Hiob 32 - BAIBLO ALOO NGMAMI KLƆUKLƆU Ɔ

Elihu tu munyu

¹ Jehanɛ lɛɛ nyumuhi etɛ nɛ ɔmɛ ha we Hiob e munyu ɔmɛ a heto hu, ejakaa a na kaa e buu e he kaa nɔmlɔ nɛ da.

² Kɛkɛ nɛ Elihu mi mi fu Hiob wawɛɛ nitsɛ kaa e pia Mawu, nɛ e wo lɛ nitsɛ e he nguɔ. (Elihu nɛ ɔ, Buz no ɔ nɛ a tsɛɛ lɛ Barakel ɔ binyumu ji lɛ. E je Ram weku ɔ mi, nɛ lɛɛ e bee ngɛ lejɛ ɔ kɛkɛ.)

³ Elihu mi mi fu Hiob huɛmɛ etɛ ɔmɛ hulɔ, ejakaa a bu Hiob fɔ, be mi nɛ mɛ nitsɛmɛ a nɛ heto kpakpa ko nɛ a ha lɛ.

⁴ E mlɛ kɛ ya si ni ɔmɛ tsuo tu munyu gbe nya loko e kɛ Hiob tu munyu, ejakaa lɛ ji a kpɛti nɔ wayoo pe kulaa.

⁵ Benɛ Elihu na kaa nyumuhi etɛ nɛ ɔmɛ pa nyɛ we nɛ a ha Hiob e sane ɔmɛ a heto hu ɔ, e mi mi wo la,

⁶ nɛ e tu munyu. Niheyo kɛkɛ ji mi; nyɛɛ lɛɛ nikɔtɔmahi ji nyɛ. Enɛ ɔ he je ɔ, i ya ye gbeye, nɛ i nyɛ we nɛ ma de nyɛ bɔ nɛ imi hu i susu ha.

Elihu

⁷ I de ngɛ ye yi mi ke, nyɛ lɛ e sa kaa nyɛɛ tu munyu; nyɛ nimeli ɔmɛ lɛ e sa kaa nyɛ je nyɛ juɛmi kpo.

⁸ Se, Mawu Ope mumi ɔ nɛ ngɛ nɔmlɔ adesa mi ɔ, lɛ nɛ e haa nɔmlɔ nile.

⁹ Pi wami nɛ peeɔ nɔ ní lelɔ; pi bwɔmi nɛ haa nɛ nɔ leɔ nɔ́ nɛ da.

¹⁰ Lɔ ɔ he ɔ, i kpa nyɛ pɛɛ nɛ nyɛɛ bu mi tue, konɛ imi hu ma je ye juɛmi kpo.

¹¹ Benɛ nyɛ ngɛ ní sɛɛe, nɛ nyɛ ti nɔ tsuaa nɔ ngɛ mɔde bɔe kaa e maa tu nile munyu ɔ, i ngmɛ dii, nɛ i ngɛ nyɛ tue bue.

¹² Nɛ́ i bu nyɛ tue hluu ɔ, i na kaa nyɛ ti nɔ ko nɔ ko nyɛ we nɛ e ha Hiob munyu ɔmɛ a heto bɔ nɛ sa.

¹³ Nyɛɛ hyɛ saminya nɛ e ko pee nyɛ kaa nyɛ le ní. Mawu lɛ maa bu Hiob fɔ, se pi nɔmlɔ adesa.

¹⁴ Hiob ɔ, pi imi nɛ e kɛ ngɛ munyu tue. Kaa imi lɛ e kɛ ngɛ munyu tue ɔ, jinɛ bɔ nɛ nyɛ ha lɛ heto ɔ, imi lɛɛ pi ja nɛ ma de lɛ.

¹⁵ Hiob hyɛ, ní leli ɔmɛ pee yaa; a pee dii, a pa be nɔ́ ko nɛ a ma de hu.

¹⁶ I mlɛ hluu kaa a ma pa de nɔ́ ko lo; i mlɛ kaa a ma ha mo heto kpa ko lo. Se a daa si dii kɛkɛ.

¹⁷ Lɔ ɔ he ɔ, imi hu ma de ye nɔ́; ma je imi hu ye juɛmi kpo.

¹⁸ I ngɛ níhi babauu nɛ ma de. Mumi nɛ ngɛ ye mi ɔ ngɛ ye yi se tsitsɛɛe.

¹⁹ Ke i na we he blɔ nɛ ma tu munyu ɔ, lɛɛ ma pɛ́ kaa wai tɔ nɛ wai he hyi lɛ tɔtɔɔtɔ.

²⁰ Ma tu munyu, konɛ ma na he jɔmi; ma pa ye nya mi, nɛ ma ha mo o munyu ɔmɛ a heto.

²¹ I be nɔ ko hɛ mi hyɛe kɛ tu munyu; nɛ i be munyu dɔkɔdɔkɔ tue ngɛ nɔ ko he.

²² I li munyu dɔkɔdɔkɔ tumi. Ke i pee ja a, ye bɔlɔ ɔ maa gbla ye tue amlɔ.