Hiob 14 - BAIBLO ALOO NGMAMI KLƆUKLƆU Ɔ

¹ Nɔmlɔ adesa wami be ngɛ kpiti kɛkɛ, se e mi haomi hiɛ babauu.

² Nɔmlɔ waa esɔesɔ, nɛ e gboɔ tlukaa kaa bɔ nɛ mɔmɔ hu puɛɔ nɛ e nglaa a. E ngɛ kaa nini; bɔɔ kɛkɛ e laa nɛ a nɛ lɛ hu.

³ Anɛ o kɛ imi, nɔ kaa kikɛ nɛ ɔ maa ye sane lo?

⁴ Anɛ nɔmlɔ adesa ko ngɛ nɛ he tsɔ kɛ pi si lo? Dɛbi! Nɔ ko be.

⁵ Nɔmlɔ adesa wami se kɛmi, kɛ hlami abɔ nɛ e maa ye ngɛ je mi ɔ, a to ngɔ fɔ si momo. Mo nitsɛ o ma nɔ́ nɛ ɔ nya si momo, nɛ e be hie tsakemi.

⁶ Lɔ ɔ he ɔ, je o hɛ ngɛ e he nɛ e na he jɔmi. Ha nɛ e na bua jɔmi bɔ nɛ e ma nyɛ ngɛ e si himi nɛ he wa nɛ ɔ mi.

⁷ Ke a po tso ngɔ fɔ si ɔ, hɛ nɔ kami ngɛ kaa e ma tsɛ̃ ekohu; ejakaa e hɛngmɛ ɔmɛ lɛɛ a gbo we.

⁸ Ke sipoku ɔmɛ a se kɛ ngɛ zu mi, nɛ tso ku ɔ sa tete po,

⁹ ke tso ɔ na nyu ɔ, e ma tsɛ̃ ekohu, nɛ e ma gba kɔni kaa tso nɛ a du ehe.

¹⁰ Se nɔmlɔ lɛɛ ke e gbo ɔ, e nyagbe ji lɔ ɔ nɛ. Ke nɔmlɔ adesa gbo ɔ, jije o maa na lɛ ngɛ ekohu?

¹¹ Kaa bɔ nɛ taku mi nyu taa, nɛ pa mi nyu miiɔ nɛ e gbliɔ ɔ,

¹² jã kɛ̃ nɔmlɔ adesa hwɔɔ mahe, nɛ e ti si hu. E be si tee hu, nɛ kɛ yaa si be mi nɛ hiɔwe be hu ɔ, a be lɛ tsɛ̃ɛ̃e hu kɔkɔɔkɔ.

¹³ I na nɛ o ngɔ mi ya laa ngɛ gbeje kɛ yaa si o mi mi fumi ɔ se maa po; nɛ lɔ ɔ se ɔ, o maa to be nɛ a kɛ ma kai mi.

¹⁴ Ke nɔmlɔ gbo ɔ, e kpaleɔ kɛ baa ekohu jinɛ i ko mlɛ kɛ yaa si ye haomi be nɛ ɔ se maa po, nɛ be kpakpa ma ba na mi.

¹⁵ Jinɛ o ma tsɛ mi, nɛ ma he nɔ, nɛ o ma na imi, nɔmlɔ nɛ o bɔ ɔ, ye he bua jɔmi.

¹⁶ Jinɛ o maa hyɛ ye nyɛɛmi, nɛ o be ye he yayami ɔmɛ a se die.

¹⁷ O kɛ ye he yayami ɔmɛ maa pa mi, nɛ o maa ngmɛɛ he kulaa. Tɔmihi babauu nɛ i pee ɔ, o maa gbe lɛ tsuo pɛpɛɛpɛ.

¹⁸ Se, kaa bɔ nɛ yohi tete po huleɔ kɛ nɔɔ si, nɛ tɛ sahi jeɔ a blɔ hehi;

¹⁹ kaa bɔ nɛ nyu haa tɛ yeɔ, nɛ pa nɛ hia muɔɔ tabo zu kɛ yaa a, jã nɛ o haa nɛ nɔmlɔ adesa hɛ nɔ kami peeɔ yaka.

²⁰ Ke o fia lɛ nɔ́, kɛkɛ e hɛ mi tsake; kɛkɛ a wo lɛ blɔ, nɛ e be bae hu gblegbleegble.

²¹ Ke e gbo ɔ, e bimɛ a hɛ mi ba nyami jio, e bimɛ a hɛ mi pue si jio, e li.

²² Lɛ nitsɛ e he lo ɔ kɛkɛ nɛ e nuu he kaa e ngɛ lɛ yee; nɛ e yeɔ kɔmɔ.