Hiob 2 - BAIBLO ALOO NGMAMI KLƆUKLƆU Ɔ

Satan ba ka Hiob ekohu

¹ Ligbi ko benɛ Mawu bimɛ ɔmɛ ba bua a he nya ekohu ngɛ Yawɛ hɛ mi ɔ, Satan piɛ a he kɛ ba.

² Yawɛ bi Satan ke, “Jije o je?” Satan he nɔ ke, “I ya kpa je ɔ mi tsuo kɛ ya kɛ ba.”

³ Yawɛ bi lɛ ke, “Anɛ o to ye tsɔlɔ Hiob he hɛ kaa nɔ ko be je ɔ mi nɛ da, nɛ yeɔ anɔkuale kɛ lɛ sɔ lo? E jaa mi, nɛ e pee we nɔ́ nɛ dɛ blɔ kɔkɔɔkɔ. O ba nyɛ ye nɔ ke ma ha mo blɔ nɛ o ya hao lɛ, be mi nɛ e pee we yayami ko kulaa. Se kɛ ba si piɔ ɔ, Hiob ngɛ anɔkuale yee kɛ mwɔɔ.”

⁴ Satan he nɔ ke, “Nɔ́ tsuaa nɔ́ nɛ ngɛ nɔ ko dɛ ɔ, e ma nyɛ ngɔ kɛ ha, ke e yi ma na wami kɛkɛ ɔ.

⁵ Moo lɛɛ moo ye e nɔmlɔ tso ɔ awi kaa e be mo gbiɛe ngɛ o hɛ mi lo!”

⁶ Yawɛ de Satan ke, “Saminya! E ngɛ o dɛ mi; e hɛ mi kɛkɛ nɛ o ko kpata.”

⁷ Kɛkɛ nɛ Satan si Yawɛ, nɛ e ya ha nɛ tslɔɔ fuu Hiob nɔmlɔ tso ɔ tsuo, kɛ je e nane sisi kɛ ya si e yi mi.

⁸ Hiob ho ya hi la zu mi, nɛ e ngɔ ngɛyu kɛ ngɛ e he hluae.

⁹ Jehanɛ, e yo ɔ de lɛ ke, “Tse o ngɛ anɔkuale ɔ yee kɛ mwɔɔ! Gbiɛ Mawu, nɛ o gbo!”

¹⁰ Hiob he nɔ ke, “O ngɛ munyu tue kaa bɔ nɛ yihi kuasia amɛ a ti nɔ ko maa tu munyu pɛ. Ke Mawu ha wɔ nɔ́ kpakpa a, tse wa heɔ. Lɛ ke e ha wɔ nɔ́ yaya a, wa ko ngɔ lo?” Enɛ ɔ tsuo mi ɔ, Hiob pee we yayami; e de we nɔ́ ko kɛ si we Mawu.

Hiob huɛmɛ ɔmɛ

¹¹ Amanehlu nɛ ba Hiob nɔ ɔ, e huɛmɛ etɛ komɛ nu he, nɛ a je he slɔɔtohi kɛ ba konɛ a ba ye lɛ kɔmɔ nɛ a wo lɛ bua. Huɛmɛ ɔmɛ ji Elifaz nɛ je Teman ma a mi, Bildad nɛ je Shua zugba a nɔ, kɛ Zofar nɛ je Naama zugba a nɔ.

¹² Benɛ a ma ngɛ tsitsaa a, a na Hiob, se a yo we lɛ. Benɛ a ba yo lɛ ɔ, a wo yana nɛ a nya awe. A kɛ aywilɛho hía tade ɔmɛ ngɛ a he, nɛ a fĩa bunyuku kɛ ho hiɔwe ya kɛ pue a yi mi.

¹³ Kɛkɛ nɛ a ba hi si ngɛ e kasa nya ngɛ zugba nyɔ kɛ pia ligbi kpaago sɔuu. Nɔ ko nɔ ko kɛ lɛ tu we munyu jamɛ a be ɔ tsuo, ejakaa a na kaa e ngɛ nɔ́ nae wawɛɛ nitsɛ.