Hebribi 3 - BAIBLO ALOO NGMAMI KLƆUKLƆU Ɔ

Yesu pe Mose

¹ Ye nyɛmimɛ, nyɛ nihi nɛ nyɛ he tsɔ, nɛ Mawu tsɛ waa kɛ nyɛ tsuo, nyɛɛ hyɛ Yesu, hemi kɛ yemi nɛ wa jajeɔ ɔ he bɔfo, kɛ osɔfo nɔkɔtɔma pe kulaa a.

² E ye Mawu nɛ hla lɛ ke e tsu ní nɛ ɔ anɔkuale kaa bɔ nɛ Mose hu ye anɔkuale ngɛ Mawu we ɔ.

³ Kaa bɔ nɛ a buɔ nɔ nɛ maa tsu pe tsu ɔ nɛ e maa a, jã kɛ̃ bu ngɛ Yesu hu he hluu pe Mose.

⁴ Tsu tsuaa tsu ɔ, nɔ ko nɛ fiaa; se Mawu lɛ bɔ níhi tsuo.

⁵ Mose ye anɔkuale ngɛ Mawu we ɔ kulaa nɔ kaa sɔmɔlɔ, nɛ e ye odase ngɛ níhi nɛ a ma de hwɔɔ se ɔ a he.

⁶ Se Kristo lɛɛ e ye anɔkuale ngɛ Mawu we ɔ kaa Mawu bi. Ke waa kɛ kã kɛ gɛjɛmi hɛɛ hɛ kɛ nɔ fɔmi ɔ mi kpɛii ɔ, wa peeɔ Mawu we bi.

Mawu we bi maa jɔɔ a he

⁷ Lɔ ɔ he ɔ, kaa bɔ nɛ Mumi Klɔuklɔu ɔ deɔ ɔ, “Mwɔnɛ ɔ, ke nyɛ nu e gbi ɔ,

⁸ nyɛ ko wa tue kaa bɔ nɛ nyɛ nɛmɛ ɔmɛ pee ngɛ nga a nɔ benɛ a tsɔ atuã, nɛ a ka Mawu ɔ.

⁹ Lejɛ ɔ nyɛ nɛmɛ ɔmɛ ka mi ngɛ, pohu a na níhi nɛ i tsu jeha nyingmi eywiɛ sɔuu.

¹⁰ Lɔ ɔ he ɔ, ye mi mi fu jamɛ a yi nɔ bi ɔmɛ, nɛ i de ke, ‘Daa nɛ ɔ, a dɔ a tsui kɛ je ye he, nɛ a li ye blɔ ɔmɛ.’

¹¹ Ye mi mi fu mɛ, nɛ i ka kita ke, ‘Ke a nane ma he nɛ i to nɛ a jɔɔ a he ngɛ ɔ fii!’ ”

¹² Ye nyɛmimɛ, nyɛɛ hyɛ saminya, konɛ nyɛ ti nɔ ko kó hɛɛ juɛmi yaya nɛ be hae nɛ e he ye, nɛ e ko ba tsɔ Mawu hɛ kalɔ ɔ hɛ mi atuã.

¹³ Mohu ɔ, nyɛɛ kɛ nyɛ sibi nɛ tu he wami womi munyu daa ligbi nɛ nyɛ ma nyɛ ma de ke “mwɔnɛ ɔ.” Kɛkɛ ɔ, yayami be nyɛ ti nɔ ko sisie nɛ e gbo Mawu tue.

¹⁴ Ejakaa wa hɛ nɛ wa kɛ fɔ Kristo nɔ kɛ je sisije ɔ, ke wa hɛɛ mi kpɛii hluu kɛ ya si nyagbe ɔ, lɛɛ wa peeɔ nihi nɛ a kɛ Kristo pee kake.

¹⁵ Kaa bɔ nɛ ngmami ɔ deɔ ɔ, “Mwɔnɛ ɔ, ke nyɛ nu e gbi ɔ, nyɛ ko wa tue kaa bɔ nɛ nyɛ nɛmɛ ɔmɛ pee benɛ a tsɔ Mawu hɛ mi atuã a.”

¹⁶ Mɛnɔmɛ lɛ a nu Mawu gbi, nɛ a tsɔ atuã a? Anɛ pi nihi nɛ Mose kɛ mɛ je Egipt ɔ tsuo lo?

¹⁷ Mɛnɔmɛ lɛ Mawu mi mi fu mɛ jeha nyingmi eywiɛ sɔuu ɔ? Anɛ pi mɛ ji nihi nɛ pee yayami nɛ a fiaa si gbo ngɛ nga a nɔ ɔ lo?

¹⁸ Benɛ Mawu ka kita ke, “He nɛ i to kaa a ya jɔɔ a he ngɛ ɔ, ke a nane ma lejɛ ɔ fii” ɔ, mɛnɔmɛ e ngɛ dee? Anɛ pi nihi nɛ gbo tue ɔ lo?

¹⁹ Lɔ ɔ he ɔ, wa naa kaa a nyɛ we nɛ a ya su lejɛ ɔ; ejakaa a he we Mawu yi.