Hiob 35 - BAIBLO ALOO NGMAMI KLƆUKLƆU Ɔ

^1-2 Hiob, e sɛ kaa o deɔ ke o pee we yayami ko ngɛ Mawu hɛ mi.

³ E sɛ po kaa o biɔ Mawu ke, “Ke i pee yayami ɔ, mɛni lɔ ɔ kɔɔ ngɛ o he? Mɛni se i naa kaa i pee we yayami ko?”

⁴ Ma ha mo heto, mo kɛ o huɛmɛ ɔmɛ tsuo.

⁵ Hyɛ hiɔwe; hyɛ bɔ nɛ o kɛ bɔku ɔmɛ a he kɛ ha!

⁶ Ke o pee yayami ɔ, kɛ lɔ ɔ saa Mawu he kɛɛ? Aloo ke o pee yayami nɔtonɔto ɔ, mɛni lɔ ɔ peeɔ ha Mawu?

⁷ Ke o pee nɔ́ nɛ da a, mɛni ji nɔ́ nɛ o pee kɛ ha Mawu? Mɛni ji nɔ́ nɛ Mawu ma na ngɛ o dɛ?

⁸ Ke o pee yayami ɔ, o nyɛmi nɔmlɔ adesa lɛ naa nɔ́; ke o pee kpakpa a, o nyɛmi nɔmlɔ adesa lɛ naa he se.

⁹ Ke a ngɛ nimli adesahi yi mi wae ɔ, a kpaa ngmlaa kɛ tsɛɔ balɔ.

¹⁰ Se Mawu nɛ bɔ mɛ ɔ, nɔ nɛ baa a yi nyɔ mi tete po ɔ, lɛɛ nɔ ko hla we e se blɔ.

¹¹ Mawu ɔ nɛ pee wɔ ní leli pe lohwehi tsuo ɔ, a hla we e se blɔ.

¹² A kpaa ngmlaa kɛ tsɛɔ balɔ, se Mawu bui mɛ tue; ejakaa he nɔ woli, kɛ yayami peeli ji mɛ.

¹³ Niinɛ, Mawu bui yaka ngmlaa tue; Mawu Ope ɔ bui he akɔtaa.

¹⁴ Hiob, mo lɛ o ke o be Mawu nae ɔ? O sane ɔ ngɛ e hɛ mi; moo hyɛ lɛ blɔ.

¹⁵ Amlɔ nɛ ɔ, o susuɔ kaa Mawu gbla we nɔ tue, nɛ ke nɔ pee yayami hu e di se tsɔ.

¹⁶ Enɛ ɔ he je ɔ, mo Hiob, o paa o nya mi nɛ o tuɔ munyu bɔ nɛ o suɔ. O tuɔ munyuhi babauu nɛ juɛmi be mi.