Hiob 30 - BAIBLO ALOO NGMAMI KLƆUKLƆU Ɔ

¹ Se mwɔnɛ ɔ, nihi nɛ i wa pe mɛ po ngɛ mi muɔe. Nimli nɛ ɔmɛ a tsɛmɛ nɛ fɔ mɛ ɔ, i bui mɛ fɛɛ; gbehi nɛ buu ye tohi a he pohu i kɛ mɛ be gbe ɔmɛ futue.

² Nimli nɛ a he wami tsuo ta nɛ ɔ, mɛni se ma na ngɛ a he?

³ Ohia kɛ hwɔ ha nɛ a ta he lo, nɛ a pee kanyakanya; sa a, tso sipoku gbigbli lɛ a kpeɔ ngɛ nga kplanaa nɔ.

⁴ Tso sipoku, kɛ ba ji a niye ní.

⁵ A fie mɛ kɛ je nimli a kpɛti; a huɔ mɛ kaa a huɔɔ julɔ.

⁶ A hi hehi ji muɔhi, tɛ sahi, kɛ dɔhi a mi.

⁷ A ya buaa a he nya ngɛ mio tsohi a sisi ngɛ pu mi, nɛ a hii huãe kaa lohwe awi yeli.

⁸ Yakayaka nimli, kɛ ni guhi ji mɛ tsuo, nihi nɛ a fia a nane si tu kɛ je ma a mi.

⁹ Amlɔ nɛ ɔ, a ba konɛ a ba muɔ mi; i plɛ pee a nya mi la.

¹⁰ A hɛ mɛ kɛ je ye kasa nya; a hiee mi. Ke a hyɛ mi kɛkɛ a la lada pue ye nɔ.

¹¹ Akɛnɛ Mawu gbla ye tue nɛ i gbɔjɔ he je ɔ, a bui mi fɛɛ; nɔ́ nɛ a suɔ lɛ a peeɔ mi.

¹² Yakayaka nimli nɛ ɔmɛ ba tuaa mi basabasa, nɛ a hlaa kaa a ma kpata ye hɛ mi.

¹³ A tsi mi blɔ nɛ ma ko ma fo; a bɔ mɔde kaa a ma kpata ye hɛ mi, nɛ nɔ ko nɔ ko tsi we a nya.

¹⁴ A hiɛ babauu kɛ ba tua mi kaa nɔ́ nɛ puɔ agbo ko mi lɛ a gu kɛ ba.

¹⁵ Sawale nu mi; ye hɛ mi nyami laa mi kaa kɔɔhiɔ muɔɔ ní kɛ yaa. Ye ní nami ɔ se po kaa bɔku.

¹⁶ Amlɔ nɛ ɔ, ye gbenɔ be su ta; jehanɛ lɛɛ, ye haomi ɔ nya ba wa tsɔ.

¹⁷ Nyɔ mi ɔ, ye wuhi a mi kpeɔ mi wawɛɛ nitsɛ nɛ he jɔmi be mi.

¹⁸ E ngɛ kaa nɔ́ nɛ Mawu mia ye yi nɔ tade ɔ kɛ wo ye kuɛ kpɛii nɛ mumi womi he be mi.

¹⁹ Mawu tsitsɛɛ mi kɛ wo mɔsɔ mi, nɛ i pee kaa tabo zu, aloo la zu.

²⁰ Mawu, ke i tsɛ mo ɔ, o he we nɔ; ke i fa kue ha mo ɔ, o bui mi tue.

²¹ O ngɛ mi yi mi wae; o kɛ nine si wami ngɛ mi yi mi wae wawɛɛ nitsɛ.

²² O wo ye nɔ nɛ o fɔ mi kɛ ya kɔɔhiɔ mi. Kɔɔhiɔ nɛ nya wa a fia mi kɛ ya kɛ ba.

²³ Niinɛ, i le kaa o ngɔ mi kɛ yaa gbeje, he nɛ a to kɛ ha nɔ́ tsuaa nɔ́ nɛ hɛ ngɛ ɔ.

²⁴ Se kɛ̃ ɔ, imi nɛ ye he wami ta, imi nɛ i nyɛ we nɔ́ ko peemi, nɛ pɛɛ kɛkɛ i ngɛ mo kpae ke o na mi mɔbɔ ɔ, mɛni he je lɛ o kɛ mi ye sane kikɛ nɛ ɔ?

²⁵ Anɛ i fo we ya ha nihi nɛ ngɛ haomi mi lo? Anɛ ohiatsɛmɛ a sane pee we mi mɔbɔ lo?

²⁶ Se benɛ i ngɛ nɔ́ kpakpa blɔ hyɛe ɔ, nɔ́ yayami mohu lɛ ba na mi. Benɛ i ngɛ la blɔ hyɛe ɔ, diblii mohu lɛ ba.

²⁷ Ye tsui ngɛ fiae wawɛɛ ngɛ ye mi mi; ye haomi ligbi ɔmɛ hiɛ tsɔ.

²⁸ I ngɛ kaa nɔ ko nɛ ngɛ diblii mi nyɛɛe nɛ e nɛ pu hɛ mi. I teɔ si ngɛ gua mi, nɛ i biɔ yemi kɛ buami.

²⁹ I plɛ pee nga mi gbehi a nyɛmi, kɛ klomihi a huɛ.

³⁰ Ye he womi pee tuu, nɛ ye wuhi a he dɔ la.

³¹ Ye gbi nɛ jijeɔ kaa saku, aloo bɛ ɔ, mwɔnɛ ɔ, e pɛɛ kaa nihi nɛ a wo yana kɛ ngɛ kɔmɔ yee.