Hebribi 9 - BAIBLO ALOO NGMAMI KLƆUKLƆU Ɔ

Mawu jami ngɛ hiɔwe kɛ zugba

¹ Kekleekle somi ɔ hɛɛ blɔ nya tomi nɛ a kɛ ma ja Mawu, kɛ he ko hulɔ nɛ adesa pee nɛ ngɛ klɔuklɔu nɛ a ma ja Mawu ngɛ.

² A ma bo tsu, nɛ a po mi enyɔ. A tsɛɛ bo tsu ɔ he nɛ a guu kɛ sɛɛ mi ɔ he klɔuklɔu. Kane tso, kɛ okplɔɔ kɛ e nɔ abolo klɛdɛɛ ɔ ngɛ lejɛ ɔ.

³ A tsɛɛ tsu mi pomi bo enyɔne ɔ se bo tsu ɔ he klɔuklɔu pe kulaa.

⁴ Níhi nɛ ngɛ tsu nɛ ɔ mi ji tsopa kɛ e he via sami la tɛ nɛ a kɛ sika tsu pee ɔ, somi daka a nɛ a kɛ sika tsu ha he ɔ kɛ e mi sika tsu kplu ɔ nɛ mana a ngɛ mi ɔ, Aaron dɛma tso ɔ nɛ tsɛ̃ ba be ko ɔ, kɛ tɛ tɛtlɛɛ enyɔ ɔmɛ nɛ a ngma mlaa amɛ ngɛ a nɔ ɔ.

⁵ Kerubhi nɛ tsɔɔ Mawu hɛ mi nyami ɔ daa si ngɛ somi daka nya nɔ́ ɔ nɔ, nɛ a gbɛ a pɛlihi a mi ngɛ he nɛ a kɛ tɔmi paa ngɛ ɔ. Se wa be nyɛe ma gba níhi a mi fitsofitso amlɔ nɛ ɔ.

⁶ Ke a to níhi blɔ nya kikɛ nɛ ɔ, osɔfo ɔmɛ yaa kekleekle bo tsu ɔ mi daa ligbi ya tsuɔ a jami blɔ nya ní.

⁷ Se bo tsu enyɔne ɔ lɛɛ osɔfo nɔkɔtɔma pe kulaa a pɛ lɛ yaa lejɛ ɔ si kake ngɛ jeha mi. Pohu ja e hɛɛ lohwe muɔ kɛ ya ngɛ yayami nɛ lɛ nitsɛ e pee, kɛ yayamihi nɛ ma a li a he be nɛ a pee ɔ a he.

⁸ Nɔ́ nɛ Mumi Klɔuklɔu ɔ ngɛ tsɔɔe ngɛ blɔ nya tomi nɛ ɔmɛ a mi ji kaa be abɔ nɛ kekleekle bo tsu ɔ maa si kɛ mwɔɔ ɔ, lɛɛ a na we nɛ a bli blɔ nɛ a guu kɛ yaa he klɔuklɔu pe kulaa a lolo.

⁹ Enɛ ɔ tsuo ji okadi nɛ kɔɔ mwɔnɛmwɔnɛ ɔ si himi he. E tsɔɔ kaa nike níhi, kɛ bɔ ɔmɛ nɛ a sãã kɛ haa Mawu ɔ be nyɛe ma ha nɛ nɔ nɛ ma Mawu jami ɔ tsui mi ma tsɔ bɔ nɛ sa;

¹⁰ ejakaa niye ní, kɛ dã, kɛ he tsumi kusumihi pɛ a he nɛ e kɔɔ. Enɛ ɔmɛ tsuo ɔ, he lo blɔ fa mi níhi nɛ maa hi si kɛ yaa si be nɛ Mawu maa pee níhi tsuo ehe kɛkɛ.

¹¹ Se Kristo ba kaa osɔfo nɔkɔtɔma pe kulaa kɛ ha blɔ nya tomi kpakpa nɛ wa na nɛ ɔ. Bo tsu nɛ e sɔmɔɔ ngɛ mi ɔ kle, nɛ e hi kɛ pi si. Pi adesa nɛ pee, nɛ tsɔɔ kaa pi je nɛ ɔ mi níhi nɛ a bɔ ɔ eko.

¹² Benɛ Kristo gu bo tsu ɔ mi kɛ ya sɛ he klɔuklɔu pe kulaa a, e pee nɔ́ nɛ ɔ si kake nyɔngloo. Pi to, loo na muɔ nɛ e kɛ sã bɔ ɔ; mohu ɔ, e ngɔ lɛ nitsɛ e muɔ ngɔ ha, konɛ e kɛ he wa yi wami kɛ ya neneene.

¹³ To kɛ na muɔ, kɛ na bi nɛ a sã a la zu ji níhi nɛ a kɛ fĩaa nihi nɛ ble a he ɔ a nɔ, nɛ a kɛ tsuɔ a nɔmlɔ tso ɔ he ngɛ he lo blɔ fa mi.

¹⁴ Ke enɛ ɔmɛ ngɛ mi niinɛ ɔ, lɛɛ Kristo muɔ nɛ e gu Mumi Klɔuklɔu nɛ ngɛ daa a nɔ nɛ e kɛ pue si ɔ tsu ní kulaa pe jã. Bɔ ɔ nɛ Kristo nɛ sé ko be e he ɔ ngɔ e he kɛ sã, nɛ e gbo ngɛ wa he ɔ ma ha nɛ wa ma je wa hɛ kɛ je kusumihi nɛ a he be se nami ɔ a he, nɛ wa ma sɔmɔ Mawu hɛ kalɔ ɔ.

¹⁵ Nɔ́ nɛ Kristo tsu nɛ ɔ tsɔɔ kaa lɛ Kristo ɔ ji nɔ nɛ ha Mawu kɛ e ma a so somi he ɔ, konɛ nihi nɛ Mawu tsɛ mɛ ɔ, a nine nɛ su neneene gbosi ní nɛ Mawu wo he si ɔ nɔ. Ejakaa benɛ a kɛ kekleekle somi ɔ ngɛ ní tsue ɔ, nɔ ko ba gbo nɛ e kɛ kpɔ nihi tsuo nɛ pee yayami jamɛ a be ɔ.

¹⁶ Loko a maa ngɔ nɔ ko gbosi ní yemi he blɔ nya tomi womi kɛ tsu ní ɔ, e hia kaa a ye odase kaa niinɛ nɔ ɔ be je mi hu.

¹⁷ Ejakaa ke nɔ ko ngɛ je mi ɔ, gbosi ní yemi blɔ nya tomi womi nɛ e pee ɔ, a kɛ tsu we ní; ja e gbo.

¹⁸ Enɛ ɔ he je nɛ kekleekle somi ɔ po muɔ a kɛ ma nɔ mi ɔ nɛ.

¹⁹ Kekleekle ɔ, Mose tsɔɔ ma a mlaa amɛ tsuo nɛ Mawu wo ɔ kaa bɔ nɛ mlaa a nitsɛ tsɔɔ ɔ. Lɔ ɔ se ɔ, e ngɔ nga nɛ a fi kɛ bla kaa bɛ, kɛ jijɔ he bwɔmi tsutsuu kɛ sɔ na kɛ to muɔ, kɛ nyu, nɛ e kɛ fĩa womi kpo ɔ nitsɛ, kɛ ma mluku ɔ tsuo a nɔ.

²⁰ Benɛ e ngɛ nɔ́ nɛ ɔ pee ɔ, e de ma a ke, “Somi nɛ Mawu kɛ nyɛ so ɔ, muɔ nɛ a kɛ sɔu nya ji nɛ ɔ nɛ.”

²¹ Bo tsu ɔ, kɛ kplu ɔmɛ nɛ a kɛ jaa Mawu ɔ, Mose ngɔ muɔ kɛ fĩa mɛ tsuo a nɔ jã nɔuu.

²² Niinɛ, ngɛ mlaa a nya a, muɔ ji nɔ́ nɛ tsuɔ níhi tsuo a he; nɛ ke a pue we muɔ si ɔ, a kɛ yayami pɛ.

Kristo ngɔ e he kɛ sã bɔ kɛ je wa he yayami

²³ Lɔ ɔ he ɔ, je nɛ ɔ mi níhi nɛ ji hiɔwe ní ɔmɛ a henɔ ɔ lɛ e sa kaa a peeɔ kusumi kaa jã kɛ tsuɔ a he. Se hiɔwe ní nitsɛnitsɛ ɔmɛ lɛɛ e hia kaa a pee kusumi nɛ hi pe ja kulaa nɛ a kɛ tsu a he.

²⁴ Ejakaa Kristo ɔ, pi he klɔuklɔu pe kulaa nɛ a kɛ nine pee, nɛ ji nɔ́ nitsɛ ɔ henɔ kɛkɛ ɔ mi nɛ e ya. Mohu ɔ, hiɔwe nitsɛnitsɛ nɛ e ho; nɛ amlɔ nɛ ɔ, e ngɛ lejɛ ɔ ngɛ Mawu hɛ mi ngɛ wa he.

²⁵ Yuda osɔfo nɔkɔtɔma pe kulaa a yaa he klɔuklɔu pe kulaa a daa jeha kɛ muɔ nɛ pi lɛ nitsɛ e nɔ. Se Kristo ya lejɛ ɔ, pi nɛ e ngɔ e he ya sã bɔ si abɔ.

²⁶ Kaa jã a, jinɛ kɛ je be nɛ a bɔ je ɔ, amanehlu sɔuu Kristo maa hi nae kpitikpiti. Mohu ɔ, amlɔ nɛ ɔ nɛ je mi nyagbe miɔ nɛ e maa su ɔ, Yesu ba je e he kpo si kake nyɔngloo. E ngɔ e he kɛ sã bɔ kɛ je wa he yayami.

²⁷ Mawu to kaa adesa nɛ gbo si kake, nɛ lɔ ɔ se ɔ, a kojo lɛ.

²⁸ Jã nɔuu Kristo hu a ngɔ lɛ kɛ sã bɔ si kake pɛ, konɛ e kɛ je adesa he yayami. E maa ba si enyɔne ɔ, pi nɛ e ba tsu yayamihi a he ní hu, se mohu e ma ba he nihi nɛ ngɛ lɛ blɔ hyɛe wawɛɛ ɔ a yi wami.