Hagai 2 - BAIBLO ALOO NGMAMI KLƆUKLƆU Ɔ

Yawɛ we he ɔ he fɛu

¹ Jamɛ a jeha a, nyɔhiɔ kpaagone ɔ we ligbi nɛ ji nyingmi enyɔ kɛ kake ɔ, Yawɛ tu munyu ekohu kɛ gu gbalɔ Hagai nɔ.

² E de Hagai ke e de Sheatiel bi Zerubabel, Yuda ma a amlaalo ɔ, kɛ Yehozadak bi Yoshua, osɔfo nɔkɔtɔma pe kulaa a, kɛ ma a tsuo ke,

³ “Anɛ nɔ ko ngɛ nyɛ kpɛti nɛ ma nyɛ kai bɔ nɛ Mawu we ɔ he fɛu ngɛ sa a lo? Jehanɛ lɛɛ kɛ nyɛ na lɛ kɛɛ? E peeɔ nyɛ kaa enɛ ɔ pí nɔ ko saasaa.

⁴ Se kɛ̃ ɔ, nyɛ ti nɔ ko nɔ ko kɔni mi ko wo nyu. Nyɛ tsu ní ɔ, ejakaa i kɛ nyɛ ngɛ.

⁵ Benɛ nyɛ maa je Egipt ɔ, i wo nyɛ si nɛ ɔ ke ye mumi ɔ kɛ nyɛ maa hi si daa. I kɛ nyɛ ngɛ kɛ mwɔɔ, lɔ ɔ he ɔ, nyɛ ko ye gbeye.

⁶ “E be kɛe kulaa nɛ ma mimiɛ hiɔwe, zugba, wo, kɛ zugba gbigbli ɔ tsuo ekohu.

⁷ Ma ngɔ je mahi tsuo ngɔ fia si, nɛ a maa muɔ a juetli babauu ɔ kɛ ba hiɛ ɔ, nɛ Mawu we ɔ ma hyi tɔtɔɔtɔ kɛ níhi nɛ a he jua wa.

⁸ Ye níhi ji je ɔ mi sika tsu, kɛ sika hiɔ tsuo.

⁹ Mawu we he ɔ maa hi fɛu pe momo ɔ. Ma ha kplɔkɔtɔ maa ba ye ma a nɔ, nɛ ni ɔmɛ maa hi si ngɛ tue mi jɔmi mi.” Yawɛ lɛ de.

Gbalɔ ɔ ya bi osɔfo ɔmɛ ga womi

¹⁰ Matsɛ Darius yi nɔ jeha nɛ ji enyɔ ɔ, nyɔhiɔ nɛɛne ɔ we ligbi nyingmi enyɔ kɛ eywiɛ ɔ, Yawɛ Tabohiatsɛ ɔ, kɛ gbalɔ Hagai tu munyu ekohu.

¹¹ E de ke, “Bi osɔfo ɔmɛ nɛ a tsɔɔ bɔ nɛ a buá sane nɛ ɔ he ha.

¹² Ke nɔ ko ngɔ lo kpɔ ko nɛ a gbaa nɔ ha Mawu kɛ je bɔ sami la tɛ ɔ mi, nɛ e hɛɛ kɛ yaa ngɛ e tade klɔii ɔ mi, ke e ha nɛ e tade ɔ sa niye ní kaa abolo, loo flɔɔ, loo wai, loo nu, loo niye ní saisaa ko he ɔ, anɛ jamɛ a niye ní ɔ hu maa pee nɔ́ nɛ a gbaa nɔ kɛ ha Mawu lo?” Osɔfo ɔmɛ ha heto ke, “Dɛbi!”

¹³ Jehanɛ, Hagai bi ke, “Ke nɔ ko ya ta gbogboe ko he kɛ ble e he, jehanɛ, ke kaa e ya ta niye ní nɛ ɔmɛ eko he ɔ, anɛ lɔ ɔ hu ma ble jamɛ a ní ɔmɛ hu lo?” Osɔfo ɔmɛ ha heto ke, “Ee, e bleɔ mɛ.”

¹⁴ Kɛkɛ nɛ Hagai de ke, “Yawɛ ke jã pɛpɛɛpɛ kikɛmɛ a ma nɛ ɔ kɛ e mi bi ngɛ ngɛ ye hɛ mi. Lɔ ɔ he ɔ, nɔ́ tsuaa nɔ́ nɛ a peeɔ, kɛ nihi tsuo nɛ a kɛ ba sãã bɔ ngɛ ye bɔ sami la tɛ ɔ nɔ ɔ, a ble lɛ momo.”

Yawɛ wo si ke e maa gbaa e ma a

¹⁵ Yawɛ ke, “Nɔ́ nɛ ba nyɛ nɔ loko nyɛ bɔni Yawɛ we ɔ mami ɔ, nyɛ nɛ́ lo?

¹⁶ Jamɛ a be ɔ mi ɔ, ke nyɛ ya blɛfo ngmɔ mi, nɛ nyɛ ngɛ blɔ hyɛe kaa nyɛ ma na susumi nɔ́ nyingmi enyɔ ɔ, susumi nɔ́ nyɔngma pɛ nyɛ naa. Nyɛ hyɛ blɔ kaa nyɛ ma na dã buɛ nyingmi enuɔ ngɛ wai muɔ ɔ mi; se nyingmi enyɔ pɛ nyɛ naa.

¹⁷ Imi nitsɛ lɛ i ha nyɛ ní ɔmɛ fu ja, nɛ kɔɔhiɔ nɛ nglaa ní, kɛ gbiɛ ngo ngu ba kpata nɔ́ tsuaa nɔ́ nɛ nyɛ gbo he dengme ɔ hɛ mi, se kɛ̃ ɔ, nyɛ tsakee we nyɛ tsui.

¹⁸ Mwɔnɛ ɔ ji nyɔhiɔ nɛɛne ɔ we ligbi nyingmi enyɔ kɛ eywiɛ, nɛ mwɔnɛ ɔ ligbi nɛ ɔ, a fia Mawu we ɔ sisi tomi ɔ gbe nya. Kɛ je mwɔnɛ ɔ kɛ yaa a, nyɛɛ to nɔ́ nɛ maa ba a he hɛ.

¹⁹ E ngɛ mi kaa blɛfo be gba mi, nɛ wai tso ɔmɛ, ngmɔkɔ tso ɔmɛ, tsohi nɛ a yiblii ngɔɔ, kɛ oliv tso ɔmɛ wui yiblii lolo lɛɛ, se kɛ je mwɔnɛ ɔ ligbi nɛ ɔ kɛ yaa a, ma gbaa nyɛ.”

Yawɛ wo Zerubabel si

²⁰ Jamɛ a ligbi ɔ nɔuu nɛ ji nyɔhiɔ ɔ we ligbi nyingmi enyɔ kɛ eywiɛ ɔ, Yawɛ ha Hagai sɛ gbi enyɔne

²¹ nɛ e ya de Zerubabel, amlaalo nɛ hyɛɛ Yuda zugba a nɔ ɔ ke, “Ma mimiɛ hiɔwe kɛ zugba,

²² nɛ ma ngɔ nɔ yemi ɔmɛ kɛ a he wami ɔmɛ ngɔ fia si. Ma ha ta zugba lɛ ɔmɛ maa nɔɔ si kɛ a kudɔli ɔmɛ; okpɔngɔ ɔmɛ ma gbo, nɛ a nɔ hili ɔmɛ maa gbe a sibi.

²³ Jamɛ a ligbi ɔ, ma ngɔ mo, ye tsɔlɔ Zerubabel, Sheatiel bi ɔ, nɛ ma wo mo tsɛ ngɛ ye biɛ mi. Mo ji nɔ nɛ i je blɔ hla.” Yawɛ Tabohiatsɛ ɔ lɛ de.