Hebribi 8 - BAIBLO ALOO NGMAMI KLƆUKLƆU Ɔ

Yesu, wa osɔfo nɔkɔtɔma pe kulaa a

¹ Nɔ́ nɛ wa ngɛ dee ɔ we oti ɔ tsɔɔ kaa wa ngɛ nɔ ko nɛ ji osɔfo nɔkɔtɔma pe kulaa nɛ hii si ngɛ Mawu matsɛ sɛ ɔ hiɔ nɔ ngɛ hiɔwe.

² E sɔmɔɔ ngɛ he klɔuklɔu pe kulaa nɛ ji bo tsu nitsɛnitsɛ nɛ Nyɔmtsɛ ɔ nitsɛ ma, se pi nɔmlɔ adesa ko nɛ ma a.

³ A woɔ osɔfo nɔkɔtɔma pe kulaa, konɛ e ngɔ nike ní kɛ ha Mawu, nɛ e sã bɔ ha lɛ. Lɔ ɔ he ɔ, wa osɔfo nɔkɔtɔma pe kulaa a hu e hia nɛ e ná nɔ́ ko nɛ e kɛ ha Mawu.

⁴ Je nɛ ɔ mi nɛ e ngɛ jinɛ e be osɔfo yee kulaa. Ejakaa osɔfohi ngɛ nɛ ngɔɔ nike ní kɛ haa Mawu kaa bɔ nɛ Yuda mlaa a tsɔɔ ɔ.

⁵ Ní nɛ osɔfo ɔmɛ tsuɔ ɔ ngɛ kaa ní tsumi nɛ a tsuɔ ngɛ hiɔwe ɔ henɔ, loo e nini kɛkɛ. Mose hu kikɛ nɛ ɔ nɔuu e tsu ní. Benɛ e maa ma bo tsu ɔ, Mawu de lɛ ke, “Hyɛ nɛ o pee ní ɔmɛ tsuo pɛpɛɛpɛ kaa henɔ nɛ i tsɔɔ mo ngɛ yo ɔ nɔ ɔ.”

⁶ Amlɔ nɛ ɔ lɛɛ osɔfo ní tsumi nɛ a ha Yesu ɔ pã osɔfo ɔmɛ a nɔ́ ɔ kulaa. Jã kɛ̃ somi nɛ Yesu ha nɛ Mawu kɛ e ma a so ɔ hu pe a nɔ́ ɔ, ejakaa Mawu wo mɛ si ngɛ ní kpakpahi nɛ pe kekle ní ɔmɛ a he.

⁷ Kaa tɔmi ko be kekleekle somi ɔ he ɔ, jinɛ somi enyɔne he hia we.

⁸ Se Mawu na kaa a tɔ̃; enɛ ɔ he je nɛ e de ke, “Be ma nɛ i kɛ Israel, kɛ Yuda maa so somi he.

⁹ Somi he nɛ ɔ maa slo kulaa ngɛ somi nɛ i kɛ a nɛmɛ ɔmɛ so blema benɛ i je mɛ kɛ je Egipt ɔ he. Somi nɛ i kɛ mɛ so ɔ, a yi nɔ; lɔ ɔ he ɔ, i ngmɛɛ a he.

¹⁰ Jehanɛ lɛɛ somi nɛ i kɛ Israel maa so hwɔɔ se ɔ ji nɛ ɔ nɛ. Ma ngɔ ye mlaa a kɛ wo a juɛmi mi, nɛ ma ngma ngɔ to a tsui nɔ. Ma pee a Mawu, nɛ mɛ hu a maa pee ye ma.

¹¹ Nɔ ko be e huɛ, loo e nyɛmi dee ke, ‘Moo le Nyɔmtsɛ ɔ.’ Ejakaa nɔ tsuaa nɔ maa le mi kɛ maa je nɔ nyafii pe kulaa nɔ kɛ yaa si nɔ nguaa pe kulaa nɔ.

¹² Ma na mɛ mɔbɔ ngɛ a tɔmi ɔmɛ a he; nɛ i be a he yayami ɔmɛ kaie hu gblegbleegble. Nyɔmtsɛ ɔ lɛ de.”

¹³ Ke Mawu ngɛ somi he he munyu tue ɔ, lɛɛ e ngɛ tsɔɔe kaa kekleekle somi ɔ wo momo. Jehanɛ hu, nɔ́ tsuaa nɔ́ nɛ wo momo, loo e bwɔ ɔ, e be kɛe nɛ e maa laa.