Galatabi 1 - BAIBLO ALOO NGMAMI KLƆUKLƆU Ɔ

^1-2 Imi bɔfo Paulo, kɛ nyɛmimɛ ɔmɛ kulaa nɛ kɛ mi ngɛ ɔ ngma womi nɛ ɔ ya ha Galatia asafo ɔmɛ. Pi nɔmlɔ nɛ pee mi bɔfo, nɛ pi adesa hu nɔ nɛ a gu kɛ hla mi ke ma ba pee bɔfo, se mohu Yesu Kristo, kɛ Tsɛ Mawu nɛ tle lɛ si kɛ je gbeje ɔ a nɔ i gu kɛ na blɔ nya nɛ ɔ.

³ Dloomi kɛ he jɔmi nɛ je Tsɛ Mawu ɔ, kɛ wa Nyɔmtsɛ Yesu Kristo dɛ mi ɔ ha nyɛ!

⁴ Yesu Kristo ngɔ e he ngɔ ha ngɛ wa he yayami ɔmɛ a he, konɛ a je wɔ kɛ je yi nɔ nɛ ɔ yi wu tso ní peemi ɔmɛ a mi. Enɛ ɔ ji wa Mawu, kɛ wa Tsɛ ɔ suɔmi nya ní.

⁵ A wo Mawu hɛ mi nyami kɛ je neneene kɛ ya neneene. Amen.

Sane kpakpa kake ɔ

⁶ Nyɛ he pee mi nyakpɛ. Hyɛ kaa e yi be ko kulaa nɛ nɔ nɛ tsɛ nyɛ kɛ gu Kristo dloomi ɔ nɔ ɔ, nyɛ kua lɛ, nɛ nyɛ ya ngɛ sane kpakpa kpa se nyɛɛe.

⁷ Oo, nyɛ bu kaa sane kpakpa kpa ko ngɛ he ko! Pe i de ja kɛkɛ; ejakaa ni komɛ ngɛ nyɛ kpɛti nɛ a ngɛ nyɛ tue puɛe; a ngɛ hlae kaa a ma tsake sane kpakpa a nɛ kɔɔ Kristo he ɔ hɛ mi.

⁸ Se ke e maa ba mi kaa wɔ, loo hiɔwe bɔfo ko po ma ba fiɛ sane kpakpa muno ko ha nyɛ ngɛ nɔ́ nɛ wa fiɛ momo ɔ se ɔ, musu tloo lɛ!

⁹ Wa de enɛ ɔ momo, se i ngɛ mi tie ekohu. I ngɛ dee ke, ke nɔ ko ba fiɛ sane kpakpa muno ko ngɛ nɔ́ nɛ nyɛ he ye momo ɔ se ɔ, jamɛ a nɔ ɔ, musu tloo lɛ!

¹⁰ Nɔ́ nɛ i ngɛ dee nɛ ɔ, anɛ e tsɔɔ kaa i ngɛ hlae nɛ ma sa adesa hɛ mi lo? Dɛbi! Nɔ́ nɛ i ngɛ hlae kɛkɛ ji kaa ma sa Mawu hɛ mi. Anɛ pe i ngɛ hlae nɛ nimli nɛ suɔ mi lo? Ke ja ji sane ɔ lɛɛ pi Kristo tsɔlɔ ji mi.

Bɔ nɛ pee nɛ Paulo plɛ bɔfo

¹¹ Nyɛmimɛ, i ngɛ hae nɛ nyɛɛ le kaa sane kpakpa a nɛ i fiɛ ha nyɛ ɔ, pi nimli a nya mi munyu.

¹² Pi adesa ko dɛ mi nɛ i na kɛ je, nɛ pi nɔmlɔ ko nɛ tsɔɔ mi hulɔ; Yesu Kristo nitsɛ nɛ je tsɔɔ mi.

¹³ Nyɛ nu bɔ nɛ i ba ye je mi sa a ngɛ Yuda bi a jami ɔ nya. Nyɛ nu bɔ nɛ i wa Mawu asafo ɔ yi mi wawɛɛ, nɛ i bɔ mɔde kaa ma kpata asafo ɔ hɛ mi pɛsɛpɛsɛ.

¹⁴ I tsu Yuda bi a jami ɔ he ní wawɛɛ pe wa juami bi Yuda fɔfɔɛhi babauu. I kɛ hɛdɔ tsu wa nɛmɛ ɔmɛ a kusumi ɔmɛ a he ní saminya.

¹⁵ Se, mamoo benɛ a na we nɛ a fɔ mi ɔ, jamɛ a be ɔ mi tɔɔ nɛ Mawu gu e dloomi ɔ nɔ nɛ e hla mi. Nɛ benɛ e to e yi mi kaa

¹⁶ e ma je e Bi ɔ ngɔ tsɔɔ mi, konɛ ma ya fiɛ sane kpakpa a ha ma je li ɔmɛ ɔ, i ya bi we ga womi ngɛ nɔ ko nɔ ko ngɔ.

¹⁷ Nihi nɛ sɛ ye hlami kɛ ngɛ ní tsue kaa bɔfohi ngɛ Yerusalem ɔ, mɛ tete po i yɛ nɛ ma ya na mɛ. Mohu ɔ, i pue nɔ amlɔ nɔuu kɛ ho Arabia ya. Lɔ ɔ se ɔ, i kpale kɛ ba Damasko.

¹⁸ Jeha etɛ se loko i ya Yerusalem ya na Petro, nɛ i ye ligbi nyɔngma kɛ enuɔ ngɛ e ngɔ.

¹⁹ Bɔfo kpa amɛ lɛɛ i nɛ a ti nɔ ko nɔ ko, pe Nyɔmtsɛ ɔ nyɛmi Yakobo pɛ.

²⁰ Nɔ́ nɛ i ngɛ nyɛ ngmae nɛ ɔ, Mawu ji ye we odase kaa i yi lakpa.

²¹ Pee se ɔ, i ya Siria, kɛ Kilikia kpokpa amɛ a nɔ.

²² Se kɛ ba si be nɛ ɔ tsuo Kristo asafo ɔmɛ nɛ ngɛ Yudea a li mi hɛ mi kɛ hɛ mi.

²³ Nihi a nya kɛkɛ a nuɔ ngɛ ke, “Nyumu ɔ nɛ wa wɔ yi mi sa a, hemi kɛ yemi ɔ nɛ e ka kaa e ma kpata hɛ mi ɔ, jehanɛ lɛɛ jamɛ a hemi kɛ yemi ɔ e ngɛ fiɛe.”

²⁴ Nɛ ye he ɔ, a wo Mawu hɛ mi nyami.