Galatabi 5 - BAIBLO ALOO NGMAMI KLƆUKLƆU Ɔ

Nyɛɛ pee nyɛ ní kaa nihi nɛ ye a he niinɛ

¹ Wa ye wa he. Ee, Kristo ha wa ye wa he. Nyɛɛ da si kpitikplii, konɛ nɔ ko kó ye nyɛ nyɔguɛ hu.

² Lɔ ɔ he ɔ, imi Paulo, i ngɛ nyɛ dee ke, ke nyɛ ha a po nyɛ ɔ, lɛɛ Kristo he be se nami ko kulaa kɛ ha nyɛ.

³ I ngɛ hae nɛ nyɛɛ nu sisi saminya kaa nɔ tsuaa nɔ nɛ ma ha nɛ a po lɛ ɔ, e hia doo kaa e ye mlaa a tsuo pɛpɛɛpɛ hu nɔ.

⁴ Nyɛ nihi nɛ nyɛ hlaa kaa nyɛ maa ye mlaa a nɔ, konɛ a dla nyɛɛ kɛ Mawu nyɛ kpɛti ɔ, pe nyɛ tsɔ nyɛ he kɛ je Kristo he ɔ nɛ. Enɛ ɔ tsɔɔ kaa nyɛ kua Mawu dloomi ɔ.

⁵ Wɔɔ lɛɛ wa hemi kɛ yemi ji Mawu ma dla waa kɛ lɛ wa kpɛti. Mawu mumi ɔ nɛ tsuɔ ní ngɛ wa mi ɔ lɛ ha wa ngɛ nɔ́ nɛ ɔ blɔ hyɛe ɔ nɛ.

⁶ Ke nɔ ko ngɛ Kristo mi ɔ, a po lɛ jio, a pui lɛ jio, lɔ ɔ tsu we nɔ́ ko. Nɔ́ nɛ he hia wawɛɛ mohu ji hemi kɛ yemi nɛ jeɔ kpo ngɛ suɔmi nɛ wa ngɛ kɛ ha wa nyɛmimɛ ɔ mi ɔ.

⁷ Jinɛ nyɛ ngɛ nyɛ he mɔde bɔe saminya. Se mɛnɔ po lɛ ba puɛ nyɛ tue nɛ nyɛ he we anɔkuale ɔ yi hu ɔ?

⁸ Kikɛmɛ a yi mi tsakemi ɔ, Mawu, nɔ nɛ hla nyɛ ɔ, pi lɛ nɛ pee.

⁹ “Masa bɔbɔyoo pɛ lɛ haa ma a tsuo fuɔ.”

¹⁰ Se imi lɛɛ i ngɔ ye hɛ ngɔ fɔ nyɛ nɔ. I le kaa nyɛ be nɔ kpa ko munyu nue. Nɔ tutuutu nɛ ngɛ nyɛ tue puɛe ɔ, Mawu maa gbla e tue kokooko!

¹¹ Ye nyɛmimɛ, ke i ngɛ fiɛe kɛ mwɔɔ ke e hia nɛ a po nɔ doo ɔ, lɛɛ mɛni he je a ngɛ mi yi mi wae kpamisa mɔ? Ke ja ji sane ɔ, lɛɛ Kristo sɛumi tso ɔ he sane ɔ nɛ i ngɛ fiɛe ɔ, e sɛ́ kaa e haoɔ nɔ ko.

¹² Nihi nɛ ngɛ nyɛ tue puɛe kikɛ nɛ ɔ, i na nɛ a puɛ mɛ, loo a ta mɛ nitsɛmɛ a he kɛkɛ nɛ e jɔ!

¹³ Ye nyɛmimɛ, nyɛɛ lɛɛ pe a hla nyɛ, konɛ nyɛ ba ye nyɛ he. Nyɛ he nɛ nyɛ ye nɛ ɔ, nyɛ ko ngɔ lɛ kaa blɔ nya nɛ nyɛ na nɛ nyɛɛ kɛ maa pee níhi nɛ nyɛ nɔmlɔ tso ɔ suɔ. Mohu ɔ, nyɛ ha nɛ nyɛ suɔmi ɔ nɛ je kpo ngɛ nyɛmimɛ a sɔmɔmi mi.

¹⁴ Ejakaa mlaa a tsuo nɔ yemi ɔ kpiti pomi ji, “Suɔ o nyɛmi kaa bɔ nɛ o suɔ mo nitsɛ o he.”

¹⁵ Se ke nyɛ pee nyɛ he lohwe dikali nɛ nyɛ ngɛ nyɛ he nɔ́ yeyee pee ɔ, lɔ ɔ lɛɛ nyɛ ma kpata nyɛ nitsɛmɛ nyɛ hɛ mi pɛsɛpɛsɛ.

Mawu mumi ɔ kɛ nɔmlɔ adesa su

¹⁶ I ngɛ nyɛ dee ke, nyɛ ha nɛ Mawu mumi ɔ nɛ tsɔɔ nyɛ bɔ nɛ nyɛ maa ba nyɛ je mi ha, konɛ nyɛ ko tsu nɔmlɔ tso ɔ suɔmi nya ní.

¹⁷ Ejakaa nɔ́ nɛ nɔmlɔ tso ɔ suɔ ɔ, pi lɔ ɔ nɛ mumi ɔ suɔ; nɛ nɔ́ nɛ mumi ɔ suɔ ɔ, pi lɔ ɔ nɛ nɔmlɔ tso ɔ suɔ. Nɔ́ enyɔ nɛ ɔmɛ kɛ a he yi. Enɛ ɔ tsɔɔ kaa nyɛ be nyɛe maa pee nyɛ nitsɛmɛ nyɛ suɔmi nya ní.

¹⁸ Se ke mumi ɔ lɛ tsɔɔ nyɛ blɔ ɔ, lɛɛ mlaa a yi nyɛ nɔ hu.

¹⁹ Ke nɔ ko peeɔ he lo ɔ nya ní ɔ, níhi nɛ jeɔ mi kɛ baa ji nɛ ɔmɛ nɛ: gba puɛmi, mu ní tsumi, yahomi,

²⁰ amaga jami, kunya tsumi, ninyɛ, pɛ hlami, hunga jemi, mi mi la womi, pɛ, mi gbami, nya hiɔmi,

²¹ hɛkɔ, dã demi, fiɛmi yaya, kɛ ní yaya peemi kpahi fuu kaa níhi nɛ i tsi a ta nɛ ɔ. I ka nyɛ hɛ mi momo ngɛ kikɛmɛ a je mi bami nɛ ɔmɛ a he, nɛ i ngɛ nyɛ kɔkɔ bɔe ekohu ke nihi nɛ peeɔ kikɛmɛ a ní nɛ ɔmɛ a nine be Mawu matsɛ yemi ɔ nɔ sue gblegbleegble.

²² Se Mawu mumi ɔ yiblii ji suɔmi, bua jɔmi, he jɔmi, tsui si tomi, mi mi himi, kpakpa peemi, hemi kɛ yemi,

²³ he si bami, kɛ he nɔ yemi. Enɛ ɔmɛ ɔ, mlaa ko mlaa ko tsi nya.

²⁴ Nihi nɛ ji Kristo Yesu we bi ɔ, akɔnɔ, kɛ he lo nya níhi nɛ a suɔ ɔ, a ngmɛɛ he kulaa kaa nɔ́ nɛ pe a sɛu ní ɔmɛ tsuo ngɛ sɛumi tso nɔ.

²⁵ Ke mumi ɔ lɛ haa wɔ wami ɔ, lɛɛ nyɛ ha nɛ e tsɔɔ wɔ blɔ hulɔ.

²⁶ Wa ko wó wa he nɔ; wa ko wo wa sibi a mi mi la, nɛ wa hɛ ko kɔ wa sibi a nɔ hulɔ.