Hiob 29 - BAIBLO ALOO NGMAMI KLƆUKLƆU Ɔ

Hiob je e nya nyagbe nɔ́

¹ Hiob tsa e munyu ɔ nɔ nɛ e de ke,

² I na nɛ i ngɛ kaa bɔ nɛ i ngɛ sa a nɛ Mawu buɔ ye he ɔ.

³ Jamɛ a be ɔ, Mawu kɛ mi ngɛ saminya, nɛ ke i ngɛ diblii mi nyɛɛe ɔ, e haa mi la.

⁴ Jamɛ a be ɔ, ye he hi, nɛ Mawu kɛ mi ngɛ kaa nɔ kɛ e huɛ.

⁵ Jamɛ a be ɔ, Ope ɔ kɛ mi ngɛ, nɛ ye bimɛ bɔle mi kɛ kpe.

⁶ Jamɛ a be ɔ, ye na amɛ, kɛ to ɔmɛ haa mi nyɔ nyu babauu; nɛ hehi nɛ tɛ sa hiɛ ngɛ po, i naa oliv tsohi babauu nɛ haa mi nu bɔ nɛ sa.

⁷ Be tsuaa be nɛ ma nimeli ma bua a he nya ngɛ ma agbo ɔ nya, nɛ ma ho ya hi ye blɔ he ngɛ lejɛ ɔ,

⁸ ke nihewi na mi pɛ kɛkɛ a gba ha mi; nikɔtɔmahi maa te nɛ a maa da si ha mi.

⁹ Ganɔ ɔmɛ maa jɔɔ munyu tumi, nɛ a kɛ a nine maa wo a nya mi.

¹⁰ Odehehi tete a lilɛ maa mɛtɛ a nya mi, nɛ a maa pee dii.

¹¹ Ke nihi nu ye he ɔ, a jeɔ ye yi, nɛ ke a na mi ɔ, a tuɔ ye he munyu kpakpa.

¹² Ejakaa ke ohiatsɛmɛ kpa ngmlaa kɛ tsɛ balɔ ɔ, i jeɔ mɛ; awusahi hu i piɛɔ a he ja nɔuu.

¹³ I je nihi kɛ je haomi mi, nɛ a gbaa mi; nɛ i ha nɛ yalɔyihi na bua jɔmi.

¹⁴ Be tsuaa be ɔ, i yeɔ dami sane, nɛ i peeɔ nɔ́ nɛ da.

¹⁵ I plɛ pee hɛngmɛ ha hɛ yuyuili, kɛ nane ha glɔtsɛmɛ.

¹⁶ I pee kaa tsɛ kɛ ha dɛgutsɛmɛ, nɛ nihi nɛ i li mɛ po, i ye a sane ha mɛ.

¹⁷ I ku yiwutsotsɛmɛ a tsitsa, nɛ i kpɔ nihi nɛ a ngɛ yi mi wae ɔ kɛ je a nya mi.

¹⁸ I hyɛ blɔ kaa ye wami ligbi ɔmɛ maa hiɛ babauu kaa zia, nɛ ma gbo ngɛ we, ngɛ he jɔmi mi.

¹⁹ I ngɛ kaa tso nɛ sipoku naa nyu be tsuaa be, nɛ bɔ́ pɔɔ e kɔnihi a he daa.

²⁰ Nihi tuɔ ye he munyu kpakpa daa, nɛ be tsuaa be ɔ, i naa he wami he.

²¹ Ke i ngɛ nihi ga woe ɔ, a peeɔ dii nɛ a buɔ nɔ́ nɛ i ngɛ dee ɔ tue.

²² Ke i tu munyu gbe nya a, nɔ ko de we nɔ́ ko hu; ejakaa a nuɔ ye munyu ɔmɛ a sisi saminya.

²³ Ke pee ɔ, a hyɛɛ mi blɔ nɛ ma ba tu mɛ munyu kaa bɔ nɛ nihi nɛ nyu he hia mɛ hyɛɛ gbo hiɔmi nɛmi blɔ ɔ.

²⁴ Ke a ngɛ a tsui yee ɔ, kɛkɛ i muɔ hɛlii ha mɛ. Ke i tsɔ ye hɛ mi ha mɛ ja kɛkɛ a nɔ gbagba te.

²⁵ I kɛ mɛ hi si kaa a hɛ mi nyɛɛlɔ; nɔ́ tsuaa nɔ́ nɛ hia kaa a pee ɔ, i tsɔɔ mɛ. I kɛ mɛ hi si kaa matsɛ ngɛ e ta buli a kpɛti, aloo bua wolɔ ngɛ kɔmɔ yeli a kpɛti.