Hiob 28 - BAIBLO ALOO NGMAMI KLƆUKLƆU Ɔ

Nile yi jemi la

¹ Niinɛ, muɔhi ngɛ nɛ a tsuaa sika hiɔ ngɛ a mi. Sika tsu he tsumi hehi hu ngɛ.

² A tsuaa dade ngɛ zu mi, nɛ a sileɔ tɛ, nɛ a jeɔ akɔblee kɛ jeɔ mi.

³ Nihi suɔ kane ngɛ diblii mi, nɛ a kɛ hlaa tɛ kpakpahi ngɛ zugba a sisi hehi nɛ wo diblii kpii, kɛ hehi nɛ ngɛ gbeye.

⁴ Kɔ̃ mi hehi nɛ nimli be, hehi nɛ blɔ hiali nyɛɛ we ɔ, lejɛ ɔ sika tsuali ya tsuaa muɔ ngɛ. O maa na mɛ nɛ a kplaa si ngɛ kpahi a he, nɛ a ngɛ asɛkɛ wue kɛ ngɛ yae kɛ ngɛ bae.

⁵ Niye ní jeɔ zu mi, se zu ɔ sisi lɛɛ e pee kaa nɔ́ nɛ la sã.

⁶ Tɛhi nɛ ngɛ zu ɔ mi ɔ, safiro ngɛ mi. Bibliwi ɔmɛ hu, sika tsu sɔuu.

⁷ Blɔ nɛ yaa sika muɔ ɔmɛ a mi ɔ, kayo ko hɛngmɛ nɛ hyɛ; okpoku ko hu ti kɛ ya bi ngɛ lejɛ ɔ hyɛ.

⁸ Jata, loo lohwe awi yelɔ ko bi ngɛ jamɛ a blɔ ɔ nɔ.

⁹ Nimli adesahi tsuaa tɛ sahi nɛ a he wa, a hiaa yokuhi kɛ jeɔ a hi hehi.

¹⁰ Ke a ngɛ tɛ sa amɛ a mi kpɛe ɔ, a naa tɛhi nɛ a he jua wa.

¹¹ A tsuaa pa mi kɛ yaa pa a je he tɔɔ, nɛ níhi nɛ a kɛ laa ngɛ lejɛ ɔ, a ngɔɔ kɛ baa la hɛ mi.

¹² Se nile lɛɛ jije a maa na lɛ ngɛ? Juɛmi ɔ, jije e hii?

¹³ A nɛ nile ngɛ nimli a kpɛti. Nɔ ko nɔ ko li bɔ nɛ e he jua wa ha.

¹⁴ Muɔ voovoo ɔmɛ ke nile be a ngɔ; wo hu ja nɔuu lɛ e ngɛ dee.

¹⁵ Nile ɔ, a ngɔɛ sika tsu, loo sika hiɔ kɛ he we.

¹⁶ E he jua a, sika tsu, loo juetli kpakpa po sui nya.

¹⁷ E he jua wa pe sika tsu, e he jua wa pe sika tsu kplu, aloo ahuhuɛ kpakpa.

¹⁸ Nile he jua wa pe huazi, loo kɔli, loo adiagba.

¹⁹ Etiopia topasion tɛ, aloo sika tsu ngmingmiingmi kɛ nile sɔɛ.

²⁰ Lɛɛ jije a naa nile ngɛ mɔ? Jije ji juɛmi hi he?

²¹ A ngɔ kɛ laa nɔ́ tsuaa nɔ́ nɛ hɛ ngɛ. Lohwe pɛlitsɛmɛ ngɛ hiɔwe po, a li he nɛ nile ngɛ.

²² Gbenɔ kɛ hɛ mi kpatami po de ke, “Oo, e biɛ kɛkɛ lɛ wa nu kɛ wa tue.”

²³ He nɛ nile ngɛ, kɛ blɔ nɛ a maa gu kɛ ya na lɛ ɔ, Mawu pɛ lɛ le.

²⁴ Ejakaa lɛɛ e hɛngmɛ hyɛɛ nɔ́ kɛ yaa je mi nyagbe he ɔmɛ tɔɔ; e naa níhi tsuo nɛ ngɛ hiɔwe sisi.

²⁵ Benɛ Mawu susu kɔɔhiɔ jiimi, kɛ he nɛ wo ɔ yi ma bli kɛ ya su ɔ,

²⁶ benɛ Mawu to he nɛ hiɔmi maa nɛ ngɛ, kɛ he nɛ hiɔwe ma si kɛ ya be ngɛ ɔ,

²⁷ jamɛ a be ɔ mi nɛ e na nile, nɛ e wo nɔ ta. E hla mi fitsofitso, nɛ e to lɛ sisi.

²⁸ Mawu de nɔmlɔ ke, “Nyɔmtsɛ ɔ gbeye yemi ɔ, lɔ ɔ ji nile; yayami he jemi ɔ, lɔ ɔ ji juɛmi.”