Hebribi 12 - BAIBLO ALOO NGMAMI KLƆUKLƆU Ɔ

Wa Tsɛ Mawu

¹ Amlɔ nɛ ɔ, nyɛɛ hyɛ nimli kpekpemi nitsɛnitsɛ kaa bɔku nɛ tsu a hemi kɛ yemi he ní nɛ bɔle wɔ kɛ kpe. Lɔ ɔ he ɔ, níhi tsuo nɛ tsiɔ wɔ blɔ, titli ɔ, yayami peemi nɛ gblaa wɔ se ɔ, nyɛ ha waa ngmɛɛ he, konɛ waa kɛ hɛ mi miami nɛ tu fo nɛ fɔɔ si ngɛ wa hɛ mi ɔ.

² Nyɛ ha waa hyɛ Yesu, ejakaa e nɔ wa hemi kɛ yemi ɔ daa si ngɛ. Akɛnɛ e le bua jɔmi nɛ e ma na pee se he je ɔ, gbenɔ nɛ e ma gbo ngɛ sɛumi tso ɔ nɔ ɔ pi zo nɔ́ ko kulaa kɛ ha lɛ. Mohu ɔ, e to e tsui si kɛ na amanehlu ngɛ sɛumi tso ɔ nɔ, nɛ amlɔ nɛ ɔ, e hii si ngɛ Mawu matsɛ sɛ ɔ hiɔ nɔ.

³ Nyɛ susu si nɛ yayami peeli te ngɔ wo lɛ ɔ, kɛ bɔ nɛ e to e tsui si kɛ na nɔ́ wawɛɛ ɔ he, konɛ pɔ ko tɔ nyɛ, nɛ nyɛ kɔni mi ba jɔ̃.

⁴ Ta nɛ nyɛɛ kɛ yayami ngɛ hwue nɛ ɔ, nyɛ sui he nɛ a ma de ke a ma pue nyɛ muɔ si ngɛ ɔ lolo.

⁵ Anɛ nyɛ hɛ je bua womi munyu nɛ kɛ nyɛ tuɔ munyu kaa bɔ nɛ a kɛ bimɛ tuɔ munyu ɔ nɔ lo? “Ye bi, koo ngɔ Nyɔmtsɛ ɔ tsɔsemi ɔ kaa nɔ́ ko nyafii; nɛ jehanɛ ke e gbla o tue ɔ, ko ha o nine mi nɛ wo nyu.

⁶ Ejakaa nɔ nɛ Nyɔmtsɛ ɔ suɔ ɔ lɛ e tsɔseɔ, nɛ e fiaa nɔ tsuaa nɔ nɛ e ngɔ peeɔ e bi ɔ kpa.”

⁷ Nyɛɛ to nyɛ tsui si ngɛ nɔ́ nɛ nyɛ ngɛ nae ɔ mi kaa Mawu lɛ ngɛ nyɛ tsɔsee kaa e bimɛ ji nyɛ. Te bi nɛ ngɛ nɛ e fɔli tsɔse we lɛ nɛɛ?

⁸ Tsɔsemi nɛ a haa nihi tsuo ɔ, ke nyɛɛ lɛɛ nyɛ na we ɔ, lɛɛ ajuama mi bimɛ ji nyɛ, nɛ nyɛ pi e bimɛ nitsɛnitsɛmɛ.

⁹ Jehanɛ hu, adesa blɔ fa mi ɔ, wa ngɛ tsɛmɛ nɛ tsɔseɔ wɔ, nɛ wa buɔ mɛ. Anɛ e sɛ kaa wa baa wa he si ha Tsɛ ɔ nɛ ngɛ mumihi a nɔ he wami ɔ, konɛ wa yi nɛ na wami lo?

¹⁰ Wa tsɛmɛ ɔmɛ tsɔseɔ wɔ be bɔɔ ko kɛkɛ bɔ nɛ sa mɛɛ a hɛ mi; se Mawu lɛɛ e tsɔseɔ wɔ, bɔ nɛ pee nɛ e hi ha wɔ, nɛ wɔ hu waa pee klɔuklɔu kaa lɛ.

¹¹ Be mi nɛ a ngɛ nɔ ko tsɔsee ɔ, bua jɔmi be mi; e dɔɔ lɛ wawɛɛ. Nihi nɛ a tsɔse mɛ ɔ, pee se ɔ, a naa he se; a yeɔ dami sane, nɛ enɛ ɔ he ɔ, a hii si ngɛ he jɔmi mi.

Ga womi kɛ kɔkɔ bɔmi

¹² Lɔ ɔ he ɔ, nyɛ ninehi nɛ mi jɔ, kɛ nakutsohi nɛ ngɛ kpokpoe ɔ, nyɛ wlua nyɛ, nɛ nyɛ nɔ gbagba nɛ te.

¹³ Nyɛɛ nyɛɛ blɔ nɛ da nɔ, konɛ glɔ̃ nane ɔ kó to kpa, se mohu a tsa lɛ.

¹⁴ Nyɛɛ bɔ mɔde nɛ nyɛɛ kɛ nihi tsuo nɛ hi si ngɛ tue mi jɔmi mi. Nyɛɛ bɔ mɔde nɛ nyɛɛ pee klɔuklɔu, ejakaa nɔ nɛ be klɔuklɔu ɔ, e be Nyɔmtsɛ ɔ nae.

¹⁵ Nyɛɛ hyɛ nɛ hi nɛ Mawu dloomi ɔ kó bɔ nɔ ko. Nyɛɛ hyɛ nɛ nɔ ko nɔ́ ko ko dɔ nyɛ kadikadi nɛ ba ble níhi babauu kɛ puɛ ní.

¹⁶ Nɔ ko kó pee e he yaholɔ, loo mu ní tsulɔ kaa Esau, nɔ nɛ jua e tɛte blɔ nya kɛ he niye ní nya mi bɔ kake ɔ.

¹⁷ Nyɛ le kaa pee se benɛ e hla kaa e tsɛ nɛ gbaa lɛ ɔ, e tsɛ ɔ kplɛɛ we. Esau kɛ hɛdɔ fo ya kaa e ma kpale e nya se, se e na we he blɔ.

¹⁸ Pi Sinai yo ɔ nɛ a be nyɛe maa ta he ɔ he nɛ nyɛ ba. Be ko benɛ Israel bi ɔmɛ ya lejɛ ɔ, diblii, kɛ bɔku wo kpii, kɔɔhiɔ hia huu, nɛ la ngɛ tsoe plamplam ngɛ yo ɔ nɔ.

¹⁹ Titimati ngɛ pɛe, nɛ nɔ ko ngɛ munyu tue. Benɛ a nu gbi ɔ, a kpa pɛɛ ke a ko de nɔ́ ko kɛ piɛ he hu.

²⁰ Ejakaa mlaa a nɛ a wo mɛ ke, “Ke lohwe tete nane sa yo ɔ he ɔ, a fia lɛ tɛ nɛ a gbe” ɔ, a be nyɛe nɔ nɛ a ye.

²¹ Niinɛ, nɔ́ nɛ a je kpo tsɔɔ mɛ ɔ he ngɛ gbeye tsɔ; nɛ Mose nitsɛ po de ke, “I ngɛ gbeye yee, nɛ ye he ngɛ doe blibliibli.”

²² Amlɔ nɛ ɔ lɛɛ nyɛ ba su Zion yo ɔ, nɛ ji Mawu hɛ kalɔ ɔ ma a he. Nyɛ ba su hiɔwe Yerusalem ngɛ Mawu kɛ e bɔfohi babauu nɛ a be nyɛe kanemi, nɛ a bua kɛ ngɛ nyae ɔ a ngɔ.

²³ Nyɛ ba sɛ bitɛtehi nɛ a ngma a biɛ ngɛ hiɔwe ɔ a kpɛti. Mawu nɛ ji adesahi tsuo a kojolɔ ɔ, kɛ mumihi nɛ hɛɛ nihi nɛ peeɔ nɔ́ nɛ da, nɛ a ha a hi kɛ pi si ɔ, a hɛ mi nyɛ ba nɛ ɔ nɛ.

²⁴ Yesu, nɔ nɛ ha a so somi he ɔ, e ngɔ nyɛ ba nɛ ɔ nɛ. Muɔ nɛ a fĩa, nɛ tsuɔ ní kpakpahi nɛ pe Habel nɔ́ ɔ he nyɛ ba a nɛ.

²⁵ Lɔ ɔ he ɔ, nɔ nɛ kɛ nyɛ ngɛ munyu tue ɔ, nyɛɛ bu lɛ tue. Nihi nɛ bui nɔ nɛ bɔ mɛ kɔkɔ ngɛ zugba a nɔ tue ɔ, a yi a he. Nɛ wɔɔ lɛɛ ke nɔ nɛ je hiɔwe ɔ kɛ wɔ ngɛ munyu tue nɛ wa bui lɛ tue ɔ, kɛ wa maa pee kɛ ye wa he kɛɛ?

²⁶ Jamɛ a be ɔ mi ɔ, gbi nɛ Mawu wo ɔ ha nɛ zugba a mimiɛ; se jehanɛ lɛɛ e wo si ke, “Pi zugba a kɛkɛ nɛ ma mimiɛ si kake ekohu, se mohu ma ha nɛ hiɔwe hu ma mimiɛ kɛ piɛ he.”

²⁷ Munyu, “Si kake ekohu” ɔ, tsɔɔ paa kaa níhi nɛ a bɔ nɛ a mimiɛ ɔ maa je a hi he, konɛ níhi nɛ a be nyɛe ma mimiɛ ɔ nɛ a hi si daa.

²⁸ Lɔ ɔ he ɔ, nyɛ ha waa na Mawu si, ejakaa e ha wɔ blɔ nya nɛ waa ye tsɛ nɛ be tsakee gblegbleegble. Nyɛ ha waa ngɔ bu, kɛ gbeye yemi kɛ ba ja lɛ kɛ wa tsui tsuo bɔ nɛ maa sa e hɛ mi;

²⁹ ejakaa wa Mawu ɔ, la nɛ kpataa nɔ́ hɛ mi pɛsɛpɛsɛ ji lɛ.