Hiob 13 - BAIBLO ALOO NGMAMI KLƆUKLƆU Ɔ

^1-2 Ní nɛ ɔmɛ tsuo nɛ nyɛ ngɛ dee ɔ, i na, nɛ i nu hyɛ; i nu lɛ tsuo sisi. Nɔ́ tsuaa nɔ́ nɛ nyɛ le ɔ, imi hu i le; nyɛ pi mi.

³ Imi lɛɛ Mawu Ope ɔ lɛ i kɛ na, se pi nyɛ; ma suɔ nɛ i kɛ lɛ wa hla níhi a nya.

⁴ Nyɛɛ lɛɛ pe nyɛ poɔ sane deɔ; nyɛ tsuo nyɛ ngɛ kaa tsopatsɛmɛ nɛ a he be se nami.

⁵ I na nɛ nyɛ ma nyɛ nya mohu, jinɛ a ko tsɛ nyɛ ní leli.

⁶ Nyɛɛ bu ye sane ɔ tue, konɛ nyɛɛ na bɔ nɛ ma je ye nya ha.

⁷ Mɛni he je nyɛ ngɛ lakpa yee? Nyɛ susu kaa nyɛ lakpa a he maa ba se nami ha Mawu lo?

⁸ Mawu he lɛ nyɛ ngɛ pɛe ɔ? Nyɛ maa ye e sane ɔ ha lɛ lo?

⁹ Ke Mawu ke e ma hla nyɛ níhi a mi fitsofitso ɔ, anɛ e maa hi ha nyɛ lo? Anɛ nyɛ susu kaa nyɛ maa sisi Mawu kaa bɔ nɛ nyɛ sisiɔ nimli adesahi lo?

¹⁰ Ke nyɛ hyɛɛ nimli a hɛ mi ngɛ laami mi ɔ, e ma ka nyɛ hɛ mi kɛ̃.

¹¹ E he wami kpetekpleenyɛ ɔ maa wo nyɛ he gbeye, nɛ sawale maa nu nyɛ.

¹² Abɛhi nɛ nyɛ ngɛ bue ɔ, a he be se nami ko; munyuhi nɛ nyɛɛ kɛ ngɛ Mawu he fae ɔ ngɛ kaa kɔɔhiɔ kɛkɛ.

¹³ Nyɛɛ pee dii nɛ ma tu munyu, konɛ nɔ́ nɛ maa ba ye nɔ nɛ ba.

¹⁴ E wɛ ha mi kaa ma ngɔ ye wami kɛ ha ngɛ enɛ ɔ he.

¹⁵ Bɔ tsuaa bɔ nɛ pee ɔ, e maa gbe mi sa; i be hɛ nɔ kami ko. Se kɛ̃ ɔ, ma fa ye he ngɛ e hɛ mi.

¹⁶ Enɛ ɔ nɔuu ma he ye yi wami, ejakaa yayami peelɔ ko be nyɛe maa ba Mawu hɛ mi.

¹⁷ Nyɛɛ bu mi tue saminya, konɛ nɔ́ nɛ ma de ɔ nɛ sɛ nyɛ tue mi.

¹⁸ Jehanɛ, i dla ye he konɛ ma jaje ye sane ɔ, ejakaa i le kaa i yeɔ nguɔ.

¹⁹ Mɛnɔ lɛ ma ye nya pomi ɔ? Mo Mawu lo? Ke ja a, lɛɛ ma pee dii nɛ ma gbo mohu.

²⁰ Ha nɛ ma bi mo nɔ́ enyɔ pɛ, nɛ o ha mi, kɛkɛ i be ye he laae ngɛ o hɛ mi.

²¹ Kpa ye tue gblami, kɛ ye he gbeye womi.

²² Mawu, moo tu munyu kekle, konɛ ma he nɔ; aloo ke o suɔ ɔ, imi ma de kekle, konɛ moo o he nɔ.

²³ Mɛni ji ye he yayami ɔmɛ? Mɛni tɔmihi nɛ i pee? Tsɔɔ mi ye yayami ɔmɛ, kɛ ye tɔmi ɔmɛ.

²⁴ Mɛni he je o kɛ o hɛ mi laa mi ɔ? Mɛni he je o kɛ mi ngɛ ní toe kaa o he nyɛlɔ ɔ?

²⁵ O ngɛ hlae nɛ o wo ye he gbeye lo? Imi lɛɛ i ngɛ kaa ba kɛkɛ; tsakati gbigbli se lɛ o ngɛ nyɛe ɔ nɛ.

²⁶ O po ye nya wawɛɛ nitsɛ; yayamihi nɛ i pee ye nihe be mi hu o ngɔ kɛ piɛ he.

²⁷ O ngɔ ye nanehi kɛ wo pã mi. Nɔ́ tsuaa nɔ́ nɛ i ngɛ pee ɔ, o ngɛ hyɛe; ye nane nya po o hyɛɛ fitsofitso.

²⁸ I pee kaa tso nɛ sa, nɛ hule nɔ si, aloo bo nɛ wɔyewɔye ye.