Hiob 31 - BAIBLO ALOO NGMAMI KLƆUKLƆU Ɔ

¹ I ka kita kaa i kɛ akɔnɔ hɛngmɛ be zangmayo ko hyɛe gblegbleegble.

² Mɛni hiɔwo lɛ ma na kɛ je Mawu nɛ ngɛ hiɔwe ɔ dɛ mi? Mɛni weto ní lɛ ma na kɛ je Ope ɔ dɛ mi?

³ Anɛ e kpataa we yiwutsotsɛmɛ a hɛ mi lo? Anɛ e gbla we yayami peeli a tue lo?

⁴ Mawu le nɔ́ tsuaa nɔ́ nɛ i peeɔ; e le ye blɔ ɔmɛ tsuo.

⁵ I ngɛ kita kae kaa i yi nɔ ko lakpa; i sisi we nɔ ko hulɔ.

⁶ Mawu nɛ́ ngmɛ mi ngɛ sɛni nɛ da nɔ, nɛ e maa na kaa i pee we yayami ko.

⁷ Ke i je blɔ kpakpa a nɔ kɛ ya nyɛɛ níhi nɛ ye tsui suɔ a se, nɛ i kɛ nɔ́ nɛ ɔ peemi ble ye he ɔ,

⁸ lɛɛ níhi nɛ i du ɔ, ni kpahi nɛ a ba ye; aloo ní ɔmɛ a hɛ mi nɛ kpata.

⁹ Ke ye nyɛmi ko e yo he pee mi akɔnɔ hyɛ, nɛ i ya wo lɛ ka ngɛ ye nyɛmi nɛ ɔ sinya se ɔ,

¹⁰ lɛɛ ye yo nɛ e hoo gba ní ha nɔ kpa, nɛ nyumu kpa kɛ lɛ nɛ hwɔ.

¹¹ Yayami kaa kikɛ nɛ ɔ, e ji zo; e sa kaa kojoli nɛ a gbla nɔ tue ngɛ he.

¹² E ngɛ kaa la nɛ sãã nɔ́ kɛ yaa tsitsaa; e ma kpata ye nɔ́ tsuaa nɔ́ hɛ mi.

¹³ Ke ye tsɔlɔ nyumu, aloo ye mawayo ko kɛ mi na sane ɔ, i yeɔ sane ɔ ngɛ blɔ nɛ da nɔ.

¹⁴ Ke i pee we ja a, kɛ ma pee kɛ da Mawu hɛ mi kɛɛ? Ke Mawu ba nɛ́ e ba kojo mi ɔ, kɛ ma de kɛɛ?

¹⁵ Mawu ɔ nɛ bɔ mi ɔ, lɛ kɛ̃ lɛ e bɔ ye tsɔli nyumu ɔmɛ, kɛ ye mawayi ɔmɛ.

¹⁶ Ke nɔ́ ko hia ohiatsɛ ɔ, i haa lɛ; yalɔyihi hu, i ha we nɛ a hɛngmɛ nɔ daa nyu.

¹⁷ Ke i ngɛ ní yee ɔ, i ha we nɛ hwɔ yeɔ awusahi.

¹⁸ I hyɛɔ awusahi a nɔ kaa a tsɛ ye wami be ɔ tsuo. I ye bua yalɔyihi kɛ je ye nihe mi.

¹⁹ Ke i na nɔ ko nɛ yi fi, nɛ nɔ́ ko be e dɛ nɛ e kɛ ma he bo nɛ e ha, ke i na dɛgutsɛ ko kaa kikɛ nɛ ɔ,

²⁰ i haa lɛ he hami nɔ́ nɛ a kɛ imi nitsɛ ye to he bwɔmi pee. Ke e he dɔ la a, kɛkɛ e maa na mi si babauu.

²¹ Ke i ya ye awusa ko amimi, ejakaa i le kaa bɔ tsuaa bɔ nɛ pee ɔ, a maa wo mi nguɔ ngɛ kojomi he ɔ,

²² lɛɛ ye nine nɛ ku; ye kɔni nɛ kplɔ kɛ je kɔni wu ɔ he.

²³ Se akɛnɛ i yeɔ Mawu Hewamitsɛ ɔ tue gblami ɔ gbeye he je ɔ, i be nyɛe ma pee nɔ́ ko kaa ja.

²⁴ I ngɔɛ ye hɛ fɔ we sika nɔ.

²⁵ Ní babauu nɛ i na a, i fĩa we ngɔ fɔ nɔ.

²⁶ Pu nɛ tsoɔ saminyayoo, kɛ nyɔhiɔ nɛ kpɛɔ saminyayoo nɛ ɔ, i ja we mɛ hyɛ.

²⁷ Nɔ́ ko mlɔɔ we mi hyɛ kaa ma fiɔ ye nine he kɛ wo a hɛ mi nyami.

²⁸ Nɔ́ nɛ ɔ hu maa pee yayami nɛ sa kaa kojoli nɛ a gbla nɔ tue ngɛ he. Ke i pee ja a, kɛkɛ i kua Mawu nɛ ngɛ hiɔwe ɔ.

²⁹ Ke haomi ba ye he nyɛlɔ nɔ, aloo ye he nyɛlɔ hɛ mi kpata a, i nya we.

³⁰ I sɔle we hyɛ ke ye he nyɛli nɛ a gbo, nɛ́ enɛ ɔ ba pee yayami ha mi.

³¹ Nihi tsuo nɛ tsuɔ ní ha mi ɔ le kaa hwɔ yi a ti nɔ ko hyɛ.

³² I ha we nɛ nibwɔhi hwɔɔ gbɛjegbɛ nɔ; mohu ɔ, i ngɔɔ mɛ kɛ baa we mi.

³³ I laa we ye yayamihi a nɔ kaa bɔ nɛ Adam pee ɔ.

³⁴ I yi nihi babauu a hɛ mi gbeye. Ke ye weku li muɔ mi ɔ, e pee we mi nɔ́ ko nɛ lɔ ɔ he ɔ, ma pee dii nɛ ma ko je kpo.

³⁵ Anɛ nɔ ko be nɔ́ nɛ i ngɛ dee ɔ tue bue lo? I ngɛ kita kae kaa anɔkuale sisiisi lɛ i ngɛ tue ɔ nɛ. Mawu Ope ɔ nɛ ha mi heto. Sanehi nɛ ye nya polɔ ɔ kɛ fɔ ye nɔ ɔ, a ngma sane nɛ ɔmɛ kɛ wo womi mi jinɛ

³⁶ i kɛ maa fɔ ye konɔ, nɛ ma fi kɛ wo ye yi kaa jlasi.

³⁷ Jinɛ ma nyɛɛ kam kam kaa ganɔ kɛ ya Mawu ngɔ, nɛ ma ya bɔ lɛ nihi tsuo nɛ i pee ɔ.

³⁸ Ke ye zugba a, aloo ngmɔ nɛ i pee ngɛ zugba a nɔ ɔ maa po ye nya

³⁹ kaa i ye zugba a nɔ niba ní yaka nɛ i wui he hiɔ, aloo kaa i gbe zugbatsɛmɛ ɔmɛ, konɛ ye nine nɛ su a zugba amɛ a nɔ ɔ,

⁴⁰ lɛɛ ngma nane mi ɔ, mio nɛ puɛ; akoko nane mi ɔ, nga nɛ puɛ. Hiob munyu ɔmɛ a nyagbe ji nɛ ɔ nɛ.