Hiob 3 - BAIBLO ALOO NGMAMI KLƆUKLƆU Ɔ

Hiob kɛ Mawu tu munyu kɛ hɛdɔ

¹ Jehanɛ, Hiob wo e nya nɔ nɛ e gbiɛ ligbi ɔ nɛ a fɔ lɛ ɔ.

Hiob

^2-3 Á gbiɛ ligbi ɔ nɛ a fɔ mi ɔ; á gbiɛ nyɔ ɔ nɛ a wo ye hɔ ɔ.

⁴ Mawu nɛ ngɛ hiɔwe, ko kai jamɛ a ligbi ɔ hu gblegbleegble. Ha nɛ je ɔ mi nɛ wo diblii, nɛ pu ko tso hu.

⁵ Ha nɛ e pee mɔbɔ ligbi, nɛ je ɔ mi nɛ wo diblii kpii. Ha nɛ bɔku tuu ba ha pu ɔ hɛ mi.

⁶ Gbee jamɛ a nyɔ ɔ kɛ je jeha a mi; nɛ ke a ngɛ nyɔhiɔ ɔmɛ kanee ɔ, a ko kane jamɛ a nyɔ ɔ.

⁷ Ha nɛ jamɛ a nyɔ ɔ nɛ pee nyɔ ku; bua jɔmi la ko nɛ ko pɛ.

⁸ Nyɛ de nɔ gbiɛli ɔmɛ, kɛ wo mi lohwe ngua a hɛ mi la woli ɔmɛ ke a gbiɛ jamɛ a ligbi ɔ.

⁹ Ha nɛ nɔkɔ ɔ nɛ wo diblii; je mi nɛ ko tsɔ, nɛ je hu ko na.

¹⁰ Á gbiɛ jamɛ a nyɔ ɔ nɛ a fɔ mi ɔ, kaa e kɛ mi wo haomi kɛ aywilɛho mi.

¹¹ Mɛni he je i gbo we ngɛ maa mi mi? Mɛni he je i gbo we be nɛ a fɔ mi ɔ pɛ?

¹² Mɛni he je maa ngɔ mi kɛ fɔ e tɛ nɔ? Mɛni he je lɛ e ha mi nyɔ?

¹³ I gbo kpoo jamɛ a be ɔ mi, jinɛ amlɔ nɛ ɔ, ye he mi jɔ mi.

¹⁴ Jinɛ i kɛ matsɛmɛ, kɛ nɔ yeli nɛ ma mɔhi blema ko ɔ hwɔɔ si mwɔnɛ ɔ.

¹⁵ Jinɛ i kɛ ganɔhi nɛ bua sika tsu kɛ sika hiɔ nya tɔtɔɔtɔ ngɛ a wehi a mi ɔ hwɔɔ si mwɔnɛ ɔ.

¹⁶ Mɛni he je i gbo we ngɛ muɔ nɔ, nɛ i ko nɛ́ pu la a?

¹⁷ Ngɛ gbeje ɔ, yiwutsotsɛmɛ jɔɔ nɔ haomi, nɛ nihi nɛ pɔ tɔ mɛ ɔ, jɔɔ a he.

¹⁸ Lejɛ ɔ, pamitsɛmɛ po naa he jɔmi; nɔ ko tu we mɛ munyu basabasa hu; nɔ ko ke we a yi hulɔ.

¹⁹ Nimli wawi kɛ nimli nguahi tsuo ngɛ lejɛ ɔ, nɛ nyɔguɛ hu ye e he.

²⁰ Mɛni he je nimli adesahi maa hi haomi mi kɛ mwɔɔ? Mɛni he je e sa kaa nihi nɛ ngɛ aywilɛho yee ɔ a yi nɛ na wami?

²¹ A hyɛɛ gbenɔ blɔ, se gbenɔ bɛ; a hlaa yɔkɔ mohu se blɔ pe juetli.

²² Ja a gbo nɛ a pu mɛ, loko a naa bua jɔmi.

²³ Mɛni he je e sa kaa a fɔ nɔ ko nɛ e ba na nɔ́ yaka, be mi nɛ níhi nɛ maa ba e nɔ hwɔɔ se ɔ, Mawu ngɔ kɛ laa lɛ?

²⁴ I haoɔ loko i yeɔ ní, nɛ ke i ngɛ kɛmɛe ɔ, e ngɛ kaa nyu nɛ a kpa pue si.

²⁵ Níhi nɛ i yee gbeye ɔ, lɔ ɔmɛ i kɛ kpee; níhi nɛ i hla we ma na a, lɔ ɔmɛ i naa.

²⁶ I be tue mi jɔmi; i be he jɔmi; ye haomi ɔmɛ a se pui gblegbleegble.