Hiob 18 - BAIBLO ALOO NGMAMI KLƆUKLƆU Ɔ

Bildad

^1-2 Hiob, mɛni be lɛ o maa hi munyu tue kɛ yaa si? Ke o pee dii ɔ, waa kɛ mo maa tu munyu.

³ Mɛni he je a buɔ wɔ kaa lohwehi ɔ? Mɛni he je o susuɔ kaa wa be juɛmi ɔ?

⁴ Nɛ o ngɔ abofu kɛ ngɛ mo nitsɛ o he tsɔtslɔɔe ɔ nɛɛ! Ke o mi mi fu ɔ, enɛ ɔ tsɔɔ kaa nihi nɛ a je je ɔ mi lo? Aloo o ngɛ hlae nɛ a hia tɛ sahi kɛ je a blɔ hehi lo?

⁵ Ee, yayami peelɔ kane ɔ ma gbo, nɛ e la a be kpɛe hu gblegbleegble.

⁶ E kane ɔ ma gbo ngɛ e kasa nya, nɛ e bo tsu ɔ mi maa wo diblii.

⁷ Bɔ nɛ e hiaa nane kam, kam, kam be ko nɛ be ɔ, amlɔ nɛ ɔ lɛɛ e hii si tɛe; lɛ nitsɛ e yi mi tomi maa tsɛ̃ lɛ kɛ nɔ si.

⁸ Lɛ nitsɛ e maa ngɔ e nane kɛ ya du ya; lɛ nitsɛ e maa nyɛɛ kɛ ya nɔ muɔ mi.

⁹ E nane se ja ma ya sɛ klama mi, nɛ klama a maa nu lɛ.

¹⁰ A maa tsɔ̃ lɛ klama kɛ laa ngɛ zugba; a maa tsɔ̃ lɛ klama ngɛ e blɔ mi.

¹¹ Gbeye níhi maa bɔle lɛ kɛ kpe, nɛ daa nɛ ɔ, e maa hi fo nɔ kpla, kpla, kpla!

¹² Hwɔ maa ye lɛ hluu kɛ yaa si e he wami maa ta. Amanehlu maa tsɛ̃ lɛ kɛ fɔ si bum!

¹³ Hiɔ yaya maa ha e he womi tsuo nɔ, nɛ e kɔnihi, kɛ e nanehi maa sa ngɛ e he.

¹⁴ E bo tsu ɔ nɛ e ngɔ e hɛ ngɔ fɔ nɔ ɔ, a maa gbla lɛ kɛ je lejɛ ɔ kɛ ba he ko nɛ ngɛ gbeyegbeye.

¹⁵ Nɔ́ ko nɔ́ ko be piɛe ngɛ e sihi he ɔ. La nɛ ngɛ tsoe plamplam maa sã e bo tsu ɔ.

¹⁶ E sipoku ma gbli ngɛ e sisi, nɛ e kɔnihi maa ylɔ.

¹⁷ E biɛ maa laa ngɛ ma a mi, kɛ ma se tsuo, nɛ nɔ ko nɔ ko be lɛ kaie hu.

¹⁸ A maa fie lɛ kɛ je je ɔ mi, kɛ je la he kɛ ya diblii mi.

¹⁹ E be bi, loo nina ngɛ e ma mi bi ɔmɛ a kpɛti; he nɛ e hi be ko ɔ, e nina ko be lejɛ ɔ.

²⁰ Kɛ je beleku je kɛ yaa si bonyoku je ɔ; nihi nɛ maa nu e haomi ɔmɛ a he ɔ, mɛ tsuo pɛpɛɛpɛ a he mi maa po.

²¹ Yayami peelɔ, aloo nɔmlɔ nɛ li Mawu ɔ, nɔ́ nɛ maa ba e nɔ ji nɛ ɔ nɛ.