Habakuk 3 - BAIBLO ALOO NGMAMI KLƆUKLƆU Ɔ

Habakuk kue fami la nɛ a fia kpa saku kɛ to he

¹ Gbalɔ Habakuk fa kue ke,

² “Yawɛ lee, i nu nɔ́ nɛ o pee ɔ he, nɛ e ha nɛ i ye mo gbeye. Ní nguanguahi nɛ o tsu blema a, mo tsu ekohu wa yi nɔ nɛ ɔ. Ke o mi mi fu po, moo na mɔbɔ.

³ Mawu je Edom kɛ ma ekohu; Mawu Klɔuklɔu ɔ ngɛ si kplee ngɛ Paran yo ɔmɛ a nɔ kɛ ma. E hɛ mi nyami ɔ ha hiɔwe ɔ tsuo; nɛ a ngɛ e yi jee ngɛ je ɔ mi he tsuaa he.

⁴ E ma kɛ la nylamnylam kaa oslabai; la ngɛ pae plamplam kɛ ngɛ e dɛ mi jee; lejɛ ɔ e he wami ɔ hɔɔ si ngɛ.

⁵ E haa nɛ hiɔhi baa, nɛ gbenɔ nyɛɛɔ se.

⁶ Ke e da si ɔ, zugba a mimiɛɔ, ke e wo e hɛ mi nɔ kikɛ nɛ ɔ, ma amɛ a he doɔ blibliibli. E ywia blema yo ɔmɛ; e ba yoku ɔmɛ nɛ ngɛ daa a si; yo nɛ ɔmɛ a nɔ e nyɛɛ blema a nɛ.

⁷ I na nɛ sawale nu Kushan bi ɔmɛ, nɛ Midian bi ɔmɛ hu a he ngɛ doe blibliibli.

⁸ Yawɛ, anɛ pa amɛ lɛ a wo o mi mi la a lo? Aloo wo ɔ lɛ ha o hɛ dɔ, benɛ o hi bɔku ɔmɛ a nɔ kɛ nyɛɛ kaa ta zugba lɛ kɛ ya ye kunimi ɔ?

⁹ O je o kɛ̃ɛ̃ ɔ kpo, konɛ o tsɛ̃ o kɛ̃ɛ̃ mi bi ɔmɛ. Kɛkɛ nɛ o ha oslabai gba zugba a mi.

¹⁰ Benɛ yo ɔmɛ na mo ɔ, a he do blibliibli; hiɔmi nɛ pue si piapiaapia. Muɔ voo ɔ wo gbi, nɛ oslɔke fluku.

¹¹ Benɛ o kɛ̃ɛ̃ mi bi ɔmɛ ngɛ la pae kɛ fo vuu vuu, nɛ o we akplɔ ɔ ngɛ kpɛe nylamnylam ɔ, pu kɛ nyɔhiɔ daa si dii ngɛ a hi he ɔmɛ.

¹² Abofu o kɛ hia kɛ nyɛɛ je ɔ mi, nɛ o kɛ hɛdɔ naa je ma amɛ a nɔ.

¹³ O je kpo nɛ o ya he o ma a, kɛ matsɛ ɔ nɛ mo nitsɛ o hla a a yi wami. O fia yiwutsotsɛmɛ ɔmɛ a hɛ mi nyɛɛlɔ ɔ nɔ́ nɛ o gbe, nɛ o kpata e we bi ɔmɛ a hɛ mi butuu.

¹⁴ Benɛ he nyɛli ɔmɛ hia ta kɛ ma puu kaa ahumi, konɛ a ba gbɛ wɔ ngɔ fĩa, nɛ e pee mɛ kaa peepee ta wa he, nɛ balɔ ko be, lɔ ɔ a nine gbe wɔ ɔ, o tsɛ o kɛ̃ɛ̃ mi bi ɔmɛ kɛ ya na a tatsɛ nɔkɔtɔma a.

¹⁵ O kɛ o we okpɔngɔ ɔmɛ nyɛɛ wo ɔ nɔ gidigidi, kɛkɛ nɛ nyu babauu ɔ fia hwɔli.

¹⁶ I nu sane nɛ ɔmɛ tsuo, nɛ ye he do blibliibli; fɔ̃ ha ye nya bɔni domi. Ye nɔmlɔ tso ɔ pee sikplikpii, nɛ ye nane mi jɔ ngɛ ye sisi. Ma mlɛ dii kɛ yaa su be nɛ Mawu maa gbla nihi nɛ ba tua wɔ ɔ a tue.

¹⁷ Ke ngmɔkɔ tso gba we mɔmɔ, nɛ wai tso ɔmɛ wui yiblii, ke oliv nu bɛ, nɛ niye ní be ngmɔ ɔ nɔ, ke to ɔmɛ a hɛ mi kpata, nɛ na amɛ gbo ta tsu ɔ mi, ke ní nɛ ɔmɛ tsuo ba mi po,

¹⁸ ye bua maa jɔ, nɛ ma nya; ejakaa Yawɛ Mawu ɔ ji nɔ nɛ heɔ ye yi wami.

¹⁹ Nyɔmtsɛ Yawɛ lɛ haa mi he wami. Lɛ nɛ haa ye nane maa si saminya kaa bayelɔ nɔ́; nɛ i naa tue mi jɔmi ngɛ yo ɔmɛ a nɔ.”