Galatabi 4 - BAIBLO ALOO NGMAMI KLƆUKLƆU Ɔ

¹ Nɔ́ nɛ i ngɛ tsɔɔe ɔ ji kaa bi nɛ maa ye e tsɛ ní hwɔɔ se ɔ, amlɔ nɛ ɔ nɛ e wɛ lolo ɔ, slɔɔto ko be e kɛ nyɔguɛ a kpɛti, pohu lɛ ji gbosi ní ɔ tsuo yelɔ.

² E jokuɛwi a si ɔ, nihi hyɛɛ e kɛ gbosi ní ɔ tsuo nɔ hluu kɛ ya siɔ be nɛ e tsɛ to ɔ loko a ngɔɔ ní ɔmɛ kɛ woɔ e dɛ.

³ Jã kɛ̃ wɔ hu benɛ wa wɛ lolo ɔ, wa ngɛ kaa nyɔguɛhi; nɛ je nɛ ɔ mi kusumihi, kɛ mlaahi nɛ hɛɛ wɔ.

⁴ Se Mawu tsɔ lɛ nitsɛ e bi ɔ kɛ ba ngɛ be nɛ sa mi; yo nɛ fɔ lɛ, nɛ e ye Yuda bi a mlaa a hu nɔ.

⁵ E ba, konɛ e ba kpɔ nihi nɛ Yuda mlaa a ye mɛ nyɔguɛ ɔ, konɛ e pee mɛ Mawu bimɛ.

⁶ Mawu suɔ kaa e maa tsɔɔ nyɛ kaa e bimɛ ji nyɛ, lɔ ɔ he ɔ, e tsɔ e bi ɔ mumi ɔ kɛ ba wa tsui mi. Kɛkɛ ɔ, wa ma nyɛ ma de anɔkuale mi ke, “Mawu, wa tsɛ ji mo.”

⁷ Lɛɛ Mawu he ɔ, o pi nyɔguɛ hu, se mohu bi ji mo. Nɛ akɛnɛ bi ji mo ɔ, blɔ nya nɛ Mawu to ha e bimɛ ɔ, o nine maa su mo hu o nɔ́ nɔ.

Paulo ye tsui ngɛ Galatia bi ɔmɛ a he

⁸ Sa a nɛ nyɛ li Mawu ɔ, nibɔ níhi nɛ pi mawuhi ji mɛ ngɛ a bɔmi su nya a ye nyɛ nyɔguɛ.

⁹ Se jehanɛ nɛ nyɛ ba le Mawu, aloo ke ma de ɔ, Mawu mohu le nyɛ ɔ, mɛni he je nɛ nyɛɛ kɛ mumihi nɛ be he wami ko, nɛ a ní ngɛ mɔbɔ kikɛ nɛ ɔ, ekohu ɔ? Kɛ pee kɛɛ nɛ nyɛ ma ha nɛ a kpale ye nyɛ nyɔguɛ ɔ?

¹⁰ Nyɛ toɔ be titli komɛ, ligbi komɛ, nyɔhiɔ komɛ, kɛ jeha komɛ nɛ nyɛ kɛ peeɔ kusumi.

¹¹ E peeɔ mi kaa dengme tsuo nɛ i gbo ngɛ nyɛ he ɔ miɔ nɛ e pee yaka.

¹² Ye nyɛmimɛ, i kpa nyɛ pɛɛ, nyɛɛ kase mi. Nyɛ le, sa a, i ngɛ kaa nyɛ. Nyɛ pee we mi yayami ko.

¹³ Kaa bɔ nɛ nyɛ le ɔ, kekleekle ɔ nɛ i ba fiɛ sane kpakpa a ha nyɛ ɔ, i be he wami.

¹⁴ E ngɛ mi kaa ye hiɔ ɔ ha nɛ nyɛ gbo dengme babauu ngɛ ye he, se ye he pee we nyɛ tai, nɛ nyɛ kua we mi hulɔ; mohu ɔ, nyɛ he mi atuu kaa Mawu bɔfo. Ee, nyɛ he mi kaa Kristo Yesu nitsɛ.

¹⁵ Bua jɔmi nɛ nyɛ kɛ nya ye he jamɛ a be ɔ, jije e ngɛ amlɔ nɛ ɔ? Imi nitsɛ ma nyɛ ma ye odase kaa jamɛ a be ɔ, kaa e hi peemi ɔ, jinɛ nyɛ ko ta nyɛ hɛngmɛ tete po ngɔ ha mi.

¹⁶ Anɔkuale ɔ nɛ i de nyɛ ɔ, lɔ ɔ ha i ba pee nyɛ he nyɛlɔ; pi jã?

¹⁷ Ni ɔmɛ nɛ ngɛ nyɛ hɛ mi hae ɔ, nyɛ bu kaa a suɔ nyɛ; a be nyɛ he juɛmi kpakpa. A ngɛ hlae nɛ a puɛ i kɛ nyɛ wa kpɛti, konɛ nyɛ gbo mɛ mohu a he dengme.

¹⁸ Niinɛ, ke nɔ ko hɛɛ yi mi tomi kpakpa a, e sa kaa e gboɔ he dengme. E hia kaa nyɛɛ pee enɛ ɔ be tsuaa be, se pi ke i ba nyɛ ngɔ kɛkɛ.

¹⁹ Ye bimɛ nɛ i suɔ, nyɛɛ hyɛ bɔ nɛ i ngɛ haoe ngɛ nyɛ he ekohu kaa yo nɛ nu kɔɔmi, hluu kɛ yaa su be nɛ a maa na subai nɛ ngɛ Kristo mi ɔ ngɛ nyɛ mi.

²⁰ I na nɛ i ngɛ nyɛ kasa nya amlɔ nɛ ɔ, jinɛ i kɛ nyɛ ko tu munyu bɔ nɛ sa, ejakaa i ngɛ haoe wawɛɛ ngɛ nyɛ he.

Hagar kɛ Sara kaa nɔ hyɛmi nɔ́

²¹ Nyɛ nihi nɛ nyɛ ngɛ hlae kaa mlaa a nɛ ye nyɛ nɔ ɔ, nyɛ ha ma bi nyɛ nɔ́ ko. Nɔ́ nɛ mlaa a deɔ ɔ be mi lo?

²² A ngma ke Abraham ngɛ binyumuhi enyɔ; e kɛ yo nyɔguɛ fɔ nɔ kake, nɛ nɔ enyɔne ɔ lɛɛ e kɛ yo odehe ɔ nɛ fɔ lɛ.

²³ Bi nɛ e kɛ yo nyɔguɛ ɔ fɔ ɔ, a fɔ lɛ kɛkɛ; se bi nɛ yo odehe ɔ fɔ ɔ, Mawu wo e he si.

²⁴ Ní nɛ ɔmɛ daa si ngɛ ní pɔtɛɛ komɛ a nane mi. Yi enyɔ ɔmɛ daa si ha somi enyɔ. A kpɛti nɔ kake ji Hagar. E je Sinai yo ɔ nɔ; nɛ bimɛ nɛ e fɔ ɔ, nyɔguɛhi ji mɛ.

²⁵ Hagar ngɛ kaa Sinai yo ɔ nɛ ngɛ Arabia a. Lɔ ɔ ji Yerusalem ma nɛ ngɛ amlɔ nɛ ɔ, ejakaa e kɛ e mi bi ɔmɛ tsuo ngɛ nyɔguɛ yemi mi kɛ mwɔɔ.

²⁶ Se Yerusalem kaketsɛ ɔ nɛ lɛɛ a kɛ lɛ to hiɔwe he ɔ, lɛɛ e ji odehe. Lɛ ji wɔ tsuo wa nyɛ.

²⁷ Ejakaa ngmami ɔ de ke, “Mo yosa nɛ o fɔ we, mo nya! Mo nɛ o nui kɔɔmi hyɛ, hwɔ lele, nɛ o nya! Ejakaa yo nɛ e huno kua lɛ ɔ mohu e bimɛ hiɛ pe yogbayo nɛ ngɛ gba we daa a bimɛ.”

²⁸ Jehanɛ, ye nyɛmimɛ, wɔ lɛ a wo si kaa wa ma ba pee Mawu bimɛ, kaa bɔ nɛ a wo si loko a fɔ Isak ɔ nɛ.

²⁹ Jamɛ a be ɔ mi ɔ, nɔ nɛ a fɔ lɛ kaa a fɔɔ adesa kɛkɛ ɔ wa nɔ nɛ a wo e he si loko a fɔ lɛ ɔ yi mi. Ja nɔuu e ngɛ mwɔnɛmwɔnɛ ɔ hulɔ.

³⁰ Se kɛ ngmami ɔ deɔ kɛɛ? E deɔ ke, “Wo yo nyɔguɛ ɔ kɛ e bi ɔ blɔ nɛ a ho, ejakaa yo nyɔguɛ ɔ bi ɔ be he blɔ nɛ e kɛ yo odehe ɔ bi ɔ yeɔ gbosi ní.”

³¹ Lɔ ɔ he ɔ, ye nyɛmimɛ, pi yo nyɔguɛ ɔ bimɛ ji wɔ; odehe mohu ɔ bimɛ ji wi.