Hiob 19 - BAIBLO ALOO NGMAMI KLƆUKLƆU Ɔ

Hiob

^1-2 Mɛni be nyɛ maa ngɔ munyuhi kɛ hao mi kɛ yaa si?

³ Kpamisa nɛ ɔ, jɛmi kɛkɛ nyɛ ngɛ mi jɛe. Anɛ e pee we nyɛ zo kaa nyɛ ngɛ mi nisɛ ní pee lo?

⁴ Ke e ngɛ mi tete po kaa i pee yayami ɔ, mɛni enɛ ɔ kɔɔ ngɛ nyɛ he?

⁵ Nyɛ woɔ nyɛ he nɔ, nɛ nyɛ susuɔ kaa nyɛ hi pe mi. Nyɛ deɔ ke ye yayami ɔmɛ a he hiɔ lɛ a ngɛ mi woe ɔ nɛ.

⁶ Se nyɛ li kaa Mawu lɛ pee nɔ́ nɛ ɔ lo? Lɛ nɛ tsɔ klama kɛ bɔle mi kɛ kpe.

⁷ Hyɛ, i kpaa ngmlaa nɛ i deɔ ke Mawu ngɛ mi awi yee, se nɔ ko nɔ ko he we nɔ. Ngmlaa nɛ i ngɛ kpae ke a ye dami sane ha mi ɔ, nɔ ko nɔ ko nui.

⁸ Mawu tsi mi blɔ nɛ i nyɛ we ma be; e ha nɛ diblii wo ngɛ ye blɔ nɔ.

⁹ E je ye hɛ mi nyami ɔ ngɛ ye he, nɛ e kpɔ ye jlasi ɔ ngɛ ye yi mi.

¹⁰ E kpata ye hɛ mi, nɛ e kɛ mi gbe nya pɛsɛpɛsɛ. I pee kaa tso nɛ a hia lɛ kɛ e sipoku tsuo; ye hɛ kɛ nɔ fɔmi ta.

¹¹ Mawu mi mi fu mi wawɛɛ nitsɛ, nɛ e buɔ mi e he nyɛlɔ.

¹² E ta buli babauu ba tua mi; a bɔle mi kɛ kpe, nɛ a sa ye yi kɛ wo ye sihi he ɔ.

¹³ Mawu ha nɛ ye nyɛmimɛ kua mi; i plɛ pee nubwɔ ngɛ nihi nɛ i le mɛ ɔ a kpɛti.

¹⁴ Ye weku li je ye he, nɛ ye huɛ kpakpahi a hɛ je ye nɔ.

¹⁵ Nibwɔhi nɛ ngɛ ye we mi ɔ, a hɛ je ye nɔ; i plɛ pee nubwɔ, loo ma se no ngɛ ye mawayihi a hɛ mi.

¹⁶ Ke i tsɛ ye tsɔlɔ ɔ, e he we nɔ; ke i kpa lɛ pɛɛ tete po, e bui.

¹⁷ Ye nya mi mumi jeɔ fu kɛ haa ye yo; imi nitsɛ ye nyɛ mi mi bimɛ bɛ ye kasa nya.

¹⁸ Jokuɛwi tete po hiee mi; ke a na mi pɛ, kɛkɛ a bɔni ye he munyu tumi.

¹⁹ Ye huɛmɛ kpakpahi tsuo ngɛ mi hiee; ni nɛmɛ nɛ i suɔ mɛ saminya po te si wo mi.

²⁰ I ta he lo nɛ i pee kanyakanya; i kɛ gbenɔ wa kpɛti kɛ we kulaa.

²¹ Nyɛɛ na mi mɔbɔ; ye huɛmɛ nyɛɛ na mi mɔbɔ, ejakaa Mawu nine sa ye he.

²² Mɛni he je nyɛ ngɛ mi yi mi wae kaa bɔ nɛ Mawu peeɔ mi ɔ? Bɔ nɛ nyɛ hao mi ɔ, e pi ha nyɛ lo?

²³ Níhi nɛ i ngɛ dee ɔ, i na nɛ nɔ ko kai nɛ e ngma kɛ wo womi mi!

²⁴ I ná nɛ a kɛ dade kpɛ́ ye munyu ɔmɛ ngɛ tɛ sa mi, nɛ a kɛ sumui wo mi, konɛ a hi lejɛ ɔ daa.

²⁵ Ejakaa i le kaa nɔ ko ngɛ hiɔwe nɛ nyagbenyagbe ɔ, e ma ba kpɔ mi.

²⁶ Ke ye he womi hɛ mi kpata kikɛ nɛ ɔ, nɛ he lo ko be ye he po, ma na Mawu.

²⁷ Imi nitsɛ na lɛ paa kɛ ye hɛngmɛ. Imi nitsɛnitsɛ, se pi nɔ kpa ko. Ye tsui ta!

²⁸ Benɛ nyɛ bi ke, “Kɛ wa maa pee kɛɛ kɛ wa lɛ yi mi?” ɔ, nyɛ hla nɔ ko nyɛ da nɔ, nɛ nyɛ ba tua mi.

²⁹ Nyɛ na nɛ nyɛɛ le kaa tue gblami fɔɔ si ha nyɛ. A maa gbla nyɛ tue ngɛ nyɛ he yayami ɔmɛ a he, konɛ nyɛɛ le kaa kojolɔ ko ngɛ.