Habakuk 1 - BAIBLO ALOO NGMAMI KLƆUKLƆU Ɔ

¹ Sɛ gbi nɛ Yawɛ ngɔ ha gbalɔ Habakuk ji nɛ ɔ nɛ.

Habakuk bi ke mɛni he je a yi dami sane

² Yawɛ lee, kɛ yaa su mɛni be ma fa kue kɛ tsɛ mo loko o maa bu mi tue, nɛ o ma kpɔ wɔ kɛ je yi wu tso níhi nɛ a ngɛ wɔ pee ɔ mi?

³ Mɛni he je o ha i ngɛ yayami kɛ haomi hyɛe kikɛ nɛ ɔ? Kɛ pee kɛɛ nɛ o ngɛ nɔ́ nɛ dɛ nɛ ɔ hyɛe, nɛ o pui mi ɔ? Hɛ mi kpatami kɛ yi wu tso níhi bɔle mi kɛ kpe; pɛ kɛ kunɔ ngɛ he tsuaa he.

⁴ Mlaa a he wami ɔ ta, nɛ dami sane yemi be hu; yayami peeli ye dali a nɔ, nɛ daa nɛ ɔ, a plɛ dami sane yemi hɛ mi ngɔ bu si.

Yawɛ ha heto

⁵ Kɛkɛ nɛ Yawɛ de e ma a ke, “Nyɛɛ hyɛ je ma amɛ nɛ bɔle nyɛ kɛ kpe ɔ; nyɛ maa na nyakpɛ níhi nɛ ma ha nyɛ he mi maa po. Ejakaa ma tsu ní tsumi ko ngɛ nyɛ be nɛ ɔ mi nɛ ke a sɛɛ ha nyɛ ɔ, nyɛ be hee maa ye.

⁶ Babilonia bi ɔmɛ hia ta kɛ ngɛ je ɔ mi tsuo kpae kɛ yaa ngɔ zugbahi nɛ pi a nɔ. A he ngɛ gbeye, nɛ a he sɔɔ kɛ ní puɛmi. Ma ha nɛ a maa te si kɛ wo nyɛ.

⁷ Ke a ma kikɛ nɛ ɔ, a he gbeye kɛ sawale nuɔ nihi. A woɔ a he nɔ, nɛ a peeɔ nɔ́ nɛ mɛ nitsɛmɛ a suɔ.

⁸ “A we okpɔngɔ ɔmɛ a he sɔɔ pe ngatsɛhi, nɛ a hɛ mi ngɛ klamaklama pe ogbeteehi nɛ hwɔ ngɛ mɛ yee. A we okpɔngɔ nɔ hili ɔmɛ jeɔ ma se lokoo kɛ baa, nɛ okpɔngɔ ɔmɛ a nane hii si sie glɛi glɛi glɛi! A ba yuɔ nɔ nɔ kaa bɔ nɛ kɔlehi peeɔ kɛ saa lohwehi nɛ a ya yeɔ ɔ.

⁹ “A tabo ɔmɛ kɛ yi wu tso hiaa ta kɛ ya tuaa a he nyɛli. Ke a ma kikɛ nɛ ɔ, a he sawale nuɔ ni ɔmɛ tsuo. Nihi nɛ a nuu mɛ nyɔguɛ ɔ a he hiɛ babauu kaa zia.

¹⁰ A yeɔ matsɛmɛ ɔmɛ a he fɛu, nɛ asafoatsɛmɛ ɔmɛ a he peeɔ mɛ muɔ. Mɔ nɛ he wa pi nɔ́ ko kulaa ngɛ a hɛ mi. A buaa zu nya glekugleku kɛ woɔ mɔ ɔ he, nɛ a ngɔɔ lɛ.

¹¹ Kɛkɛ ɔ, a woɔ fo kɛ jeɔ kaa kɔɔhiɔ; a peeɔ yayami nɛ a yeɔ fɔ; a he wami ji a mawu.”

Habakuk bi Yawɛ munyu ekohu

¹² Yawɛ, mo ji Mawu kɛ je blema lokoo. Ye Mawu ji mo, o ngɛ klɔuklɔu, nɛ o ngɛ daa kɛ daa. Yawɛ ye Mawu kɛ ye yi baalɔ; mo nitsɛ nɛ o hla Babilonia bi ɔmɛ, nɛ o ha a te si wo wɔ, konɛ a nyɛ nɛ a gbla wa tue.

¹³ Se kɛ pee kɛɛ nɛ o ngɛ yiwutsotsɛmɛ nɛ ɔmɛ hyɛe nɛ o de we nɔ́ ko ɔ? Mo nɛ o hɛngmɛ ngɛ klɔuklɔu, nɛ o hyɛ we nɔ yayami, loo nɔ́ nɛ dɛ ɔ, mɛni he je nɛ o ngɛ hyɛe nɛ nimli yayamihi ngɛ dali a hɛ mi kpatae, nɛ o de we nɔ́ ko ɔ?

¹⁴ Kɛ pee kɛɛ nɛ o ngɛ nimli adesahi pee kaa a peeɔ pa mi lo, loo kaa a peeɔ lohwe tsɔwi nɛ sãã si nɛ a be nɔ yelɔ ko nɛ tsɔɔ mɛ blɔ ɔ?

¹⁵ Babilonia bi ɔmɛ kɛ gbowe ngɛ nimli adesahi sae kaa a saa pa mi lo. A kɛ a ya amɛ gblaa mɛ kɛ yaa, nɛ a kɛ bua jɔmi heɔ ose kaa a nine gbe ní babauu.

¹⁶ A jaa a ya amɛ, nɛ a sãã bɔhi haa mɛ, ejakaa a ya amɛ haa mɛ ní kpakpahi.

¹⁷ Anɛ a kɛ klaate maa hi nihi gbee daa, nɛ a maa ya nɔ nɛ a kpata je ma amɛ a hɛ mi, nɛ a be mɔbɔ nae lo?