Hiob 26 - BAIBLO ALOO NGMAMI KLƆUKLƆU Ɔ

Hiob

^1-2 Balɔ kpakpa! Mo lɛ o piɛ ye he. Imi nɛ i gbɔjɔ! Imi nɛ ye he wami ta!

³ Imi kuasia nɛ i li nɔ́ ko nɔ́ ko ɔ, o wo mi ga, nɛ o tu nile munyu kpakpahi kɛ tsɔɔ mi!

⁴ Mɛnɔ lɛ piɛ o he nɛ o kɛ tu munyu nɛ ɔmɛ? Mɛnɔ mumi lɛ je o mi ɔ?

Bildad

⁵ Kpade ɔmɛ a he mi ngɛ mɛ hiae ngɛ zu mi ngɛ nyu ɔ sisi.

⁶ Gbeje fɔɔ si paa ngɛ Mawu hɛ mi. He hami nɔ́ be he nɛ maa tsi lɛ blɔ.

⁷ Mawu gbla omleyi je hiɔwe ɔ mi, nɛ e ngɔ je ɔ ngɔ kpla si nɛ nɔ́ ko hɛɛ we lɛ.

⁸ Mawu lɛ e kɛ nyu woɔ bɔku kpii ɔmɛ a mi; lɛ nɛ e fii bɔku ɔmɛ a nya, nɛ e ha we nɛ a pɛ́.

⁹ Mawu lɛ e ngɔɔ nyɔhiɔ kɛ laa ngɛ bɔku ɔmɛ a se.

¹⁰ E po huzu ngɛ wo hɛ mi kɛ gba piani kɛ nyɔ a kpɛti.

¹¹ Ke e kuɛ́ ɔ, titimahi nɛ hɛɛ hiɔwe ɔ hosoɔ, nɛ a he wami taa.

¹² E kɛ e he wami jɔɔ wo ɔ he, nɛ e kɛ juɛmi kpata wo mi lohwe ɔ nɛ a tsɛɛ Rahab ɔ hɛ mi.

¹³ E mumi ɔ lɛ ha nɛ hiɔwe tsɔ, nɛ e pee saminyayoo. E nine lɛ e kɛ tsɔtslɔɔ wo mi lohwe ngua a mi.

¹⁴ Mawu blɔ ɔmɛ a he níhi bɔɔ kɛkɛ nɛ́ wa nu kɛ wa tue ji nɛ ɔmɛ nɛ. E he wami kpetekpleenyɛ nitsɛnitsɛ ɔ lɛɛ mɛnɔ ma nyɛ maa le?