Galatabi 3 - BAIBLO ALOO NGMAMI KLƆUKLƆU Ɔ

Mlaa a, aloo hemi kɛ yemi

¹ Nyɛ Galatia bi nɛ nyɛ be yi! Mɛnɔ gbiɛ nyɛ ke nyɛ ko bu anɔkuale ɔ tue? Yesu gbenɔ nɛ e gbo ngɛ sɛumi tso nɔ ɔ, a tsɔɔ nyɛ nɛ nyɛ na paa.

² Nyɛ ha ma bi nyɛ nɔ́ kake. Mlaa a nɔ nɛ nyɛ ye, aloo sane kpakpa a nɛ nyɛ nu nɛ nyɛ he ye ɔ nɛ ha nyɛ na Mumi Klɔuklɔu ɔ?

³ Kikɛ nɛ ɔ nyɛ be yi! Nɛ nyɛ ngɔ Mumi Klɔuklɔu ɔ kɛ je sisi ɔ, jehanɛ lɛɛ nyɛɛ kɛ he lo maa gbe nya.

⁴ Amanehlu babauu nɛ nyɛ na a, anɛ e maa pee yaka? Dɛbi! I he we yi!

⁵ Mumi ɔ nɛ Mawu haa nyɛ, kɛ nyakpɛ níhi nɛ e tsuɔ ha nyɛ ɔ, anɛ mlaa a nɔ nɛ nyɛ yeɔ ɔ he je, aloo sane kpakpa a nɛ nyɛ nuɔ nɛ nyɛ heɔ yeɔ ɔ?

⁶ Ngmami ɔ ke, “A bu Abraham nɔ nɛ peeɔ nɔ́ nɛ da, ejakaa e he Mawu ye.”

⁷ Lɔ ɔ he ɔ, nyɛ ná nyɛɛ le kaa nihi nɛ heɔ Mawu yeɔ ɔ, mɛ ji Abraham nina.

⁸ Ngmami ɔ de to ke Mawu ma dla e kɛ ma je li nɛ heɔ yeɔ ɔ a kpɛti. E de Abraham sane kpakpa nɛ ɔ ke, “Mawu maa gu o nɔ kɛ maa gbaa ma je li ɔmɛ tsuo.”

⁹ Abraham he Mawu ye, nɛ Mawu gbaa lɛ. Nɔ tsuaa nɔ nɛ heɔ yeɔ ɔ, bɔ nɛ a gbaa Abraham ɔ, jã a maa gbaa lɛ.

¹⁰ Nihi nɛ susuu kaa ja a ye Yuda bi a mlaa a nɔ doo loko a ma he a yi wami ɔ, a gbiɛ mɛ. Ejakaa ngmami ɔ deɔ ke, “Mlaahi tsuo nɛ a ngma ngɛ Mawu mlaa womi ɔ mi ɔ, nɔ nɛ ma tɔ kake ngmelu nɔ ɔ, a gbiɛ lɛ.”

¹¹ Jehanɛ ɔ, e fɔɔ si paa kaa pi mlaa a nɔ nɛ nɔ ko yeɔ ɔ nɛ ma ha a ma dla e kɛ Mawu a kpɛti. Ejakaa ngmami ɔ deɔ ke, “Nɔ nɛ heɔ Mawu yeɔ, nɛ lɔ ɔ he ɔ, a dla e kɛ Mawu a kpɛti ɔ, lɛ pɛ e yi wami a ma he.”

¹² Se mlaa a kɔ we hemi kɛ yemi he; ejakaa a ngma ke, “Nɔ tsuaa nɔ nɛ yeɔ mlaa a nɔ sisiisi ɔ yi ma na wami ngɛ mlaa a nya.”

¹³ Wa he ɔ, Kristo ba plɛ nɔ nɛ a gbiɛ lɛ, konɛ gbiɛmi nɛ ko ba wa nɔ ngɛ mlaa a nya a, e je wɔ kɛ je mi. Ejakaa a ngma ke, “Nɔ tsuaa nɔ nɛ a sɛu lɛ ngɛ sɛumi tso nɔ ɔ, a gbiɛ lɛ.”

¹⁴ Kristo pee enɛ ɔ, bɔ nɛ pee nɛ gbaami nɛ Mawu wo Abraham si ngɛ he ɔ, kɛ gu Kristo nɔ ɔ, ma je li ɔmɛ a nine nɛ su nɔ. Kɛkɛ ɔ, kɛ gu hemi kɛ yemi nɔ ɔ, Mumi ɔ nɛ Mawu wo he si ɔ, wa nine maa su nɔ.

Mlaa a kɛ si womi ɔ

¹⁵ Ye nyɛmimɛ, i suɔ kaa ma ha nyɛ nɔ hyɛmi nɔ́ ko kɛ je wa je mi si himi mi. Ke ni enyɔ ma nɔ́ ko nya si, nɛ a pee womi ngɔ fɔ nɔ ɔ, nɔ ko nɔ ko be nyɛe maa po mi, loo e maa ngɔ nɔ́ kpa ko ngɔ piɛ he.

¹⁶ Abraham, kɛ e nina Mawu wo si ɔ nɛ. Ngmami ɔ de we ke, “Kɛ e nina amɛ”, kaa nɔ́ nɛ a he hiɛ, se mohu e de ke, “Kɛ o nina”, nɛ tsɔɔ kaa nɔ kake pɛ; nɛ lɛ ji Kristo.

¹⁷ Nɔ́ nɛ i ngɛ tsɔɔe ɔ ji kaa Mawu kɛ Abraham so, nɛ e wo si ke e maa ye nɔ. Mlaa a nɛ a wo jeha lafa eywiɛ kɛ nyingmi etɛ se ɔ be nyɛe maa po jamɛ a somi ɔ, kɛ si nɛ Mawu wo ɔ mi.

¹⁸ Gbosi ni ɔ nɛ Mawu wo Abraham e he si ɔ, Mawu ngɔ kɛ ha lɛ faa; pi mlaa a nɔ nɛ Abraham ye ɔ he je nɛ e ba mi. Kaa jã ji sane ɔ, lɛɛ e pi si womi hu.

¹⁹ Lɛɛ jehanɛ ɔ, mɛni ji mlaa a he se nami mɔ? A ha wɔ mlaa a, konɛ wa kɛ le wa tɔmi ɔmɛ hluu kɛ yaa su be nɛ Abraham bi ɔ nɛ a wo lɛ si ngɛ he ɔ maa ba. Jehanɛ hu, hiɔwe bɔfohi lɛ ngɔ mlaa a kɛ ba ha je ɔ kɛ gu adesa nɔ.

²⁰ Se Mawu lɛɛ lɛ nɔ kake too lɛ wo Abraham si ɔ nɛ; e gui nɔ ko nɔ ko nɔ.

Nɔ́ he nɛ a wo mlaa a

²¹ Anɛ enɛ ɔ tsɔɔ kaa mlaa a, kɛ si nɛ Mawu wo ɔ yɛ lo? Dɛbi! Mlaa a ma nyɛ ha nɔ wami jinɛ nɔ tsuaa nɔ nɛ yeɔ mlaa a nɔ ɔ, Mawu ma dla e kɛ lɛ a kpɛti.

²² Se ngmami ɔ deɔ ke, “Je ɔ tsuo hyi tɔ kɛ yayami sɔuu.” Lɔ ɔ he ɔ, nike ní nɛ a wo he si ɔ, nihi nɛ heɔ Yesu Kristo yeɔ ɔ, mɛ pɛ lɛ a nine maa su nɔ.

²³ Se benɛ Kristo na we nɛ e ba lolo ɔ, wɔ tsuo wa pee kaa nihi nɛ a wo mɛ tsu, nɛ mlaa a lɛ ngɛ wɔ blɔ tsɔɔe. Kikɛmɛ a si himi mi wa ngɛ hluu kɛ ya si Kristo ba.

²⁴ Lɔ ɔ he ɔ, mlaa a hɛɛ wɔ kɛ ya su be nɛ Kristo ba nɛ wa he lɛ ye, konɛ a dla waa kɛ Mawu wa kpɛti.

²⁵ Se amlɔ nɛ ɔ nɛ Kristo ba, nɛ wa he lɛ ye ɔ, pi mlaa a nɛ hɛɛ wɔ hu.

²⁶ Nɛ nyɛ he Kristo Yesu ye, nɛ nyɛ ngɛ e mi ɔ, lɔ ɔ ha nɛ nyɛ peeɔ Mawu bimɛ.

²⁷ Nyɛ nihi tsuo nɛ a sɔle nyɛ ngɔ wo Kristo mi ɔ, amlɔ nɛ ɔ, Kristo pee kaa tade nɛ nyɛ wo.

²⁸ Enɛ ɔ he je ɔ, slɔɔto ko kulaa be nyɛ kpɛti hu: Yuda no be ɔ, Hela no be; nyɔguɛ be ɔ, odehe be; nyumu be ɔ, yo be. Nɛ́ nyɛ tsuo nyɛ ngɛ Kristo Yesu mi nɛ ɔ, nyɛ tsuo nyɛ peeɔ nɔ kake.

²⁹ Ke Kristo we bi ji nyɛ ɔ, lɛɛ Abraham nina ji nyɛ, nɛ si nɛ Mawu wo ɔ nya a, nyɛ peeɔ gbosi ní yeli.