Hiob 36 - BAIBLO ALOO NGMAMI KLƆUKLƆU Ɔ

^1-2 Moo to o tsui si nɛ o bu mi tue! Níhi nɛ i ngɛ mo dee ngɛ Mawu nane mi ɔ, i gbi nya lolo.

³ Ma ngɔ ye nile nɛ hiɛ babauu ɔ kɛ tsɔɔ mo kaa Mawu nɛ bɔ mi ɔ, dalɔ ji lɛ.

⁴ Anɔkuale i ngɛ tue ɔ nɛ, pi lakpa; ní lelɔ kpanaa lɛ daa si ngɛ o hɛ mi ɔ nɛ.

⁵ Mawu kle! E nyɛ́ nɔ. Nɔ́ ko nɔ́ ko be nɛ e juɛmi sui he.

⁶ E ha we nɛ yayami peeli a se kɛɛ ngɛ je mi; e yeɔ ohiatsɛmɛ a sane kɛ haa mɛ.

⁷ Mawu hɛngmɛ ngɛ dali a he be tsuaa be. E hyɛɛ a nɔ kaa matsɛmɛ, nɛ e woɔ a hɛ mi nyami daa.

⁸ Se ke a bɔ nihi pã, nɛ a ngɛ nɔ́ nae ngɛ nɔ́ ko nɛ a pee he ɔ,

⁹ Mawu tsɔɔ mɛ a nɔ́ nami ɔ sisi, kaa a wo a he nɔ, nɛ a pee yayami.

¹⁰ E kaa a hɛ mi saminya, nɛ e deɔ mɛ ke a kpa yayami peemi.

¹¹ Ke a bu Mawu tue nɛ a sɔmɔ lɛ ɔ, a ma na tue mi jɔmi, kɛ kplɔkɔtɔ.

¹² Se ke a bui tue ɔ, lɛɛ a ma gbo ngɛ klaate nya kaa nihi nɛ li nɔ́.

¹³ Nihi nɛ li Mawu ɔ, mɛɛ lɛɛ a woɔ a mi mi la kɛ yaa nɔ. Ke a gbla a tue po, a fa we kue kɛ tsɛ balɔ.

¹⁴ A gboɔ ngɛ a nihe mi, ejakaa a hyɛ we a nɔmlɔ tso ɔ nɔ saminya. A gbenɔ peeɔ hɛ mi si puemi.

¹⁵ Mawu tsɔɔ nihi ní kɛ guu nɔ́ nami mi; e ngɔɔ amanehlu kɛ bliɔ nihi a hɛngmɛ.

¹⁶ Mawu je mo kɛ je amanehlu mi, nɛ e ha mo tue mi jɔmi, kɛ niye ní kpakpa.

¹⁷ Se, jehanɛ lɛɛ a ngɛ o tue gblae bɔ nɛ sa mo.

¹⁸ Hyɛ saminya nɛ o mi mi nɛ fu ɔ kó ha nɛ o ya gbe Mawu he guɛ. Ko ha ní nami nɛ je o juɛmi kɛ je Mawu he.

¹⁹ Ke o fa kue kɛ tsɛ balɔ hu, yaka gu; o he wami tsuo be nyɛe ma tsu nɔ́ ko.

²⁰ Ko de ke o na nɛ e su nyɔ mi, be mi nɛ nihi a hɛ mi ma kpata.

²¹ Hyɛ saminya nɛ o ko ya nyɛɛ yayami se. A kɛ amanehlu nɛ ɔ ba o nɔ, konɛ o ko pee yayami.

²² Na nɛ o le kaa Mawu ngɛ he wami; e kle pe tsɔɔli tsuo.

²³ Mɛnɔ lɛ maa tsɔɔ Mawu nɔ́ nɛ sa nɛ e pee? Mɛnɔ lɛ maa po e nya ke e pee yayami?

²⁴ Nihi ngɛ Mawu yi jee ngɛ e ní tsumi kpetekpleenyɛ ɔmɛ a he; mo hu mo je e yi koo.

²⁵ Níhi nɛ Mawu tsuɔ ɔ, nɔ tsuaa nɔ naa, se nɔ ko nɔ ko nui sisi.

²⁶ Hyɛ, Mawu kle! Wa li lɛ kulaa; jeha nɛ e ye hu wa juɛmi sui he.

²⁷ Mawu lɛ gblaa nyu kɛ jeɔ zugba, nɛ e haa nɛ e plɛɔ peeɔ hiɔmi nɛ nɛɛ.

²⁸ E haa nɛ hiɔmi nɛɛ babauu kɛ jeɔ bɔku mi kɛ pueɔ si ha nimli adesahi tsuo.

²⁹ Bɔ nɛ bɔku haa si, kɛ bɔ nɛ hiɔwe siɔ ngɛ lɛ Mawu ɔ e hi he ɔ, mɛnɔ lɛ le?

³⁰ E haa nɛ oslabai gbaa ngɛ hiɔwe ɔ tsuo, se wo ɔ sisi lɛɛ e ngɛ diblii mi.

³¹ Bɔ nɛ Mawu peeɔ kɛ hyɛɛ e ma a nɔ ji nɛ ɔ nɛ: e haa mɛ niye ní babauu.

³² E kɛ e nine nuɔ oslabai, nɛ he tsuaa he nɛ e fa lɛ ke e ya a, kɛkɛ e gba kɛ ya lejɛ ɔ.

³³ Ke hiɔwe si ɔ, lɔ ɔ tsɔɔ kaa kɔɔhiɔ nɛ nya wa ma ngɛ se. Lohwehi tete po le enɛ ɔ.