Hebribi 2 - BAIBLO ALOO NGMAMI KLƆUKLƆU Ɔ

Yi wami hemi kpetekpleenyɛ

¹ Enɛ ɔ he ɔ, e sa kaa waa pɛtɛ níhi nɛ wa nu ɔ a he saminya, konɛ wa ko gba kɛ je he.

² Sɛ gbi nɛ Mawu bɔfo ɔmɛ kɛ ba a ngɛ mi sisiisi; nɛ nɔ tsuaa nɔ nɛ gbo tue, loo e bui ɔ, a gbla e tue bɔ nɛ sa lɛ.

³ Ke wɔɔ lɛɛ wa bui yi wami hemi kpetekpleenyɛ nɛ ɔ, kɛ wa maa pee kɛ ye wa he kɛɛ? Nyɔmtsɛ ɔ nitsɛ lɛ tu yi wami hemi nɛ ɔ he munyu kekle; nɛ nihi nɛ nu ɔ, mɛ hu a ma nɔ mi ha wɔ.

⁴ Mawu nitsɛ pee okadi kɛ nyakpɛ ní slɔɔtohi babauu kɛ ye yi wami hemi nɛ ɔ he odase. Jehanɛ hu, e dla Mumi Klɔuklɔu nike ní ɔmɛ ngɔ ha kaa bɔ nɛ lɛ nitsɛ e suɔ kɛ ma nɔ mi.

Nɔ nɛ haa nɛ wa yi naa wami

⁵ Je nɛ maa ba nɛ wa ngɛ he munyu tue ɔ, Mawu ha we Mawu bɔfohi he blɔ nɛ a ye tsɛ ngɛ nɔ.

⁶ Odase nɛ nɔ ko ye ngɛ ngmami ɔ he ko ji nɛ ɔ nɛ: “Mɛni ji nɔmlɔ adesa, nɛ o susuɔ e he? Mɛni ji nɔmlɔ bi, nɛ o hyɛɛ e nɔ?

⁷ Nɛ o bɔ lɛ ɔ, nɔ́ ko bɔɔ pɛ o ha bɔfo ɔmɛ kɛ pe lɛ. O wo e hɛ mi nyami, nɛ o ha bu ba e he.

⁸ O pee lɛ níhi tsuo a nɔ yelɔ.” Jehanɛ ɔ, ke kaa Mawu pee adesa níhi tsuo a nɔ yelɔ, lɛɛ nɔ́ ko be nɛ adesa be he wami ngɛ nɔ. Anɔkuale mi ɔ, wa nɛ́ kaa adesa ngɛ tsɛ yee ngɛ níhi tsuo a nɔ amlɔ nɛ ɔ.

⁹ Se Yesu lɛɛ wa na kaa gbenɔ mi amanehlu ɔ nɛ e na a ha nɛ a kɛ hɛ mi nyami kɛ bu fi lɛ jlasi. Nɛ Mawu bɔ lɛ ɔ, nɔ́ ko bɔɔ pɛ e ha bɔfo ɔmɛ kɛ pe lɛ. Mawu pee lɛ jã, konɛ lɛ Mawu ɔ dloomi ɔ nya a, Yesu nɛ ba gbo kɛ ha nihi tsuo.

¹⁰ Nɛ e sa hu kaa Mawu nɛ bɔ níhi tsuo, nɛ́ lɛ nɔuu lɛ e ha nɛ ní ɔmɛ tsuo ngɛ ɔ, e ha a yi wami hemi sisi jelɔ ɔ nɛ ba na amanehlu, nɛ e kɛ dla lɛ kɛ pi si, konɛ e wo bimɛ babauu a hɛ mi nyami.

¹¹ Ejakaa nɔ nɛ tsuɔ nihi a he, kɛ ni nɛmɛ e tsu a he ɔ tsuo a tsɛ kake. Enɛ ɔ he je ɔ, e pee we Yesu zo kaa e ma tsɛ mɛ nyɛmimɛ.

¹² E deɔ Mawu ke, “Ma wo o biɛ ta ha ye nyɛmimɛ ɔmɛ, nɛ i kɛ asafo ɔ ma la kɛ je o yi.”

¹³ E deɔ hu ke, “Ma ngɔ ye hɛ kɛ fɔ Mawu nɔ.” E kpale deɔ hu ke, “Ne mi kɛ bimɛ nɛ Mawu ha mi ɔ.”

¹⁴ Lɔ ɔ he ɔ, akɛnɛ he lo kɛ muɔ ji bimɛ ɔmɛ ɔ, lɛ nitsɛ hu e pee he lo kɛ muɔ. E pee enɛ ɔ, konɛ kɛ gu e gbenɔ mi ɔ, e kpata Abosiami, nɔ nɛ hɛɛ gbenɔ he wami ɔ hɛ mi.

¹⁵ Kɛkɛ ɔ, e ma ha nihi nɛ a wami be tsuo a ngɛ gbenɔ gbeye yee, nɛ a pee yoyooyo kaa nyɔguɛhi ɔ maa ye a he.

¹⁶ Niinɛ, e fɔɔ si paa kaa tsa pi Mawu bɔfohi a he nɛ e ba ngɛ, se mohu Abraham nina a he.

¹⁷ Enɛ ɔ tsɔɔ kaa blɔ tsuaa blɔ nɔ ɔ, e hia kaa Yesu nɛ pee kaa e nyɛmimɛ ɔmɛ. Kɛkɛ ɔ, e maa pee osɔfo nɔkɔtɔma pe kulaa anɔkualetsɛ, kɛ mɔbɔ nalɔ nɛ ngɛ Mawu sɔmɔe, nɛ e kɛ e he nɛ sã kpatami bɔ, konɛ Mawu nɛ ngɔ a he yayamihi kɛ pa mɛ.

¹⁸ Jehanɛ lɛɛ, nihi tsuo nɛ ngɛ ka mi ɔ, e ma nyɛ maa wo mɛ he wami; ejakaa lɛ nitsɛ ɔ, a ka lɛ, nɛ e na amanehlu.