Hiob 12 - BAIBLO ALOO NGMAMI KLƆUKLƆU Ɔ

Hiob

^1-2 Niinɛ, nyɛ ji ma a nɛ. Ke nyɛ gbo kɛkɛ nile hu gbo.

³ Se imi hu i ngɛ juɛmi kaa nyɛ nɔuu; nyɛ pi mi kɛ nɔ́ ko nɔ́ ko; níhi nɛ nyɛ ngɛ dee nɛ ɔ, mɛnɔ lɛ li?

⁴ I plɛ pee muɔ nɔ́ kɛ ha ye huɛmɛ; a ngɛ mi muɔe, pohu dalɔ ji mi; tɔmi be ye he. Be ko nɛ be ɔ, ke i fa kue ha Mawu ɔ, e buɔ mi tue.

⁵ Nyɛ ngɛ ye he fɛu yee, ejakaa nyɛɛ lɛɛ haomi ko be nyɛ nɔ. Nɔmlɔ nɛ miɔ nɛ maa nɔ si ɔ, nyɛ ngɛ lɛ nɔ́ fiae.

⁶ Ojo fiali, kɛ nihi nɛ woɔ Mawu mi mi la a, a ngɛ tue mi jɔmi si himi mi; mɛ po nɛ a he wami ji a mawu ɔ.

⁷ Nyɛɛ ya lohwe nane eywiɛɛywiɛtsɛmɛ a ngɔ; nyɛɛ ya lohwe pɛlitsɛmɛ a ngɔ, nɛ a maa tsɔɔ nyɛ ní.

⁸ Adebɔ níhi nɛ ngɛ wo mi kɛ zugba a nɔ ɔ, nyɛɛ ya nɛ nyɛ ya bi mɛ nile.

⁹ Mɛ tsuo pɛpɛɛpɛ a ti mɛnɔ lɛ li kaa Mawu lɛ pee enɛ ɔ lo?

¹⁰ Níhi nɛ ngɛ hɛ ngmengmle tsuo, Mawu lɛ ha mɛ wami; nimli adesahi tsuo a wami ngɛ Mawu dɛ mi.

¹¹ Se kaa bɔ nɛ tue hyɛɛ munyu mi, nɛ lilɛ hu saa niye ní nya hyɛɛ ɔ,

¹² nimeli ngɛ nile; nihi nɛ a wami se kɛ ɔ, a ngɛ juɛmi.

¹³ Se Mawu lɛɛ e nɔ́ ji nile, kɛ he wami; e ngɛ juɛmi, kɛ nɔ́ sisi numi.

¹⁴ Ke Mawu ku nɔ́ ko kɛ pue si ɔ, mɛnɔ ma nyɛ maa ma ekohu? Ke e nga nɔ ko yi kɛ wo tsu mi ɔ, mɛnɔ ma nyɛ ma bli lɛ?

¹⁵ Ke Mawu tsi hiɔmi nya, kɛkɛ zugba gbli; ke e bli nyu nya, kɛkɛ pa hia lalaala ngɛ zugba a nɔ.

¹⁶ Mawu he wa, nɛ e le ní; nɔ sisilɔ, kɛ nɔ nɛ a sisi lɛ tsuo e níhi ji mɛ.

¹⁷ E kpɔɔ nile ngɛ ga woli a dɛ, nɛ e haa kojoli plɛɔ peeɔ kuasiahi.

¹⁸ E kpaa matsɛmɛ, nɛ e haa nɛ a plɛɔ peeɔ pamitsɛmɛ.

¹⁹ E baa osɔfohi si, nɛ e butuu ni nɛmɛ nɛ he wami ngɛ a dɛ.

²⁰ Nihi nɛ a buu ɔ, e kpɔɔ munyu tumi he wami ngɛ a dɛ; nimeli hu e kpɔɔ a nile ɔ ngɛ a dɛ.

²¹ E pueɔ ganɔhi a hɛ mi si, nɛ e haa a he wami ɔ se poɔ.

²² E jeɔ nyakpɛ níhi kpo kɛ jeɔ laami hehi, nɛ e haa la tsoɔ ngɛ hehi nɛ wo diblii kpii.

²³ E haa je mahi he wami, nɛ e kpaleɔ kpataa a hɛ mi. E haa nɛ mahi bɔɔ, nɛ e kpaleɔ gbɛɛ mɛ ngɔ fĩaa.

²⁴ E haa je ma amɛ a hɛ mi nyɛɛli jeɔ kuasia, nɛ a ya woɔ lalaalo ngɛ nga nɔ he nɛ blɔ ko blɔ ko be.

²⁵ A hii dedee, nɛ a hii si tataae ngɛ diblii mi kaa nihi nɛ tɔ dã.