Hiob 17 - BAIBLO ALOO NGMAMI KLƆUKLƆU Ɔ

¹ Ye wami be ɔ ta; i nyɛ we nɛ i ngɛ mumi woe. Amlɔ nɛ ɔ lɛɛ nɔ́ nɛ ngɛ mi mlɛe ji yɔkɔ.

² He fɛu yeli bɔle mi kɛ kpe; niinɛ, i naa mɛ nɛ a hii ye he fɛu yee.

³ Mawu, anɔkualetsɛ ji mi; mo he mi nɛ o ye. Nɔ́ nɛ i ngɛ dee ɔ, nɔ kpa ko be nɛ ma fi se.

⁴ O ha nɛ nimli adesahi biɛ, nɛ a susuu we a yi mi; lɔ ɔ he ɔ, ko ha nɛ a ye ye nɔ.

⁵ Nimeli ke, “Nɔ nɛ tsɔɔ e huɛmɛ a se blɔ, nɛ e nine suu a weto ní nɔ ɔ, e bimɛ a hɛngmɛ ma yu.”

⁶ Mwɔnɛ ɔ, i plɛ pee abɛ bumi nɔ́ ha nihi, nɛ a laa lada kɛ pueɔ ye hɛ mi.

⁷ Aywilɛho sɔuu ha nɛ ye hɛngmɛ nɔ pee kɔu, nɛ ye kɔnihi, kɛ ye nanehi pee legelege kaa nini.

⁸ Ke dali na nɔ́ nɛ ɔ, a he mi jɔ̃ɔ̃, nɛ a tuɔ a hɛ mi kɛ woɔ nihi nɛ li Mawu.

⁹ Se bɔ tsuaa bɔ nɛ pee ɔ, dalɔ hii e blɔ nɔ kɛ̃. Nɔmlɔ nɛ yayami ko be e he ɔ, e naa he wami he ekohu.

¹⁰ Se nyɛɛ lɛɛ, i nɛ ní lelɔ kake ngmelu ngɛ nyɛ tsuo nyɛ kpɛti.

¹¹ Ye ligbi ɔmɛ ta; ye yi mi tomi ɔmɛ puɛ; ye hɛ kɛ nɔ fɔmi ɔ ta.

¹² Se ye huɛmɛ ɔmɛ ngɔɔ nyɔ kɛ peeɔ piani. La a nɛ a ngɛ dee ɔ hu ngɛ kaa diblii.

¹³ Ye hɛ nɔ kami kɛkɛ ji gbeje; lejɛ ɔ ji he nɛ ma hwɔ ngɛ diblii mi.

¹⁴ Ma tsɛ yɔkɔ ɔ ke tsaatsɛ; gɔgɔhi nɛ maa ye mi ɔ, ma tsɛ mɛ maa, kɛ ye nyɛmiyihi.

¹⁵ Jije hɛ nɔ kami pa ngɛ ha mi? Mɛnɔ lɛ maa na jamɛ a hɛ nɔ kami ɔ?

¹⁶ Anɛ hɛ nɔ kami kɛ mi maa ya gbeje lo? Anɛ e kɛ mi maa ya zu mi lo?