Hebribi 4 - BAIBLO ALOO NGMAMI KLƆUKLƆU Ɔ

¹ Mawu wo si ke e ma ha wa ma ya jɔɔ wa he ngɛ he jɔɔmi he. Siwo nɛ ɔ ngɛ kɛ ha wɔ kɛ mwɔɔ. Lɔ ɔ he ɔ, nyɛ ha waa hyɛ nɛ hi, konɛ e ko ba mi kaa nyɛ ti nɔ ko ya nyɛ we nɛ e su lejɛ ɔ.

² Ejakaa wɔ hu a fiɛ sane kpakpa a ngɔ tsɔɔ wɔ kaa bɔ nɛ a fiɛ ngɔ tsɔɔ mɛ ɔ nɔuu. A nu sɛ gbi ɔ lɛɛ, se e he ya bɛ se nami ha mɛ; ejakaa ni nɛmɛ nɛ nu ɔ ngɔɛ a hɛ kɛ fɔɛ nɔ́ nɛ a nu ɔ nɔ.

³ Wɔ nɛ wa he ye ɔ, wɔɔ lɛɛ wa ma ya jɔɔ wa he kaa bɔ nɛ Mawu wo si ɔ. Mawu de ke, “Ye mi mi wo la nɛ i ka kita ke, ‘He nɛ i to nɛ a ya jɔɔ a he ngɛ ɔ, ke a nane ma lejɛ ɔ fii!’ ” Mawu de enɛ ɔ, pohu níhi nɛ e to e yi mi kaa e maa pee ɔ, be nɛ e bɔ je ɔ tɔɔ nɛ e gbe lɛ tsuo nya.

⁴ Ejakaa nɔ́ nɛ ngmami ɔ he ko deɔ ngɛ ligbi kpaagone ɔ he ji, “Ligbi kpaagone ɔ, Mawu jɔɔ e he, nɛ e tsu we nɔ́ ko.”

⁵ Ngmami ɔ deɔ ngɛ he ko hu ke, “He nɛ i to nɛ a ya jɔɔ a he ngɛ ɔ, ke a nane ma lejɛ ɔ fii!”

⁶ E fɔɔ si paa kaa ni komɛ kɛ̃ maa sɛ mi, pohu ni nɛmɛ nɛ a fiɛ sane kpakpa a ngɔ tsɔɔ kekle ɔ na we jamɛ a he jɔɔmi ɔ; ejakaa a he we Mawu yi.

⁷ Se Mawu to be kpa kɛ ha kikɛmɛ a he jɔɔmi ɔ, nɛ be ɔ ji “Amlɔ nɛ ɔ.” Be babauu se ɔ, Mawu ha David tu munyu nɛ ɔ kaa bɔ nɛ a wo ta momo ɔ ke, “Mwɔnɛ ɔ, ke nyɛ nu e gbi ɔ, nyɛ ko wa tue.”

⁸ Ejakaa kaa Yoshua ha mɛ he jɔɔmi ɔ, jinɛ Mawu ko tu we ligbi kpa ko he munyu hu pee se.

⁹ Lɔ ɔ he ɔ, e fɔɔ si paa kaa he jɔɔmi be ko ngɛ ha Mawu ma a nɛ a maa ye.

¹⁰ Ejakaa nɔ tsuaa nɔ nɛ ma na he jɔɔmi nɛ Mawu wo he si ɔ, e maa jɔɔ e he kaa Mawu, nɛ e be ní tsue.

¹¹ Lɔ ɔ he ɔ, nyɛ ha nɛ waa bɔ mɔde, konɛ wa nine nɛ su he jɔɔmi nɛ ɔ nɔ, nɛ nɔ ko kó gbo tue kaa mɛ, nɛ e ba laa blɔ.

¹² Ejakaa Mawu munyu hɛ ngɛ, e ngɛ he wami, nɛ e nya ba pe klaate nya enyɔtsɛ. E gbuu kɛ sɛɛ nɔ mi kɛ ya siɔ e gbaa klaa, kɛ mumi ɔ mi, kɛ jehanɛ hu kpɔji nya amɛ, kɛ wu mi zɔ ɔmɛ a mi. Mawu munyu ɔ jeɔ adesa tsui mi níhi, kɛ e yi mi tomi kpo.

¹³ Nɔ́ ko nɔ́ ko be nɛ a kɛ laa Mawu. Nɔ́ tsuaa nɔ́ ngɛ je nɛ ɔ mi fɔɔ si paa ngɛ Mawu hɛ mi. Nɛ nɔ tsuaa nɔ maa bu lɛ nitsɛ e we akɔtaa ngɛ e hɛ mi.

Yesu ji osɔfo nɔkɔtɔma pe kulaa kpetekpleenyɛ

¹⁴ Nyɛ ha nɛ waa hɛɛ hemi kɛ yemi nɛ wa jajeɔ ɔ mi wawɛɛ. Ejakaa wa ngɛ osɔfo nɔkɔtɔma pe kulaa kpetekpleenyɛ nɛ po mi kɛ ho hiɔwe ya tɔɔ. Lɛ ji Yesu, Mawu Bi ɔ.

¹⁵ Wa osɔfo nɔkɔtɔma pe kulaa a, e pi nɔ nɛ be nyɛe maa nu wa gbɔjɔmi ɔmɛ a he ha wɔ. Osɔfo nɔkɔtɔma pe kulaa nɛ wa ngɛ ɔ, Abosiami ka lɛ ngɛ blɔ tsuaa blɔ nɔ kaa wɔ nɔuu, se lɛɛ e pee we yayami.

¹⁶ Lɔ ɔ he ɔ, nyɛ ha waa kɛ kã nɛ hɛ wɔ kɛ su Mawu dloomi sɛ ɔ he, bɔ nɛ pee nɛ a na wɔ mɔbɔ, nɛ wa na dloomi nɛ maa ye bua wɔ ngɛ be nɛ sa mi.