Hebribi 1 - BAIBLO ALOO NGMAMI KLƆUKLƆU Ɔ

Mawu tu munyu kɛ gu e Bi ɔ nɔ

¹ Blema a, Mawu kɛ wa nɛmɛ ɔmɛ tu munyu si abɔ kɛ gu gbali ɔmɛ a nɔ ngɛ blɔ slɔɔtohi babauu a nɔ;

² se mwɔnɛmwɔnɛ ɔ lɛɛ e Bi ɔ nɔ e gu nɛ e kɛ wɔ tu munyu. Lɛ nɔuu e nɔ Mawu gu kɛ bɔ je ɔ kɛ e mi ní tsuo, nɛ lɛ nɛ Mawu hla kaa e ye e ní tsuo.

³ Bɔ nɛ Mawu hɛ mi ngɛ nyami ɔ, jã nɔuu Bi ɔ hu hɛ mi ngɛ nyami. Bi ɔ ngɛ kaa Mawu pɛpɛɛpɛ. E kɛ e munyu ɔ he wami kpetekpleenyɛ ɔ hɛɛ je ɔ tsuo. Benɛ e ngɔ je ɔ he yayami tsuo kɛ ho ɔ, e ya hi si ngɛ hiɔwe ngɛ matsɛ ngua a hiɔ nɔ.

Mawu Bi ɔ ji ngua

⁴ Mawu ha nɛ e Bi ɔ pe hiɔwe bɔfo ɔmɛ tsuo kaa bɔ nɛ biɛ nɛ e wo lɛ ɔ hu he jua wa pe a nɔ́ ɔ.

⁵ Ejakaa Mawu de we e bɔfo ɔmɛ a ti eko hyɛ gblee ke, “Ye Bi ji mo; mwɔnɛ ɔ, i fɔ mo.” Nɛ Mawu tu we hiɔwe bɔfo ko he munyu hyɛ ke, “Ma pee e Tsɛ, nɛ e maa pee ye Bi.”

⁶ Se benɛ Mawu miɔ nɛ e maa tsɔ e bitɛte ɔ je ɔ mi ɔ, e de ekohu ke, “Ha nɛ Mawu bɔfo ɔmɛ tsuo nɛ a ja lɛ.”

⁷ Bɔfo ɔmɛ lɛɛ nɔ́ nɛ Mawu de ngɛ a he ji, “Mawu haa e bɔfo ɔmɛ peeɔ kaa kɔɔhiɔ, nɛ e tsɔli ɔmɛ peeɔ kaa la lilɛhi.”

⁸ Bi ɔ lɛɛ Mawu de ngɛ e he ke, “Mawu ji mo; o maa ye matsɛ kɛ maa ya neneene! Nɛ dami sane yemi maa pee o matsɛ tso.

⁹ O suɔ dami sane yemi; se mlaa nɔ tɔmi lɛɛ o nyɛ. Enɛ ɔ he je Mawu nɛ ji o Mawu ɔ pɔ mo nu, nɛ o na bua jɔmi kulaa pe o nyɛmimɛ ɔmɛ.”

¹⁰ Mawu de hulɔ ke, “Mo Nyɔmtsɛ, blema lokoo ɔ, mo lɛ o bɔ je ɔ; mo nitsɛ lɛ o bɔ hiɔwe kɛ zugba.

¹¹ A hɛ mi ma kpata, se moo lɛɛ o maa hi si daa.

¹² O maa ku a mi kaa a kuɔ tade mi; nɛ a hɛ mi ma kpa kaa bo kpaa. Se moo lɛɛ o ngɛ kaa bɔ nɛ o ngɛ ɔ kɛ̃; o be gboe gblegbleegble.”

¹³ Mawu de we Mawu bɔfo ɔmɛ a ti nɔ ko hyɛ ke, “Hii ye hiɔ nɔ kɛ yaa su be nɛ ma ngɔ o he nyɛli ɔmɛ kɛ pee nɔ́ nɛ o kɛ o nane maa nɔ.”

¹⁴ Mawu bɔfo ɔmɛ ɔ, mɛni ji a ní tsumi mɔ? Mumihi ji mɛ, nɛ a sɔmɔɔ Mawu. Ke Mawu ma he nɔ ko yi wami ɔ, mɛ lɛ Mawu tsɔɔ.