Hiob 15 - BAIBLO ALOO NGMAMI KLƆUKLƆU Ɔ

Ní sɛɛmi enyɔne Elifaz

^1-2 Ní lelɔ pee we nya puu! Ní lelɔ ha we sane heto kikɛ nɛ ɔ.

³ Ní lelɔ tu we munyu kaa bɔ nɛ o ngɛ munyu tue ɔ. Ní lelɔ fa we e he kɛ munyu nɛ he be se nami.

⁴ E je mo nɔ kake o he jinɛ nɔ ko nɔ ko be Mawu gbeye yee hu; jinɛ nɔ ko nɔ ko be kue fae ha lɛ hu.

⁵ Nɔ́ nɛ o ngɛ dee ɔ yeɔ o he yayami ɔmɛ a he odase; lakpa sɔuu lɛ o ngɛ yee ɔ nɛ.

⁶ Mo nitsɛ o nya mi munyu ngɛ mo fɔ bue; mo nitsɛ o lilɛ ngɛ odase yee kɛ ngɛ mo sie, se pi imi.

⁷ Mo ji kekleekle nɔmlɔ nɛ a fɔ lo? A fɔ mo loko Mawu pee yoku ɔmɛ lo?

⁸ O nu Mawu laami sanehi hyɛ lo? Mo pɛ ji ní lelɔ lo?

⁹ Mɛni o le nɛ wɔɔ lɛɛ wa li? Mɛni o kpa si nɛ wɔɔ lɛɛ wa juɛmi sui he?

¹⁰ Nihi nɛ a yi mi je mua, kɛ nikɔtɔmahi ngɛ wa kpɛti nɛ a wa kulaa pe o tsɛ.

¹¹ Bua jɔmi nɛ Mawu ha mo ɔ, e pi ha mo lo? Bɔ nɛ e kɛ mo tuɔ munyu blɛuu ɔ, lɔ ɔ sɛ́ o hɛ mi lo?

¹² Mɛni he je o mi mi fu kikɛ nɛ ɔ? Mɛni he je o hɛ dɔ kikɛ nɛ ɔ?

¹³ Mɛni he je o mi mi fu Mawu, nɛ o ha nɛ munyuhi kaa kikɛ nɛ ɔ je o nya mi?

¹⁴ Anɛ nɔmlɔ ko ngɛ nɛ e he tsɔ lo? Nɔmlɔ nɛ yo fɔ lɛ ɔ, anɛ dalɔ ji lɛ ngɛ Mawu hɛ mi lo?

¹⁵ Hyɛ, Mawu bɔfo klɔuklɔu ɔmɛ po e kɛ e hɛ fɔ we a nɔ; mɛ nitsɛmɛ tete po a he tsɔ we ngɛ e hɛ mi.

¹⁶ Nɛ mo, nɔmlɔ adesa nɛ o sa, nɛ se nami be o he ɔ! Mo nɛ o peeɔ yayami kaa bɔ nɛ a nuu nyu kumakuma a, kɛ maa pee kɛɛ nɛ moo o he ma tsɔ ngɛ Mawu hɛ mi?

¹⁷ Lɔ ɔ he ɔ, Hiob, bu tue nɛ ma sɛɛ mo nɔ́ nɛ i le. Ha ma tsɔɔ mo nɔ́ nɛ i kase kɛ je ní leli a ngɔ.

¹⁸ I kase anɔkuale nɛ ɔ kɛ je ní leli a ngɔ. Mɛ hu a kase kɛ je a tsɛmɛ a ngɔ; a laa we nɔ́ ko nɔ́ ko nɔ.

¹⁹ Mɛ pɛ lɛ a ngɔ zugba a ngɔ ha; nubwɔ ko nubwɔ ko be a kpɛti.

²⁰ Yiwutsotsɛ, nɔ nɛ waa nihi yi mi ɔ, e maa na nɔ́ e wami be ɔ tsuo.

²¹ E tue mi maa hi ngmlɛ fiae kɛ wo e he gbeye. Be mi nɛ e susu kaa e ngɛ he jɔmi mi ɔ, ojo fiali ma ba tua lɛ tlukaa.

²² Hɛ nɔ kami ko be ha lɛ kaa e maa tu fo kɛ je diblii ɔ mi; ejakaa klaate ji nɔ́ nɛ ngɛ lɛ mlɛe nɛ e gbe lɛ,

²³ nɛ okpokuhi hu ngɛ mlɛe nɛ a ye lɛ. Nɔmlɔ kaa kikɛ nɛ ɔ le kaa e hɛ mi kpatami be ɔ su ta.

²⁴ Fimi kɛ amanehlu woɔ e he gbeye. E le kaa ní nɛ ɔmɛ maa ba e nɔ tlukaa kaa matsɛ ngua ko nɛ mia kɛ ha ta.

²⁵ Nɔmlɔ nɛ teɔ si kɛ siɔ Ope ɔ, nɛ hiaa kɔ̃ kɛ woɔ Mawu he ɔ, nɔ́ nɛ maa ba e nɔ ji nɛ ɔ nɛ.

^26-27 Jamɛ a nɔmlɔ ɔ, he nɔ wolɔ, kɛ atuã tsɔlɔ ji lɛ; e kɛ he nɔ womi woɔ e tsɛ̃i nɔ, nɛ e he sɔɔ nɛ e kɛ Mawu ya hwu ta.

²⁸ Jamɛ a nɔmlɔ ɔ ya ngɔ mahi, kɛ wehi nɛ nɔtsɛmɛ tu fo kɛ je a mi. Se a de to kaa ta ma kpata jamɛ a ma amɛ, kɛ we ɔmɛ a hɛ mi.

²⁹ E ní nami ɔ se be kɛe; e nɔ́ tsuaa nɔ́ hɛ mi ma kpata. Lɛ nitsɛ e nini tete po maa laa,

³⁰ nɛ diblii maa wo lɛ. E maa pee kaa tso nɛ la sã e kɔnihi, nɛ kɔɔhiɔ muɔ e mɔmɔ ɔmɛ kɛ ho.

³¹ Ke e ya sisi e he, nɛ e ngɔ e hɛ ngɔ fɔ níhi nɛ a he be se nami a nɔ ɔ, e maa je mi dɛ gu.

³² Loko e nyagbe ɔ maa su ɔ, e ma na e hiɔwo sisiisi; e maa pee kaa tso nɛ ba mumu be e yi mi.

³³ E maa pee kaa wai tso nɛ e yi mi wai yiblii ngmlikiti kplɔ pue si, aloo oliv tso nɛ e mɔmɔhi kplɔ pue si.

³⁴ Nimli nɛ li Mawu ɔ, a be ngmɛdu woe. Wehi nɛ a he nyɔ mi ní nɛ a kɛ ma mɛ ɔ, la maa sã mɛ pue si.

³⁵ Nimli nɛ ɔmɛ ji ni nɛmɛ nɛ toɔ ga yaya, nɛ a peeɔ yayami; sisimi hyi a tsui mi tɔtɔɔtɔ.