Hebribi 11 - BAIBLO ALOO NGMAMI KLƆUKLƆU Ɔ

Hemi kɛ yemi

¹ Hemi kɛ yemi ji níhi nɛ wa ngɛ blɔ hyɛe ɔ a nɔ mi mami. Hemi kɛ yemi tsɔɔ wɔ kaa níhi nɛ wa nɛ́ kɛ wa hɛngmɛ ɔ, a ngɛ niinɛ.

² Hemi kɛ yemi lɛ ha nɛ Mawu ná nihi nɛ hi si blema a a he bua jɔmi.

³ Hemi kɛ yemi lɛ ha wa nu sisi kaa Mawu munyu a kɛ bɔ je ɔ. Enɛ ɔ tsɔɔ kaa níhi nɛ wa nɛ́ ɔ, lɔ ɔmɛ Mawu ngɔ kɛ pee níhi nɛ wa naa a.

⁴ Hemi kɛ yemi Habel kɛ sã bɔ nɛ sa Mawu hɛ mi kulaa pe Kain nɔ́ ɔ. Kɛ gu e hemi kɛ yemi ɔ nɔ ɔ, Mawu bu lɛ nɔ nɛ peeɔ nɔ́ nɛ da; ejakaa Mawu nitsɛ bua jɔ e nike ní ɔ he. Amlɔ nɛ ɔ, Habel be je mi lɛɛ, se kɛ gu hemi kɛ yemi ɔ nɔ ɔ, e kɛ wɔ ngɛ munyu tue kɛ mwɔɔ.

⁵ Hemi kɛ yemi he ɔ, a ngɔ Henok kɛ ho hiɔwe ya, konɛ e ko gbo. A nɛ́ lɛ, ejakaa Mawu ngɔ lɛ kɛ je. Ngmami ɔ ye odase kaa loko a maa ngɔ lɛ kɛ ho ɔ, e pee nɔ́ nɛ sa Mawu hɛ mi.

⁶ Ke nɔ ko be hemi kɛ yemi ɔ, e be nyɛe maa sa Mawu hɛ mi. Ejakaa e hia kaa nɔ tsuaa nɔ nɛ maa hɛ lɛ kɛ su Mawu he ɔ, e he ye kaa Mawu ngɛ; nɛ nihi nɛ hlaa e se blɔ ɔ, e gbaa mɛ.

⁷ Hemi kɛ yemi lɛ ha nɛ Noa bu Mawu tue, benɛ e de lɛ ke nɔ́ ko ma nɛ bɛ hyɛ ɔ. E kpɛ lɛ nɛ a kɛ he e kɛ e yo kɛ e bimɛ a yi wami. Kɛ gu enɛ ɔ nɔ ɔ, je ɔ yeɔ fɔ kaa a pee yayami; se Noa lɛɛ Mawu wo lɛ nguɔ kaa nɔ nɛ peeɔ nɔ́ nɛ da ngɛ hemi kɛ yemi nya.

⁸ Hemi kɛ yemi lɛ ha nɛ Abraham bu Mawu tue, benɛ a tsɛ lɛ nɛ a de lɛ ke e je he nɛ e ngɛ ɔ kɛ ya zugba nɛ ma ba pee e weto ní ɔ nɔ. Abraham pue nɔ kɛ ho, pohu e li he nɛ e yaa.

⁹ Hemi kɛ yemi lɛ ha nɛ Abraham ya to nubwɔ ngɛ zugba nɛ Mawu wo lɛ si ke e ma ha lɛ ɔ nɔ be saii. E kɛ Isak, kɛ Yakob nɛ siwo ɔ kɔɔ a he ɔ hi bo tsuhi a mi.

¹⁰ Ejakaa ma nɛ Abraham ngɛ blɔ hyɛe ji ma nɛ Mawu nitsɛ to sisi, nɛ lɛ nɔuu e fia.

¹¹ Hemi kɛ yemi lɛ ha Abraham na he wami nɛ a kɛ fɔɔ bi be mi nɛ e bwɔ, nɛ Sara nitsɛ hu pee yosa, ejakaa e bu nɔ nɛ wo lɛ si ɔ anɔkualetsɛ.

¹² Enɛ ɔ he ɔ, Abraham nɔ kake too nɛ ngɛ kaa nɔ ko nɛ yi ta a, e nina ba hiɛ babauu kaa dodoehi ngɛ hiɔwe, loo wo nya zia nɛ hi kanemi.

¹³ Nimli nɛ ɔmɛ tsuo nɛ he Mawu ye ɔ, nɔ́ nɛ a wo mɛ he si ɔ, a nine sui nɔ loko a gbo. A na ní ɔmɛ ngɛ lokoo kɛkɛ nɛ a nya he, nɛ a ye odase ngɛ ma hɛ mi kaa nibwɔhi, kɛ ma se bi kɛkɛ ji mɛ.

¹⁴ Enɛ ɔ tsɔɔ kaa nihi nɛ tuɔ munyu kikɛ nɛ ɔ, ngɛ mɛ nitsɛmɛ a ma hlae.

¹⁵ Ma mi he nɛ a je ɔ, a ngɛ he susue jinɛ a ko na he blɔ nɛ a kpale kɛ ho lejɛ ɔ ya.

¹⁶ Mohu ɔ, ma ko nɛ hi kulaa pe lɔ ɔ, nɛ ji ma nɛ ngɛ hiɔwe ji nɔ́ nɛ a ngɛ hlae. Lɔ ɔ he ɔ, e pee we Mawu zo kaa a ma tsɛ lɛ ke a Mawu; ejakaa e dla ma ko ngɔ to mɛ.

¹⁷ Hemi kɛ yemi lɛ ha nɛ Abraham ngɔ e bi Isak kɛ ha Mawu, benɛ Mawu ka lɛ hyɛ ɔ. E ngɛ mi kaa bi nɛ ɔ he si nɛ a wo Abraham lɛɛ, se kɛ̃ e pee klaalo kaa e maa ngɔ e bi kake too ɔ kɛ sã bɔ ha Mawu.

¹⁸ Mawu de Abraham ke, “O bi Isak lɛ ma ba wo nina ha mo.”

¹⁹ Abraham he ye kaa Mawu ngɛ he wami nɛ e kɛ ma tle Isak si kɛ je gbeje tete. Nɛ ke a ma de ngɛ blɔ ko nɔ ɔ, Mawu tle lɛ si kɛ je gbeje ha Abraham niinɛ.

²⁰ Hemi kɛ yemi lɛ Isak kɛ gbaa Yakob kɛ Esau kɛ ha hwɔɔ se je mi si himi.

²¹ Hemi kɛ yemi lɛ ha nɛ benɛ Yakob miɔ nɛ e ma gbo ɔ, e ma e yi si ngɛ e dɛma tso ɔ nɔ, nɛ e sɔle nɛ e gbaa Yosef bimɛ ɔmɛ.

²² Hemi kɛ yemi lɛ ha nɛ benɛ Yosef gbenɔ be su ta a, e tsɔɔ Isarel bi ɔmɛ bɔ nɛ a ma plɛ kɛ je Egipt ha, nɛ e de mɛ bɔ nɛ a pee e gbogboe ɔ hulɔ.

²³ Hemi kɛ yemi lɛ ha nɛ Mose fɔli ɔmɛ ngɔ lɛ kɛ laa nyɔhiɔ etɛ benɛ a fɔ lɛ ɔ. A na kaa e he ngɛ fɛu saminya, nɛ mlaa a nɛ Egipt matsɛ ɔ wo ɔ, a yi mlaa a he gbeye.

²⁴ Hemi kɛ yemi lɛ ha nɛ benɛ Mose ba wa a, e kplɛɛ we kaa a tsɛ lɛ Egipt matsɛ ɔ biyo ɔ bi.

²⁵ E suɔ mohu kaa e kɛ Mawu ma a nɛ na amanehlu pe nɔ́ nɛ e maa ye ngɔɔmi ngɛ yayami peemi mi be bɔɔ ko.

²⁶ Ngɛ Mose susumi nya a, ke a bɔ nɔ ko ahlua ngɛ Kristo ɔ he ɔ, juetli babauu nɛ ngɛ Egipt ɔ po he jua wɛ kaa lɔ ɔ, ejakaa e hɛ ngɛ hiɔwo nɛ e ma na hwɔɔ se ɔ nɔ.

²⁷ Hemi kɛ yemi lɛ ha nɛ Mose je Egipt nɛ e yi matsɛ ɔ mi mi fumi ɔ gbeye. E kpale we e se, ejakaa Mawu nɛ e nɛ́ kɛ e hɛngmɛ ɔ, e pɛtɛ e he wawɛɛ kaa nɔ́ nɛ e ngɛ lɛ hyɛe paa.

²⁸ Hemi kɛ yemi lɛ Mose kɛ to Hetsɔmi ɔ sisi, nɛ e fã Israel bi ɔmɛ ke a ngɔ muɔ kɛ fĩa a sinya tso ɔmɛ a he, bɔ nɛ pee nɛ bɔfo nɛ kpataa nɔ hɛ mi ɔ ko ba gbe Israel bi ɔmɛ a bitɛte ɔmɛ.

²⁹ Hemi kɛ yemi lɛ ha Israel ma a po Wo Tsu ɔ kaa nɔ́ nɛ zugba gbigbli nɔ nɛ a ngɛ nyɛɛe. Se benɛ Egipt bi ɔmɛ ka kaa mɛ hu a maa pee ja a, a tlɔ wo ɔ mi, nɛ a gbo.

³⁰ Hemi kɛ yemi nya nɛ Yeriko gbogbo ɔmɛ hule pue si benɛ Israel bi ɔmɛ bɔle ma a ligbi kpaago ɔ.

³¹ Hemi kɛ yemi lɛ ha nɛ Rahab, yaholɔ ɔ gbo we kɛ piɛ we tue gboli nɛ a kpata a hɛ mi ɔ a he, ejakaa nihi nɛ ya slaa zugba a, e he mɛ kɛ bua jɔmi.

³² Anɛ e hia kaa ma pa de nɔ́ ko lo? Be ngɛ jinɛ i ko sɛɛ nyɛ Gideon, Barak, Samson, Yefta, David, Samuel, kɛ gbali ɔmɛ tsuo a he ní.

³³ Hemi kɛ yemi lɛ ha nɛ nimli nɛ ɔmɛ kɛ mahi hwu ta, nɛ a ye kunimi; a ha nɛ jatahi ma a nya.

³⁴ Hemi kɛ yemi a kɛ gbe la nɛ ngɛ tsoe gegeege ngɛ hehi, hemi kɛ yemi ha a je klaate nya, e ha ni wudɔwudɔhi ba pee katsɛmɛ; a kɛ ta buli nɛ je ma se hwu ta, nɛ a ye kunimi.

³⁵ Kɛ gu hemi kɛ yemi nɔ ɔ, yi komɛ a weku li nɛ gbo ɔ, a tle mɛ si kɛ ba wami mi ekohu. A wa ni komɛ yi mi wawɛɛ, nɛ a kplɛɛ we kaa a maa ngmɛɛ a hemi kɛ yemi ɔ he, nɛ a ye a he. Mohu ɔ, a suɔ nɛ a na nɔ́ kɛ gbo, konɛ a tle mɛ si kɛ ba wami nɛ hi kulaa pe kekle nɔ ɔ mi.

³⁶ A ye ni komɛ a he fɛu; a fia ni komɛ kpa, nɛ ni komɛ lɛɛ a bɔ mɛ pã, nɛ a wo mɛ tsu.

³⁷ A fia ni komɛ tɛ nɛ a gbo; a kɛ sau poo ni komɛ a mi enyɔɔnyɔ; nɛ a kɛ klaate gbe ni komɛ. A bu jijɔ he womi, kɛ apletsi he womi kaa heha ní. A ye ohia, a wa mɛ yi mi, nɛ a pee mɛ nisɛ ní.

³⁸ Je ɔ sɛ́ nimli nɛ ɔmɛ! A wo lalaalo ngɛ nga kplanaa nɔ, kɛ yohi a nɔ. A hi tɛ puɔhi, kɛ muɔhi a mi.

³⁹ Hyɛ nihi abɔ nɛ he Mawu ye, nɛ a ngɛ odase kpakpa nɛ ɔ yee ngɛ a he! Se nɔ́ nɛ Mawu wo si ɔ, a ti nɔ ko nɔ ko nine sui nɔ.

⁴⁰ Ejakaa Mawu to blɔ nya kpakpa ha waa kɛ mɛ tsuo, nɛ ja wa piɛ he loko níhi maa hi kɛ pi si.