Hiob 23 - BAIBLO ALOO NGMAMI KLƆUKLƆU Ɔ

Hiob

^1-2 Mwɔnɛ ɔ hu i kɛ Mawu na ekohu; i ngɛ kɛmɛe, se e ngɛ ye tue gblae kɛ mwɔɔ.

³ I na nɛ i le he nɛ ma na lɛ ngɛ; i na nɛ i le bɔ nɛ ma pee kɛ ya lejɛ ɔ.

⁴ Jinɛ ma ngɔ ye sane ɔ kɛ ya fɔ e hɛ mi, nɛ ma je ye nya bɔ nɛ ma nyɛ.

⁵ Ma suɔ nɛ ma le nɔ́ nɛ e ma de, kɛ bɔ nɛ e ma ha mi heto ha.

⁶ Anɛ Mawu kɛ mi maa to ní ngɛ e he wami kpetekpleenyɛ ɔ nya lo? Dɛbi, e maa bu mi tue kɛ̃.

⁷ Anɔkualetsɛ ji mi; i kɛ Mawu ma hla níhi a nya; nyagbe ɔ, e maa wo mi nguɔ kɛ̃.

⁸ I hla Mawu ngɛ beleku je, se e be lejɛ ɔ; i ba bonyoku je hu, i nɛ lɛ.

⁹ I hla lɛ ngɛ omleyi je, se i nɛ lɛ; i kpale kɛ ba leneyi je hu, i nɛ lɛ ja nɔuu.

¹⁰ Se Mawu le blɔ nɛ i nyɛɛɔ nɔ ɔ; ke e ka mi ɔ, e maa na kaa ye he tsɔ kaa sika tsu.

¹¹ Mawu blɔ ɔ, lɔ ɔ nɔ i nyɛɛɔ daa nɛ; i gba we kɛ yɛ muɔ nɔ, loo hiɔ nɔ.

¹² Nɔ́ nɛ Mawu fa mi ke ma pee ɔ, lɔ ɔ i peeɔ. I pee we imi nitsɛ ye suɔmi nya ní; Mawu suɔmi nya ní lɛ i peeɔ.

¹³ Mawu ɔ, bɔ nɛ e ngɛ ɔ, jã kɛ̃ e ngɛ; e tsakee we. Nɔ́ nɛ e suɔ ɔ, lɔ ɔ e peeɔ. Mɛnɔ ma nyɛ ma tsake e yi mi tomi?

¹⁴ Nɔ́ nɛ e to ha mi ɔ, lɔ ɔ e ngɛ pee ɔ nɛ; níhi kaa kikɛ nɛ ɔ babauu hu ngɛ e yi mi.

¹⁵ Ke i susu ní nɛ ɔmɛ a he ɔ, i yeɔ Mawu gbeye, nɛ ye he doɔ blibliibli ngɛ e hɛ mi.

¹⁶ Mawu ha nɛ ye nine mi jɔ̃; Ope ɔ wo ye he gbeye.

¹⁷ Ejakaa diblii bɔle mi kɛ kpe; diblii kpii ha ye hɛ mi.