Hiob 34 - BAIBLO ALOO NGMAMI KLƆUKLƆU Ɔ

^1-2 Nyɛ ní leli, nyɛɛ bu mi tue.

³ Munyu kpakpa, loo munyu yaya a, tue nɛ leɔ, kaa bɔ nɛ lilɛ hu leɔ niye ní nɛ ngɔɔ, kɛ nɔ́ nɛ ngɔɛ ɔ.

⁴ Nyɛ ha nɛ waa hyɛ sane ɔ mi, nɛ waa na anɔkuale ɔ.

⁵ Hiob ngɛ tsɔɔe kaa dalɔ ji lɛ, se Mawu mohu lɛ yi dami sane ha lɛ.

⁶ E ke e pee we nɔ́ ko nɛ dɛ blɔ, se a bu lɛ lakpatsɛ. E ngɛ mi kaa a plaa lɛ yeyee mohu, se e le kaa e pee we yayami ko.

⁷ Anɛ nyɛ na nyumu ko hyɛ kaa Hiob lo? Nɔmlɔ nɛ bɔɔ musu bɔ nɛ e suɔ kaa bɔ nɛ a nuu nyu ɔ.

⁸ E kɛ nimli yayamihi lɛ bɔɔ.

⁹ E deɔ ke e he be se nami kaa nɔ ko nɛ pee Mawu suɔmi nya ní.

¹⁰ Lɔ ɔ he ɔ, nyɛɛ bu mi tue, nyɛ juɛmitsɛmɛ! Anɛ Mawu maa pee yi wu tso ní lo? Anɛ Ope ɔ maa pee nɔ́ nɛ dɛ blɔ lo?

¹¹ Mawu lɛɛ nɔ́ nɛ o tsu ɔ, lɔ ɔ he hiɔ lɛ e woɔ mo; Mawu woɔ nɔ tsuaa nɔ hiɔ bɔ nɛ sa lɛ.

¹² Niinɛ, Mawu pee we nɔ́ nɛ dɛ blɔ; Ope ɔ plɛ we nɔ ko sane hɛ mi ngɔ bu si.

¹³ Mɛnɔ nɛ ha Mawu e he wami ɔ? Mɛnɔ nɛ tu je ɔ tsuo kɛ wo e dɛ mi?

¹⁴ Ke Mawu kpɔ mumi nɛ haa nɔ wami ngɛ nɔmlɔ dɛ ɔ,

¹⁵ nimli adesahi tsuo ma gbo, nɛ a ma plɛ pee tabo zu ekohu.

¹⁶ Lɔ ɔ he ɔ, ke ní leli ji nyɛ ɔ, nyɛɛ bu mi tue.

¹⁷ Nɔ nɛ he wa nɛ e yeɔ dami sane ɔ, o maa bu lɛ fɔ, konɛ nɔ nɛ sume dami sane yemi ɔ mohu nɛ ye tsɛ lo?

¹⁸ Mɛnɔ lɛ deɔ matsɛ ke, “Yaka nɔmlɔ ji mo!” Mɛnɔ lɛ deɔ odehehi ke, “Yiwutsotsɛmɛ ji nyɛ!”

¹⁹ Mawu hyɛ we ganɔhi a hɛ mi. E bui niatsɛmɛ pe ohiatsɛmɛ; ejakaa lɛ nɛ e bɔ mɛ tsuo.

²⁰ Nɔmlɔ gboɔ tlukaa, Mawu fiaa nimli adesahi nɔ́ nyɔ mi kɛkɛ a hɛ mi kpata. Nimli nguahi po Mawu gbeɔ mɛ nɛ adesa nine be mi.

²¹ E hɛ ngɛ nɔmlɔ he be tsuaa be. E náá e ní peemi níhi tsuo.

²² Diblii ko be nɛ nya tsa bɔ nɛ yayami peeli maa laa a he ngɛ mi.

²³ E hia we kaa Mawu nɛ to be ha nimli adesahi nɛ a ba e ngɔ loko e kojo mɛ.

²⁴ E jeɔ nimli nguahi kɛ jeɔ a blɔ hehi, nɛ e ngɔɔ ni kpahi kɛ daa a nane mi; e hia we kaa e hla a sane ɔmɛ a mi.

²⁵ Akɛnɛ Mawu le nɔ́ nɛ a tsuɔ he je ɔ, e ba tuaa mɛ nyɔ mi, nɛ e kpataa a hɛ mi.

²⁶ Mawu gblaa yayami peeli a tue ngɛ ma hɛ mi,

²⁷ ejakaa a kpa e se nyɛɛmi, nɛ e mlaa amɛ hu a yi ekoeko nɔ.

²⁸ A ha nɛ ohiatsɛmɛ kpa ngmlaa kɛ ba Mawu yemi kɛ buami, nɛ Mawu nu nɔ́ nali ɔmɛ a kue fami ɔ.

²⁹ Ke Mawu pee dii ɔ, mɛnɔ maa pa e nya mi? Ke e ngɔ e hɛ mi kɛ laa a, mɛnɔ maa na lɛ; ma ko loo, aloo nɔmlɔ adesa ko?

³⁰ Lɔ ɔ lɛɛ ma ko be nyɛe maa pee nɔ ko, konɛ nɔmlɔ yayami ko ye tsɛ nɛ e ba kpata e ma a hɛ mi.

³¹ Hiob, anɛ o jaje o yayami ɔmɛ kɛ tsɔɔ Mawu lo? Anɛ o wo lɛ si kaa o be yayami pee hu lo?

³² Anɛ o fa kue ha Mawu ke e tsɔɔ mo o tɔmi ɔmɛ lo? Anɛ o kplɛɛ kaa o ma kpa yayami peemi lo?

³³ Nɛ́ o kua Mawu ɔ, o ngɛ lɛ blɔ hyɛe kaa e pee moo o suɔmi nya ní ha mo lo? Mo lɛ o ma ha munyu nɛ ɔ heto; pi imi. Kɛ o susuɔ kɛɛ?

³⁴ Nihi nɛ ngɛ juɛmi, kɛ ní leli tsuo nɛ ngɛ mi tue bue ɔ, nɔ́ nɛ a ma de ji,

³⁵ “Munyuhi nɛ Hiob ngɛ tue ɔ, juɛmi be mi; e li nɔ́ nɛ e ngɛ dee ɔ.”

³⁶ E je imi nɔ kake ye he jinɛ a ko gbla Hiob tue wawɛɛ nitsɛ ngɛ munyu yayahi nɛ e tu kɛ si Mawu ɔ he.

³⁷ Hiob tsɔ atuã kɛ piɛ e yayami ɔmɛ a he, nɛ e tu munyuhi babauu ngɛ wa hɛ mi kɛ si Mawu.