Hiob 22 - BAIBLO ALOO NGMAMI KLƆUKLƆU Ɔ

Ní sɛɛmi etɛne Elifaz

^1-2 Anɛ nɔmlɔ adesa ko he ngɛ se nami ha Mawu lo? Ní lelɔ ɔ, lɛ nitsɛ e nile ɔ he se lɛ e naa.

³ Ke o peeɔ nɔ́ nɛ da a, anɛ Ope ɔ naa bua jɔmi ko ngɛ lɔ ɔ he lo? Ke sé ko be o he ɔ, anɛ Mawu naa nɔ́ ko ngɛ mi lo?

⁴ O susu kaa Mawu gbeye nɛ o yeɔ ɔ, lɔ ɔ he lɛ e ngɛ o hɛ mi kae, nɛ e ngɛ o tue gblae ɔ lo?

⁵ Dɛbi, a ngɛ o tue gblae, ejakaa o he yayami ɔmɛ hiɛ tsɔ; o he yayami ɔ, a li nya.

⁶ Ke o nyɛmi hɛɛ mo hiɔ nɛ e nyɛ we nɛ e wo mo ɔ, o kpaa bo ngɛ e he, nɛ o haa nɛ e hɛɛɔ e he gu.

⁷ Nihi nɛ pɔ tɔ mɛ ɔ, o ha we mɛ nyu nɛ a nu; ni nɛmɛ nɛ hwɔ ngɛ mɛ yee ɔ, o ha we mɛ ní nɛ a ye.

⁸ Pohu o ngɔ o he wami, kɛ bu nɛ a buu mo ɔ kɛ kpɔ zugba a tsuo.

⁹ O fieɔ yalɔyihi kɛ jeɔ o ngɔ kɛ a dɛ mi gu, nɛ awusahi hu o waa mɛ yi mi.

¹⁰ Enɛ ɔ he je ɔ, a tsɔ mo klama kɛ bɔle si, nɛ amlɔ nɛ ɔ, sawale nu mo.

¹¹ Diblii kpii wo mo, nɛ o hyɛ we nɔ́ hu; nyu kpekpemi bɔle mo kɛ kpe.

¹² Niinɛ, Mawu ngɛ hiɔwe lokoo! Se dodoehi nɛ ngɛ hiɔwe lokoo ɔ, anɛ Mawu lɛɛ e hyɛ we mɛ kaa nɔ́ nɛ zugba lɛ a ngɛ lo?

¹³ Se kɛ̃ ɔ, o biɔ ke, “Mawu ɔ, mɛni e le? Nɔ nɛ bɔku kpii ha e hɛ mi ɔ, kɛ e maa pee kɛ kojo wɔ kɛɛ?”

¹⁴ O susuɔ kaa ke Mawu ngɛ nyɛɛe ngɛ je ɔ, kɛ hiɔwe a kpe he ɔ, e hyɛ we nɔ́ ngɛ bɔku kpii ɔ mi lo?

¹⁵ Blɔ nɛ yiwutsotsɛmɛ nyɛɛɔ nɔ ɔ, o maa nyɛɛ jamɛ a blɔ ɔ nɔ kɛ mwɔɔ lo?

¹⁶ Loko jamɛatsɛmɛ ɔmɛ a be maa su ɔ, pa nɛ hia kɛ bee ba sa mɛ kɛ a sipoku tsuo kɛ ho momo.

¹⁷ Nimli nɛ ɔmɛ ji nihi nɛ kua Mawu, nɛ a biɔ a he ke, “Mɛni Ope ɔ ma nyɛ maa pee wɔ?”

¹⁸ Se Mawu ɔ nɔuu lɛ haa a wehi hyi ɔ kɛ ní kpakpahi. Anɔkuale mi ɔ, yiwutsotsɛmɛ a yi mi tomi ɔ, imi lɛɛ i sume saasaa!

¹⁹ Ke a ngɛ yiwutsotsɛmɛ a tue gblae ɔ, nimli kpakpahi a bua jɔɔ, nɛ ni nɛmɛ nɛ pee we yayami ko ɔ yeɔ a he fɛu.

²⁰ Yiwutsotsɛmɛ a níhi tsuo pɛpɛɛpɛ a hɛ mi kpataa, nɛ nɔ́ nɛ piɛ ɔ, la ba sãã.

²¹ Lɔ ɔ he ɔ, Hiob, yaa nɛ o kɛ Mawu ya pee kake nɛ o na tue mi jɔmi. Blɔ nɔ nɛ o maa gu nɛ e maa hi ha mo ji nɛ ɔ nɛ.

²² Moo kplɛɛ nɛ Mawu nɛ tsɔɔ mo ní, nɛ o ngɔ e munyu ɔmɛ kɛ to o tsui mi.

²³ Ee, ba o he si nɛ o kpale kɛ ya Mawu ngɔ. Yayamihi tsuo nɛ a peeɔ ngɛ o we ɔ mi ɔ, a kpa peemi.

²⁴ Mo sake o sika tsu ngɔ fɔ he; o sika tsu kpakpa a, hɛɛ ngɔ pue pa mi, ngɛ tɛhi a kpɛ.

²⁵ Ha nɛ Mawu Ope ɔ nɛ pee o sika tsu; ha nɛ e pee o sika hiɔ kpakpa.

²⁶ Ngɔɔ o hɛ kɛ fɔ Mawu Ope ɔ nɔ daa, nɛ o maa na kaa e ma ha mo bua jɔmi.

²⁷ Ke o fa kue ha lɛ ɔ, e ma he nɔ, nɛ o maa ye o siwo ɔ nɔ.

²⁸ Nɔ́ tsuaa nɔ́ nɛ o to o yi mi ke o maa pee ɔ, e maa ba mi ja pɛpɛɛpɛ ha mo, nɛ la ma kpɛ ngɛ o blɔ mi.

²⁹ Nɔ nɛ woɔ e he nɔ ɔ, Mawu baa lɛ si, se nɔ nɛ baa e he si ɔ, Mawu heɔ e yi wami.

³⁰ Nihi nɛ pee we yayami ko ɔ, Mawu heɔ a yi wami. Mo hu ke o he tsɔ ɔ, Mawu ma he o yi wami ja nɔuu.