Hebribi 5 - BAIBLO ALOO NGMAMI KLƆUKLƆU Ɔ

¹ Osɔfo nɔkɔtɔma pe kulaa a, a hlaa lɛ kɛ jeɔ e nyɛmimɛ nɛ mɛ hu he lo kɛ muɔ ji mɛ a kpɛti. E ní tsumi ji kaa e da nimli adesahi tsuo a nane mi, nɛ e ngɔ nike ní kɛ ba ha Mawu, konɛ e sã bɔ nɛ Mawu nɛ ngɔ ma a he yayami kɛ pa mɛ.

² Osɔfo nɔkɔtɔma pe kulaa a nitsɛ ɔ, sé ngɛ e he. Lɔ ɔ he ɔ, e taa bua si ha nihi nɛ li nɔ́ ko mi, kɛ nihi nɛ tlaa blɔ ɔ.

³ Akɛnɛ lɛ nitsɛ ɔ sé ngɛ e he ɔ, e hia kaa e sã bɔ, pi kɛ ha ma a kɛkɛ, se ngɛ lɛ nitsɛ hu e yayami ɔmɛ a he.

⁴ Hɛ mi nyami nɛ ɔ, nɔ ko ngɔɛ kɛ ha lɛ nitsɛ e he. Mawu pɛ lɛ hlaa nɔ, nɛ e woɔ lɛ osɔfo nɔkɔtɔma pe kulaa kaa bɔ nɛ e hla Aaron ɔ.

⁵ Jã nɔuu kɛ̃, hɛ mi nyami nɛ Kristo ná kaa osɔfo nɔkɔtɔma pe kulaa a, pi lɛ nitsɛ nɛ e ngɔ kɛ fɔ e nɔ. Mawu lɛ wo e hɛ mi nyami nɛ e de lɛ ke, “Ye Bi ji mo, mwɔnɛ ɔ, i fɔ mo.”

⁶ Mawu de ngɛ ngmami ɔ he kpa hu ke, “Osɔfo ji mo kɛ yaa neneene kaa Melkizedek pɛ.”

⁷ Benɛ Yesu ngɛ he lo mi ɔ, ngmlaa, kɛ hɛ mi vo nyu nɛ e kɛ kpa Mawu, nɔ pɛ nɛ ma nyɛ je lɛ kɛ je gbenɔ mi ɔ pɛɛ. Akɛnɛ e yeɔ Mawu gbeye he je ɔ, Mawu hu bu lɛ tue.

⁸ Mawu Bi ji lɛ mohu, se kɛ gu amanehlu nɛ e na a mi ɔ, e kase tue bumi.

⁹ Benɛ Mawu ha nɛ e hi kɛ pi si ɔ, e ba pee nɔ nɛ haa nihi nɛ buɔ lɛ tue ɔ naa neneene yi wami hemi.

¹⁰ Nɛ Mawu wo lɛ osɔfo nɔkɔtɔma pe kulaa kaa Melkizedek pɛ.

Nyɛɛ hɛɛ nyɛ hemi kɛ yemi ɔ mi wawɛɛ

¹¹ Wa ngɛ munyuhi fuu nɛ wa maa tu ngɛ enɛ ɔ he, se e sisi tsɔɔmi wa, nɛ nyɛ nɔ́ sisi numi yee.

¹² Jinɛ be nɛ ɔ mi ɔ, e sa kaa nyɛ pee tsɔɔli, se hyɛ nyɛ mohu nɛ amlɔ nɛ ɔ, e hia kaa a tsɔɔ nyɛ Mawu munyu ɔ mi sisije ní ɔmɛ ekohu. Amlɔ nɛ ɔ, nyɔ nyu lɛ hi ha nyɛ, pi niye ní nitsɛ.

¹³ Nɔ tsuaa nɔ nɛ ngɛ nyɔ pupɔe ɔ, bimwɔyo ji lɛ kɛ mwɔɔ, nɛ e li nɔ́ ko ngɛ nɔ́ nɛ da he.

¹⁴ Se nihi nɛ wa a, a nɔ ji niye ní nitsɛ. Mɛɛ lɛɛ a tsɔse a juɛmi, nɛ a le slɔɔto nɛ ngɛ kpakpa kɛ yayami a kpɛti.