Hiob 24 - BAIBLO ALOO NGMAMI KLƆUKLƆU Ɔ

¹ Mɛni he je lɛ Ope ɔ to we be nɛ a kɛ maa kojo nihi? Mɛni he je lɛ e ngɔ be ɔ kɛ laa nihi nɛ sɔmɔɔ lɛ po?

² Nihi hiaa ni komɛ a bunahi kɛ yaa se, konɛ mɛɛ a zugba a nɛ e kle. A juɔ nihi a tohi nɛ a lɛɛ.

³ A kpɔɔ awusahi a tejihi ngɛ a dɛ, nɛ yalɔyihi lɛɛ a ngɔɔ a na amɛ kɛ toɔ awaba.

⁴ A fieɔ ohiatsɛmɛ kɛ jeɔ a blɔ nɔ, nɛ ohiatsɛmɛ ɔmɛ ya buaa a he nya nɛ a laa a he.

⁵ Enɛ ɔ he je ɔ, ohiatsɛmɛ ɔmɛ ya hlaa niye ní ngɛ nga kplanaa a nɔ kɛ haa a bimɛ, kaa bɔ nɛ nga mi tejihi ya nuɔ lohwe ngɛ pu mi ba haa a bimɛ ɔ.

⁶ Ke nihi kpa ní ta a, ohiatsɛmɛ ya kukuɔɔ bibliwi ngɛ wai ngmɔ ɔmɛ a nɔ. A ya kukuɔɔ wai yiblii ngɛ yiwutsotsɛmɛ po a wai ngmɔhi a nɔ.

⁷ Nyɔ ɔ mi tsuo a hwɔɔ si kɛ a he gu nɛ bo be a he; fĩɛ be hu nɔ́ ko be nɛ a kɛ maa ha a he.

⁸ Hiɔmi nɛɛ mɛ ngɛ yo ɔmɛ a nɔ, nɛ a pɔɔ kpanyaa. Akɛnɛ a be hi he ko he je ɔ, a hɔɔ tɛ sahi a kpɛ.

⁹ Nimli yayami komɛ kpɔɔ bimwɔwi nɛ be tsɛmɛ pani nya ngɛ a nyɛmɛ a nyɔ nya. A kɛ bimwɔwi nɛ ɔmɛ toɔ a tsɛmɛ ɔmɛ a hiɔhi a nya.

¹⁰ Nimli nɛ ɔmɛ haa nɛ ohiatsɛmɛ ɔmɛ hɛɛɔ a he gu nɛ bo be a he; a haa nɛ a kɛ mi mi hwɔ tsuɔ ní ngɛ ngmɔ nɔ.

¹¹ A naa nu kɛ jeɔ oliv tso mi, nɛ a ngaa wai kɛ jeɔ wai yiblii mi. Se mɛ nitsɛmɛ lɛɛ kuma yeɔ mɛ.

¹² O maa nu nɛ nihi ngɛ kɛmɛe ngɛ ma a mi; o maa nu nɛ nihi nɛ plaa a ngɛ ngmlaa kpae, nɛ a ngɛ yemi kɛ buami hlae. Se Mawu bui mɛ tue fɛɛ.

¹³ Nimli yayamihi ji ni nɛmɛ nɛ kua la a nɛ; a nui la a sisi, nɛ he nɛ la a ngɛ kpɛe ngɛ hu, a be lejɛ ɔ.

¹⁴ Awi yelɔ teɔ si mɔtu kpla konɛ e gbe ohiatsɛ, aloo nɔ nɛ be nɔ́ ko. Nyɔ mi kɛkɛ e pee e he julɔ.

¹⁵ Gba puɛlɔ hu hii mlɛe konɛ du nɛ bu. E deɔ e he ke, “Nɔ ko be mi nae,” kɛkɛ e ngɔ nɔ́ kɛ ha e hɛ mi.

¹⁶ Ke diblii wo ɔ, juli ya sɛɛ nihi a wehi a mi ya juɔ. Piani lɛɛ a laa a he, nɛ a sume nɛ a baa la hɛ mi.

¹⁷ Ejakaa a yeɔ piani la a gbeye; diblii kpii ɔ mohu wui a he gbeye.

Zofar

¹⁸ Yiwutsotsɛ ɔ, pa nɛ hia ba ngɔɔ lɛ kɛ yaa. A gbiɛ e weto ní nɛ ji e zugba a, nɛ e be ní tsue ngɛ e wai ngmɔ ɔ mi hu.

¹⁹ Gbeje ngɔɔ yayami peelɔ kɛ yaa kaa bɔ nɛ sapu kɛ latsa miiɔ nyu ɔ.

²⁰ E nyɛ po hɛ maa je e nɔ. Gɔgɔ maa ye lɛ, nɛ e hɛ mi ma kpata kaa tso nɛ ku pue si. Nɛ nɔ ko nɔ ko be lɛ kaie hu.

²¹ Nɔ́ nɛ ɔ maa ba e nɔ, ejakaa e wa yosahi yi mi; yalɔyihi hu e nɛ́ mɛ mɔbɔ.

²² Se kɛ̃ ɔ, Mawu kɛ e he wami haa nɛ nɔmlɔ nɛ he wa a yaa nɔ. E tee si be mi nɛ e hɛ be wami ko nɔ hu.

²³ Mawu ma ha nɛ e maa hi si ngɛ tue mi jɔmi mi, se daa nɛ ɔ, e hɛngmɛ ngɛ e he.

²⁴ Yayami peelɔ yaa nɔ nɛ e plɔkeɔ; se be bɔɔ se ɔ, e be hu. E hɛ mi kpataa kaa bɔ nɛ nimlihi tsuo a hɛ mi kpataa a, nɛ e peeɔ kaa blɛfo tso nɛ a po.

²⁵ Ke ní nɛ ɔmɛ be mi ɔ, mɛnɔ ma nyɛ maa tsɔɔ kaa i ngɛ lakpa yee? Anɛ nɔ ko ma nyɛ maa tsɔɔ kaa munyu gu lɛ i ngɛ tue ɔ lo?