Hiob 27 - BAIBLO ALOO NGMAMI KLƆUKLƆU Ɔ

Hiob

^1-2 I na Mawu Ope nɛ hɛ ngɛ ɔ, nɔ nɛ kua dami sane yemi ha mi, nɛ e ha nɛ i na amanehlu kikɛ nɛ ɔ,

³ kaa be abɔ nɛ i ngɛ wami mi, nɛ Mawu mumi ngɛ ye mi nɛ ɔ,

⁴ lakpa munyu be ye nya mi jee gblegbleegble; i kɛ ye lilɛ hu be nɔ ko sisie kɔkɔɔkɔ.

⁵ I be kplɛɛe kɔkɔɔkɔ kaa nɔ́ nɛ nyɛ ngɛ dee ɔ ngɛ mi; kɛ yaa si ye gbenɔ ligbi ɔ, nɔ́ nɛ i ngɛ dee kɛkɛ ji i yi fɔ.

⁶ Nɔ́ nɛ i ngɛ dee ke i pee we nɔ́ ko nɛ dɛ blɔ ɔ, jamɛ a munyu kake too ɔ i ngɛ tue; ye he nile bui mi fɔ ligbi ko ligbi ko.

⁷ Ye he nyɛlɔ ɔ, á gbla e tue kaa yiwutsotsɛ; nɔ nɛ teɔ si kɛ woɔ mi ɔ, á gbla e tue kaa yayami peelɔ.

⁸ Ke yayami peelɔ be su, nɛ Mawu ba ngɔ lɛ ɔ, mɛni hɛ kɛ nɔ fɔmi pa ngɛ ha lɛ?

⁹ Ke haomi ba e nɔ, nɛ e fa kue ha Mawu ɔ, anɛ Mawu maa nu e kue fami ɔ lo?

¹⁰ Anɛ e náá Ope ɔ he bua jɔmi lo? Anɛ e faa kue kɛ haa lɛ daa lo?

¹¹ Nyɛ ha nɛ ma tsɔɔ nyɛ bɔ nɛ Mawu kle ha; nɔ́ nɛ Mawu Ope ɔ to ke e maa pee ɔ, i be nyɛ ba laae ngɛ he.

¹² Se tse nyɛ nitsɛmɛ nyɛ na ní nɛ ɔmɛ momo kɛ nyɛ hɛngmɛ. Lɛɛ mɛni he je lɛ nyɛ tsuo nyɛ ngɛ munyuhi nɛ a he be se nami tue kikɛ nɛ ɔ mɔ?

Zofar

¹³ Bɔ nɛ Mawu gblaa yayami peelɔ tue ji nɛ ɔ nɛ. Hiɔwo nɛ yiwutsotsɛ naa kɛ jeɔ Ope ɔ dɛ mi ji nɛ ɔ nɛ.

¹⁴ E ma fɔ bimɛ babauu, se mɛ tsuo pɛpɛɛpɛ a ma gbo ngɛ ta mi; e bimɛ na we niye ní nɛ suu a nya gblegbleegble.

¹⁵ Nihi nɛ a he maa je mi ɔ, gbenɔ hiɔ maa gbe mɛ, nɛ a yalɔyi ɔmɛ be ya nyɛe ha mɛ.

¹⁶ Yayami peelɔ ma bua sika hiɔ babauu nya kaa bunyuku nɛ be hie kanemi; e ma bua he hami níhi babauu nya kaa tabo zu.

¹⁷ Se nɔmlɔ kpakpa ko lɛ ma ba ha bo ɔmɛ; nɔ kpakpa ko lɛ ma ba wo tade ɔmɛ, nɛ e maa ngɔ sika hiɔ ɔ.

¹⁸ Yayami peelɔ we nɛ e po ɔ ngɛ kaa anani ya, aloo tsu wayoo nɛ bulɔ pee.

¹⁹ E ma ya hwɔ si kaa niatsɛ; se ke e te si ɔ, e maa na kaa e sika a tsuo ta.

²⁰ Sawale maa nu lɛ kaa pa nɛ hia kɛ bee. Kɔɔhiɔ nɛ nya wa maa fia lɛ kɛ ho nyɔ mi.

²¹ Beleku kɔɔhiɔ maa fia lɛ kɛ ho; e maa bɛɛ lɛ kɛ je he nɛ e hii ɔ.

²² Mawu ma ha nɛ beleku kɔɔhiɔ maa fia lɛ wawɛɛ nitsɛ; nɛ e be lɛ mɔbɔ nae kulaa, be mi nɛ e ngɛ mɔde bɔe kaa e maa tu fo kɛ je nya.

²³ Kɔɔhiɔ nɛ nya wa nɛ ɔ ma kpa fiifii kɛ nyɛɛ e se kɛ fo kɛ wo e he gbeye. E maa pee lɛ kaa nihi lɛ a ngɛ a dɛ fiae kɛ ngɛ lɛ fiee kɛ je he nɛ e hii ɔ.