Hiob 10 - BAIBLO ALOO NGMAMI KLƆUKLƆU Ɔ

¹ Je mi himi ba gbe ye nya; jehanɛ, bu ye sane ɔ tue.

² Mawu, koo bu mi fɔ. Mɛni i pee, loko o kɛ mi ngɛ sane yee kikɛ nɛ ɔ?

³ Imi nɔmlɔ nɛ mo nitsɛ o bɔ ɔ, anɛ e da ha mo kaa o wa mi yi mi, nɛ o hie mi kikɛ nɛ ɔ, konɛ yiwutsotsɛmɛ a yi mi tomi yayami ɔmɛ lɛɛ o bua nɛ jɔ he lo?

⁴ Anɛ nimli adesahi a hɛngmɛ lɛ ngɛ o dɛ? Anɛ o hyɛɛ nɔ́ kaa nɔmlɔ lo?

⁵ Anɛ o wami be ɔ ngɛ kpiti kaa nɔmlɔ nɔ́ lo?

⁶ Mɛni he je mɔ lɛ o ngɛ ye tɔmi ɔmɛ, kɛ ye yayami ɔmɛ a se die kikɛ nɛ ɔ?

⁷ O le kaa i yi fɔ, nɛ nɔ ko hu be nɛ ma kpɔ mi kɛ je o dɛ mi.

⁸ O ninehi nɛ o kɛ bɔ mi ɔ, amlɔ nɛ ɔ, o ngɔ jamɛ a nine ɔmɛ nɔuu kɛ ngɛ ye hɛ mi kpatae.

⁹ Kai kaa tabo zu lɛ o kɛ bɔ mi. Anɛ o ma ha nɛ ma plɛ pee zu ekohu lo?

¹⁰ O ha tsaatsɛ he wami nɛ e kɛ fɔ mi; o ha nɛ i wa ngɛ maa mi mi.

¹¹ O kɛ wu kɛ pani pee ye nɔmlɔ tso ɔ, nɛ o ngɔ lo, kɛ he womi kɛ ha he.

¹² O dloo mi wami, o hyɛɛ ye nɔ daa, nɛ o suɔmi ɔ se pui gblegbleegble.

¹³ Se amlɔ nɛ ɔ, i le kaa o ngɔ ní nɛ ɔmɛ tsuo ngɔ to o yi mi; nɛ daa nɛ ɔ o ngɛ ga toe nɛ o kɛ ye mi awi.

¹⁴ Ke i pee yayami ko ɔ, kɛkɛ o ngma kɛ to, nɛ o kɛ be mi pae kɔkɔɔkɔ.

¹⁵ Ke i pee yayami ɔ, musu tloo mi. Ke i pee nɔ́ nɛ da tete po, haomi kɛ zo ha we nɛ ma nyɛ ma wo ye yi nɔ.

¹⁶ Ke níhi a mi hi ha mi bɔɔ ɔ, o nyɛɛɔ ye se kaa jata. O guu nyakpɛ blɔhi a nɔ, nɛ o kɛ yeɔ mi awi.

¹⁷ Daa nɛ ɔ, o yeɔ odase kɛ siɔ mi. Daa nɛ ɔ, o mi mi fuɔ mi wawɛɛ nitsɛ, nɛ daa nɛ ɔ, o toɔ ga he nɛ o kɛ ye mi awi.

¹⁸ Mawu, mɛni he je kulaa lɛ o ha nɛ a fɔ mi ɔ? I na nɛ i plɛ ye se ngɛ muɔ nɔ.

¹⁹ Kaa a ngɔ mi kɛ je maa mi mi ya wo yɔkɔ mi amlɔ nɔuu ɔ, jinɛ e ngɛ kaa nɔ́ nɛ a fɔ we mi kɛ̃.

²⁰ Ye wami ligbi ɔmɛ ɔ, pi bɔɔ pɛ nɛ piɛ lo? Ngmɛɛ ye he nɛ ma na bua jɔmi bɔɔ!

²¹ Ma hia blɔ be kpiti mi kɛ ya he ko nɛ i be kpalee kɛ ba hu. I yaa ma ko nɔ; lejɛ ɔ wo diblii kpii, nɛ e ngɛ gbeyegbeye.

²² Lejɛ ɔ ngɛ gbeyegbeye, kɛ basabasa; nɛ piani po woɔ diblii kaa nyɔ mi.