Hiob 1 - BAIBLO ALOO NGMAMI KLƆUKLƆU Ɔ

Satan ba ka Hiob

¹ Nyumu ko hi si ngɛ Uz zugba a nɔ; e biɛ ji Hiob. E jaa Mawu, nɛ e yeɔ lɛ anɔkuale. Nyumu nɛ ɔ, nɔmlɔ kpakpa ji lɛ; e pee we nɔ́ nɛ dɛ blɔ kɔkɔɔkɔ.

² Hiob ngɛ binyumuhi kpaago, biyihi etɛ,

³ kɛ tsɔli babauu. E ngɛ lohwe nɛ ɔmɛ hulɔ: to akpe kpaago, afukpɔngɔ akpe etɛ, na akpe, kɛ teji yo lafa enuɔ. Lɛ ji nɔmlɔ ngua pe kulaa ngɛ beleku je ma amɛ a mi.

⁴ Ke pee ɔ, Hiob binyumu ɔmɛ tsɛɔ ní yemi kakaaka ngɛ a we ɔmɛ a mi, nɔ tsuaa nɔ kɛ e be, nɛ a kpeeɔ a nyɛmimɛ yi etɛ ɔmɛ kɛ baa ní yemi ɔ.

⁵ Ke a gbe ní yemi ɔ tsuo nya kikɛ nɛ ɔ, jena mɔtu ɔ, Hiob maa te si mla nɛ e maa sã sami bɔ kɛ ha e bimɛ ɔmɛ kakaaka, nɛ e kɛ maa pee mɛ klɔuklɔu. Hiob peeɔ nɔ́ nɛ ɔ daa, ejakaa e susuɔ kaa eko ɔ, e bimɛ ɔmɛ pee yayami kaa a jɛ Mawu nɛ a li a he be.

⁶ Ligbi ko ɔ, Mawu bimɛ ɔmɛ ba bua a he nya ngɛ Yawɛ hɛ mi, nɛ Satan hu piɛ a he kɛ ba.

⁷ Yawɛ bi Satan ke, “Jije o je?” Satan he nɔ ke, “I ya kpa je ɔ mi tsuo kɛ ya kɛ ba.”

⁸ Yawɛ bi lɛ ke, “Anɛ o to ye tsɔlɔ Hiob he hɛ kaa nɔ ko nɔ ko be je ɔ mi nɛ da, nɛ yeɔ anɔkuale kɛ lɛ sɔ lo? E jaa mi, nɛ e pee we nɔ́ nɛ dɛ blɔ kɔkɔɔkɔ.”

⁹ Satan he nɔ ke, “O susuɔ kaa yaka gu lɛ Hiob yeɔ mo gbeye ɔ?

¹⁰ O baa Hiob yi, kɛ e we mi bimɛ, kɛ nɔ́ tsuaa nɔ́ nɛ e ngɛ, nɛ nɔ́ ko hia we lɛ. O gbaa e ní tsumi, nɛ o wo lɛ ní babauu ngɛ zugba a nɔ.

¹¹ Moo lɛɛ mo he ní ɔmɛ ngɛ e dɛ kaa e be mo gbiɛe ngɛ o hɛ mi lo!”

¹² Yawɛ de Satan ke, “Saminya! Nɔ́ tsuaa nɔ́ nɛ ngɛ Hiob dɛ ɔ, i ngɔ kɛ wo o dɛ. Se lɛ nitsɛ e nɔmlɔ tso ɔ lɛɛ o nine ko ta he.” Kɛkɛ nɛ Satan je Mawu he.

Hiob bimɛ ɔmɛ kɛ e níhi tsuo a hɛ mi kpata

¹³ Ligbi ko benɛ Hiob binyumu ɔmɛ, kɛ e biyi ɔmɛ ngɛ ní yee nɛ a ngɛ ní nue ngɛ a nyɛminyumu nɔkɔtɔma a we ɔ mi ɔ,

¹⁴ tsɔlɔ ko gbɔ fo kɛ ba Hiob ngɔ, nɛ e ba de lɛ ke, “Na amɛ ngɛ hue, nɛ teji yi ɔmɛ ngɛ ní yee ngɛ a kasa nya.

¹⁵ Tlukaa a, Sabea bi ɔmɛ ba yu a nɔ, nɛ a muɔ lohwe ɔmɛ tsuo kɛ ho. A gbe o tsɔli ɔmɛ tsuo; imi nɔ kake too lɛ i je mi, nɛ i ba konɛ ma ba bɔ mo amaniɛ.”

¹⁶ Benɛ e ngɛ munyu ɔ tue kɛ mwɔɔ ɔ, tsɔlɔ kpa ba nɛ e ba de ke, “Oslabai gba pue to ɔmɛ kɛ to hyɛli ɔmɛ a nɔ, nɛ e gbe mɛ tsuo. Imi nɔ kake too lɛ i je mi, nɛ i ba konɛ ma ba bɔ mo amaniɛ.”

¹⁷ E nya na we nɛ e nɔ si nɛ tsɔlɔ kpa ba nɛ e ba de ke, “Kaldea ní hali a kuu etɛ ba tua wɔ. A gbe o tsɔli ɔmɛ tsuo, nɛ a ngɔ afukpɔngɔ ɔmɛ kɛ je. Imi nɔ kake too lɛ i je mi, nɛ i ba konɛ ma ba bɔ mo amaniɛ.”

¹⁸ Benɛ lɛ hu e ngɛ munyu ɔ tue kɛ mwɔɔ ɔ, tsɔlɔ kpa ba nɛ e ba de ke, “O binyumu ɔmɛ, kɛ o biyi ɔmɛ ngɛ ní yee nɛ a ngɛ ní nue ngɛ a nyɛminyumu nɔkɔtɔma a we ɔ mi.

¹⁹ Tlukaa a, kɔɔhiɔ nɛ nya wa hia kɛ je nga a nɔ blɔ kɛ ba na tsu ɔ kɔ nya eywiɛ ɔmɛ tsuo, nɛ tsu ɔ hule ngɔ pue nihewi ɔmɛ, kɛ yihewi ɔmɛ a nɔ, nɛ mɛ tsuo a gbo. Imi nɔ kake too lɛ i je mi, nɛ i ba konɛ ma ba bɔ mo amaniɛ.”

²⁰ Kɛkɛ nɛ Hiob te da si, nɛ e kɛ aywilɛho hía tade ɔmɛ ngɛ e he, nɛ e sã e yi nɔ. E kpla si, nɛ e ngɔ e hɛ mi ngɔ bu si, nɛ e ja Mawu.

²¹ Hiob de ke, “Maa fɔ mi kɛ ba he gu, nɛ ma kpale kɛ ya he gu. Yawɛ lɛ ha, nɛ Yawɛ lɛ ba ngɔ kɛ ho. A je Yawɛ biɛ ɔ yi!”

²² Enɛ ɔ tsuo mi ɔ, Hiob pee we yayami ko; e pia we Mawu.