae plamplam.

⁵ Ke Mawu wo gbi kikɛ nɛ ɔ, e peeɔ ní nguahi nɛ wa juɛmi sui he.

⁶ E faa ke snoo nɛ nɛ ngɔ pue zugba a nɔ, nɛ e haa nɛ hiɔmi nɛ nya wa hu nɛɔ ja nɔuu.

⁷ Ke e ba kikɛ nɛ ɔ, nimli adesahi kpaa ní tsumi, konɛ nimli adesahi ngɛ je ɔ mi tsuo nɛ a na e he wami ɔ.

⁸ Kɛkɛ ɔ, nga mi lohwehi beɔ kɛ yaa a hi hehi.

⁹ Kɔɔhiɔ nɛ nya wa fiaa kɛ jeɔ leneyi je, nɛ fĩɛ nɛ nya wa jeɔ omleyi je kɛ baa.

¹⁰ Mumi nɛ jeɔ Mawu gugwɔ mi ɔ haa nɛ nyu babauu ɔ wluaa gaganii kaa tɛ.

¹¹ Mawu haa bɔku ɔmɛ hyi ɔ kɛ nyu. Oslabai hii la pae ngɛ bɔku ɔmɛ a mi,

¹² be mi nɛ a ngɛ nyɛɛe nɛ a ngɛ Mawu ní tsue ɔ. Nɔ́ tsuaa nɔ́ nɛ Mawu fa mɛ ke a pee ngɛ je ɔ mi tsuo kɛ bɔle si ɔ, a peeɔ pɛpɛɛpɛ.

¹³ Mawu haa hiɔmi nɛɛ, konɛ nyu nɛ ba zugba a nɔ; e haa hiɔmi nɛɛ nɛ e kɛ gblaa nimli adesahi a tue, aloo nɛ e kɛ naa mɛ mɔbɔ.

¹⁴ Hiob, bu tue! Da si dii nɛ o susu Mawu nyakpɛ ní ɔmɛ a he.

¹⁵ Anɛ o le bɔ nɛ Mawu faa, nɛ e haa oslabai gbaa kɛ jeɔ bɔku mi lo?

¹⁶ Bɔ nɛ bɔkuhi plɛɔ kɛ beɔ kɛ a he sɔmi ngɛ nyakpɛ blɔ nɔ ɔ, anɛ o le lo? Ee, ní lelɔ kpanaa a, e ní tsumi ji lɔ ɔ nɛ.

¹⁷ Ke leneyi je kɔɔhiɔ ngɛ fiae, nɛ je mi ngmɛ dii ɔ, anɛ o le bɔ nɛ peeɔ loko moo o he mi dɔɔ la lo?

¹⁸ Hiɔwe ɔ nɛ he wa kpakpataa kaa ahuhuɛ nɛ a sile, nɛ a puɛ ngɔ ma si ɔ, anɛ o ma nyɛ maa gbla mi kaa bɔ nɛ lɛ Mawu ɔ, e pee ɔ lo?

¹⁹ Hiob, moo tsɔɔ wɔ nɔ́ nɛ wa ma de Mawu. Wɔɔ lɛɛ wa juɛmi mi wo diblii, nɛ nɔ́ ko be wa nya mi nɛ wa ma de.

²⁰ I be suɔe nɛ i kɛ Mawu nɛ tu munyu. Ke i pee ja a, ye hɛ mi ma kpata.

²¹ Amlɔ nɛ ɔ, la nɛ ngɛ hiɔwe ɔ ngɛ kpɛe nylamnylam nɛ e hi hyɛmi, ejakaa kɔɔhiɔ muɔ bɔku ɔmɛ kɛ ho.

²² Je mi tsɔ hleii kaa sika tsu ngɛ omleyi je; Mawu hɛ mi nyami ɔ ngɛ gbeye.

²³ Mawu Ope ɔ loo, wa be nyɛe maa su e he. E ngɛ he wami, e yeɔ dami sane, nɛ e pee we nɔ́ nɛ dɛ kɔkɔɔkɔ.

²⁴ Enɛ ɔ he je ɔ, nihi tsuo yeɔ lɛ gbeye; ni nɛmɛ nɛ mɛɛ a buɔ a he ní leli ɔ, Mawu lɛɛ e bui mɛ fɛɛ.