Hiob 20 - BAIBLO ALOO NGMAMI KLƆUKLƆU Ɔ

Zofar

^1-2 Hiob, o ha nɛ ye yi mi pee basaa, enɛ ɔ he je ɔ, ma ha mo heto nɔuu.

³ Jɛmi munyuhi lɛ o tu ɔ nɛ, se mumi ɔ tsɔɔ mi bɔ nɛ ma ha mo heto ha.

⁴ I heɔ yeɔ kaa o le nɔ́ nɛ ɔ, kaa kɛ je blema lokoo nɛ a bɔ nɔmlɔ kɛ wo je ɔ mi ɔ,

⁵ yiwutsotsɛ hɛ mi nyami ɔ, e se kɛ we; nɛ nɔmlɔ nɛ li Mawu ɔ, e bua jɔmi peeɔ kuku kɛkɛ.

⁶ Ke e nɔ kuɔ kɛ ya su hiɔwe, nɛ e yi ya pi bɔku po,

⁷ e hɛ mi ma kpata kɛ maa ya neneene kaa lɛ nitsɛ e fĩ. Nihi nɛ le lɛ ɔ ma bi ke, “Jije e ngɛ?”

⁸ E maa laa kaa nlami, aloo nina nɛ a na nyɔ mi; nɛ nɔ ko be lɛ nae hu.

⁹ Nɔ ko nɔ ko be lɛ nae hu; e sihi he ɔ maa fɔ si gu.

¹⁰ Níhi nɛ e ju ngɛ ohiatsɛmɛ a dɛ ɔ, e bimɛ maa kpale kɛ ha mɛ ekohu.

¹¹ Nɔmlɔ tso kɛ e he nihe nyu tsuaa a ma plɛ pee zu.

^12-13 Yayami ngɔɔ e nya. E ngɛ kaa dɔkɔdɔkɔ nɔ́ ko nɛ e ngɔ kɛ laa ngɛ e lilɛ kuɔ si. E hii he gbugbɔe, nɛ e sume kaa e ma je ngɛ e nya mi.

¹⁴ Se niye ní nɛ ɔ plɛɔ peeɔ sinɔ duɔ nɛ nya wa ngɛ e mi mi.

¹⁵ Ní kpakpahi nɛ yayami peelɔ mi ɔ, e vieɔ kɛ pueɔ si ekohu. Mawu nitsɛ jeɔ ní ɔmɛ kɛ jeɔ e mi mi.

¹⁶ Nɔ́ nɛ yayami peelɔ gbugbɔ ɔ ngɛ kaa sinɔ duɔ; e maa gbe lɛ kaa nɔ́ nɛ sinɔ duɔtsɛ nɛ kɔ lɛ.

¹⁷ E be je mi hie nɛ́ e maa na nyɔ nyu, kɛ hwo nɛ ngɛ bee kaa paa.

¹⁸ Nɔ́ tsuaa nɔ́ nɛ e gbo he dengme nɛ e na a maa je e dɛ, nɛ e be e mi ngɔɔmi ko yee. E be bua jɔmi ko nae kɛ je e ní nɛ e na a mi.

¹⁹ Ejakaa e wa ohiatsɛmɛ yi mi, nɛ e kua mɛ; wehi nɛ nihi ma a, e kpɔ ngɛ a dɛ pani nya.

²⁰ Akɛnɛ e li tɔ biɛ he je ɔ, nɔ́ tsuaa nɔ́ nɛ e na a, e yeɔ tsuatsuaatsua.

²¹ Ke e ye ní ɔ, eko kulaa píɛ ngɛ se. Enɛ ɔ he je ɔ, ní nami ɔ se maa po.

²² Be mi nɛ e na e he ɔ, jamɛ a be ɔ, haomi nɛ nya wa maa ba e nɔ tlukaa.

²³ Mawu ma ha e mi mi la nɛ nya wa a ma kple e nɔ kaa niye ní nɛ e ye nɛ e tɔ.

²⁴ Ke e ka kaa e maa tu fo kɛ je dade nya a, a ma tsɛ̃ lɛ akɔblee kɛ̃ɛ̃ kɛ fɔ si.

²⁵ A maa gbla kɛ̃ɛ̃ mi bi kɛ je e nɔmlɔ tso mi. Muɔ maa dɛ kɛ je kɛ̃ɛ̃ mi bi ɔ nya piɔpiɔ nɛ ngɛ kpɛe ɔ he kɛ pue si, nɛ gbeye maa nu lɛ.

²⁶ E juetli tsuo hɛ mi ma kpata. La, nɛ pi nɔmlɔ nɛ slɛ maa sã lɛ, nɛ e we mi nɔ́ tsuaa nɔ́ hɛ mi ma kpata.

²⁷ Hiɔwe ma je nyumu nɛ ɔ yayami ɔ kpo, nɛ zugba maa ye odase kɛ si lɛ.

²⁸ Ligbi ɔ nɛ Mawu mi mi ma fu ɔ, a ma kpata nɔmlɔ nɛ ɔ weto ní tsuo hɛ mi kaa bɔ nɛ pa muɔɔ níhi kɛ yaa a.

²⁹ Enɛ ɔ ji yayami peelɔ blɔ fa mi nɔ́; gbosi ní nɛ Mawu to kɛ ha yayami peelɔ ji nɛ ɔ nɛ.