Hiob 11 - BAIBLO ALOO NGMAMI KLƆUKLƆU Ɔ

Zofar

^1-2 Nɔ ko be munyuhi babauu nɛ ɔmɛ a heto hae lo? Anɛ munyu tumi babauu woɔ nɔ nguɔ lo?

³ Hiob, munyuhi nɛ o ngɛ tue putɛputɛɛ ɔ, o susu kaa jamɛ munyu ɔmɛ ma ha nɛ wa ma wa nya lo? Ke o ngɛ nihi a he fɛu yee ɔ, nɔ ko nɛ ko pue o hɛ mi si lo?

⁴ O deɔ ke anɔkuale munyuhi o ngɛ tue ɔ nɛ; o deɔ ke dalɔ ji mo ngɛ Mawu hɛ mi.

⁵ I na nɛ Mawu pa e nya mi nɛ e ha mo heto.

⁶ Jinɛ Mawu maa tu mo nile mi laami munyuhi; e ma de mo ke níhi babauu ngɛ je mi nɛ nɔmlɔ adesa juɛmi sui he. Na nɛ o le kaa Mawu gbla we o tue bɔ nɛ sa mo; o yayami ɔmɛ hiɛ kulaa pe tue gblami ɔ.

⁷ Anɛ o ma nyɛ maa na Mawu níhi nɛ a mi kuɔ a nya kɛ pi si lo? Anɛ o ma nyɛ maa na Mawu Ope ɔ nya tami he lo?

⁸ Mawu ngɛ hiɔwe se lokoo, se moo lɛɛ hiɔwe ɔ po o juɛmi sui he. Mawu le gbogboehi a je, se moo lɛɛ o li lejɛ ɔ.

⁹ Ke a susu Mawu he wami kaa bɔ nɛ a kɛ kpa susuɔ nɔ́ ɔ, Mawu he wami ka pe je ɔ, nɛ e bli pe wo.

¹⁰ Ke Mawu ba nu mo nɛ e kɛ mo ba kojomi he ɔ, mɛnɔ maa tsi e nya?

¹¹ Mawu le yaka nimli. Ke e na ní yayamihi nɛ a ngɛ pee ɔ, anɛ e be a tue gblae lo?

¹² Ke nga mi tejihi a hɛ mi ba si ɔ, kuasiahi maa le nɔ.

¹³ Hiob, tsake o tsui, nɛ o bua o nine nya nɛ o fa kue ha Mawu.

¹⁴ Mo nitsɛ mo kpa yayami peemi, nɛ o hyɛ nɛ a ko pee yi wu tso ní ngɛ o we ɔ mi.

¹⁵ Ke yayami ko be o he nɛ ma ble mo ɔ, lɔ ɔ loko o maa pi si ngɛ Mawu mi, nɛ o be nɔ́ ko nɔ́ ko gbeye yee.

¹⁶ Kɛkɛ ɔ, o haomi ɔmɛ tsuo a se maa po kaa pa nɛ hia kɛ ba be be ko; nɛ o be mɛ kaie hu.

¹⁷ O wami he ma tsɔ heii pe piani; diblii be po maa hi kaa mɔtu.

¹⁸ O maa hi si ngɛ tue mi jɔmi, kɛ hɛ nɔ kami mi; Mawu maa baa o yi, nɛ e ma ha mo he jɔmi.

¹⁹ Ke o hwɔ si ɔ, o be gbeye yee; nihi babauu ma ba bi yemi kɛ buami ngɛ o dɛ.

²⁰ Se yayami peeli lɛɛ a maa na kaa a yi ta pɛ; he ko he ko be nɛ a maa tu fo kɛ ya. Nɔ́ nɛ blɔ nɛ a maa hyɛ kɛkɛ ji gbenɔ.