Hiob 21 - BAIBLO ALOO NGMAMI KLƆUKLƆU Ɔ

Hiob

^1-2 Nyɛɛ bu nɔ́ nɛ ma de nɛ ɔ tue saminya; ke nyɛ pee ja a, e ngɛ kaa nɔ́ nɛ nyɛ ba jɔɔ ye bua.

³ Nyɛɛ ngmɛ mi blɔ nɛ imi hu ma tu munyu; ke i de nɔ́ nɛ ma de ɔ ta a, nyɛ ma nyɛ maa ye ye he fɛu faa.

⁴ Imi ɔ, tsa pi nɔmlɔ adesa nɛ i kɛ na; i kɛ Mawu lɛ na. Mɛni he je e sɛ kaa ye susuma haoɔ mɔ?

⁵ Nyɛɛ hyɛ mi ha! Anɛ bɔ nɛ i ngɛ nɛ ɔ ha we nɛ nyɛ he mi nɛ po, nɛ nyɛɛ pee dii lo?

⁶ Nɔ́ nɛ ba ye nɔ nɛ ɔ, ke i susu he ɔ, ye he mi poɔ, nɛ ye nɔmlɔ tso ɔ doɔ blibliibli.

⁷ Mɛni he je yayami peeli a se kɛɔ ngɛ je mi? Mɛni he je a peeɔ nimli nguahi, nɛ a bwɔɔ kotokoto loko a gboɔ ɔ?

⁸ A hii je mi kɛ ya siɔ a bimɛ, kɛ a bibimɛ waa ba naa mɛ.

⁹ Mawu ngɔɛ haomi ko kɛ bɛ a wehi a mi; nɔ́ ko nɔ́ ko wui a he gbeye.

¹⁰ Niinɛ, a na ku ɔmɛ, kɛ na yi ɔmɛ naa bɔmi pɛpɛɛpɛ, nɛ na yi ɔmɛ fɔɔ nɛ nɔ́ ko pee we mɛ.

¹¹ A bi tsɔwitsɔwihi jeɔ kpo babauu nɛ a hii hlue kaa to bihi.

¹² A fiɛɔ do, a fiaa saku, nɛ a laa kɛ toɔ he; nɛ a naa bua jɔmi bɔ nɛ sa.

¹³ A yeɔ a be ɔ ngɛ kplɔkɔtɔ mi, nɛ a gboɔ ngɛ tue mi jɔmi mi.

¹⁴ Yayami peeli deɔ Mawu ke e je a nɔ, ejakaa a hla we e blɔ ɔmɛ nɛ a le.

¹⁵ A biɔ ke, “Mɛnɔ ji Ope ɔ nɛ saa kaa wa sɔmɔɔ lɛ ɔ? Ke wa fa kue ha lɛ ɔ, mɛni se wa ma na?”

¹⁶ A deɔ ke, “Tsa pi nɔ ko nɛ wo wɔ ní; wɔ nitsɛmɛ lɛ wa tsu nɛ wa na.” Se a susumi nɛ ɔ, imi i ngɔɛ.

¹⁷ Anɛ yayami peelɔ ko kane gbo hyɛ lo? Anɛ haomi ba a ti nɔ ko nɔ hyɛ lo? Anɛ Mawu kɛ abofu gbla yayami peelɔ ko tue hyɛ lo?

¹⁸ Anɛ Mawu muɔ yayami peeli kɛ ho hyɛ kaa bɔ nɛ kɔɔhiɔ muɔɔ bunyuku, aloo bɔ nɛ ahumi muɔɔ tsakati kɛ yaa a lo?

¹⁹ Nyɛ deɔ ke Mawu gblaa bimɛ a tue ngɛ a tsɛmɛ a he yayamihi a he. Dɛbi! Ha nɛ Mawu ɔ nɛ gbla yayami peeli ɔmɛ nitsɛmɛ a tue, konɛ a na kaa a he yayami ɔmɛ a he lɛ a ngɛ a tue gblae ɔ nɛ.

²⁰ Ha nɛ yayami peeli ɔmɛ nitsɛmɛ nɛ a ná a tue gblami ɔ. Ha nɛ Mawu Ope ɔ we abofu ɔ nɛ kple mɛ nitsɛmɛ a nɔ.

²¹ Ke nɔ ko gbo ɔ, anɛ e pa susuɔ bimɛ nɛ e si ngɛ se ɔ a he lo?

²² Mawu nɛ tsɔɔ nimli nguahi po nile ɔ, anɛ nɔ ko ma nyɛ maa kojo lɛ lo?

^23-24 Ni komɛ hii nɔmlɔ tso he wami hluu kɛ ya siɔ a gbenɔ be. A plɔkeɔ nɛ a peeɔ tɔfutɔfu, nɛ a gboɔ kɛ bua jɔmi ngɛ tue mi jɔmi mi.

²⁵ Ni komɛ hu gboɔ kɛ aywilɛho nɛ a na we bua jɔmi ko hyɛ.

²⁶ Nimli nɛ ɔmɛ tsuo gboɔ, nɛ a puɔ mɛ ngɛ zu mi, nɛ gɔgɔ ba haa mɛ tsuo a nɔ.

²⁷ Hyɛ, i le nyɛ juɛmi ɔmɛ! Ga nɛ nyɛ to nɛ nyɛɛ kɛ maa wa mi yi mi ɔ, i le.

²⁸ Nyɛ biɔ ke, “Jehanɛ lɛɛ jije ganɔ ɔ we ɔ ngɛ? Jije yiwutsotsɛmɛ ɔmɛ a sihi he ɔmɛ ngɛ?”

²⁹ Anɛ nyɛɛ kɛ blɔ hiali sɛɛ we ní lo? Níhi nɛ a ba deɔ nyɛ ɔ, nyɛ ngɔɛ lo?

³⁰ Anɛ nyɛ li kaa ke amanehlu ba a, yiwutsotsɛmɛ lɛɛ a jeɔ mɛ kɛ jeɔ mi, nɛ a yeɔ a he lo?

³¹ Mɛnɔ lɛ ma ka yiwutsotsɛ hɛ mi? Níhi nɛ e peeɔ ɔ, mɛnɔ lɛ maa pee lɛ kɛ to nane mi?

³² Benɛ a hɛɛ lɛ kɛ yaa gɔ ɔ mi ɔ, jamɛ a be ɔ, nihi daa si nɛ a ngɛ e yɔkɔ ɔ he bue.

³³ Nimli babauu nyɛɛɔ e hɛ mi, nɛ babauu hu nyɛɛɔ e se; tabo zu ɔ po peeɔ huyɛhuyɛ ngɛ e nɔ.

³⁴ Nɛ nyɛɛ lɛɛ nyɛɛ kɛ munyu gu ba ngɛ ye bua jɔɔe! Hetohi nɛ nyɛ ha mi ɔ, lakpa sɔuu; anɔkuale kake ngmelu be mi.