Filipibi 4 - BAIBLO ALOO NGMAMI KLƆUKLƆU Ɔ

Ga womi

¹ Ye nyɛmimɛ, nyɛɛ hyɛ bɔ nɛ i suɔ nyɛ ha! Nyɛɛ hyɛ bɔ nɛ ye hɛ ngɛ jae ngɛ nyɛ he ha! Nyɛ lɛ nyɛ haa mi bua jɔmi; nyɛ ngɛ kaa jlasi ngɛ ye yi! Ye nyɛmimɛ nɛ i suɔ. Kaa nihi nɛ ngɛ Nyɔmtsɛ ɔ mi ɔ, kikɛ nɛ ɔ pɛ ji bɔ nɛ sa nɛ nyɛɛ ba nyɛ je mi.

² I ngɛ nyɛmiyo Evodia, kɛ nyɛmiyo Sintika pɛɛ kpae kaa a pee kake ngɛ Nyɔmtsɛ ɔ he.

³ Nɛ mo, ye nyɛmi sɔmɔlɔ anɔkualetsɛ, i ngɛ mo pɛɛ kpae nɛ o ye bua yi nɛ ɔmɛ. Ejakaa a kɛ Klemente, kɛ nyɛmimɛ kpahi nɛ waa kɛ mɛ sɔmɔ ɔ, piɛ ye he kɛ tsu ní wawɛɛ kɛ fiɛ sane kpakpa a. A ngma nimli nɛ ɔmɛ tsuo a biɛ ngɛ Mawu wami womi ɔ mi.

⁴ Kaa nihi nɛ ngɛ Nyɔmtsɛ ɔ mi ɔ, nyɛ bua nɛ jɔ daa! I ngɛ dee ekohu ke, nyɛ bua nɛ jɔ!

⁵ Nyɛ ná nɔ tsuaa nɔ he tsui. Nyɔmtsɛ ɔ su si ta.

⁶ Nyɛ ko hao ngɛ nɔ́ ko nɔ́ ko he; se mohu nɔ́ tsuaa nɔ́ mi ɔ, nyɛɛ kɛ sɔlemi, kɛ pɛɛ kpami, kɛ sina nɛ wo nyɛ hiami ní ɔmɛ a ta ha Mawu.

⁷ Nɛ Mawu he jɔmi nɛ pã adesa juɛmi tsuo ɔ maa bu nyɛ tsui, kɛ nyɛ juɛmi he ngɛ Kristo Yesu mi.

⁸ Nyagbe ɔ, ye nyɛmimɛ, nihi nɛ ji anɔkuale, nihi nɛ sa bu, níhi nɛ da, níhi nɛ he tsɔ, níhi nɛ ngɛ fɛu, níhi nɛ woɔ nɔ hɛ mi nyami, ke je mi bami kpakpa ko ngɛ, ke yi jemi ko hu ngɛ ɔ, enɛ ɔmɛ a he nyɛ susu.

⁹ Nihi nɛ nyɛ kase kɛ je ye nya, kɛ níhi nɛ nyɛ nu, nɛ nyɛ na ngɛ ye he ɔ, lɔ ɔmɛ nyɛɛ pee; nɛ he jɔmi Mawu ɔ kɛ nyɛ maa hi si.

Nike ní he sina

¹⁰ I na bua jɔmi babauu ngɛ Nyɔmtsɛ ɔ mi kaa be saii ji nɛ ɔ nɛ i nui nyɛ he ɔ, jehanɛ lɛɛ nyɛ na he blɔ kɛ ngɛ nyɛ suɔmi kpo jee kɛ tsɔɔ mi ekohu. I tsɔɔ we kaa nyɛ susuu we ye he hu, se he blɔ nɛ nyɛ ya na we kɛ pee nɔ́ ko ha mi.

¹¹ Pi kaa nyɛ hyɛ we ye nɔ he je nɛ i ngɛ enɛ ɔ dee, ejakaa imi lɛɛ nɔ́ tsuaa nɔ́ nɛ ye nine su nɔ kɛkɛ ye bua jɔ he; ja ji bɔ nɛ i kase, nɛ i le.

¹² I le ohia mi si himi, nɛ i le ní kpɔtɔɔ mi si himi hulɔ. Nɔ́ nɛ i kase ji be tsuaa be ɔ, ye bua nɛ jɔ nɔ́ he; i tɔ jio, hwɔ ngɛ mi yee jio, ye bua nɛ jɔ; kpɔtɔɔ be mi jio, hiami mi jio, ye bua nɛ jɔ.

¹³ Kristo lɛ woɔ mi he wami, nɛ e haa nɛ i nyɛɔ peeɔ nɔ́ tsuaa nɔ́.

¹⁴ Se kɛ̃ ɔ, nyɛ pee saminya kaa nyɛ ba ye bua mi ngɛ ye nɔ́ nami be ɔ mi.

¹⁵ Nyɛ Filipi bi, nyɛ nitsɛmɛ nyɛ le kaa sisije ɔ, benɛ a bɔni sane kpakpa fiɛmi, nɛ i pue nɔ kɛ je Makedonia a, asafo ko asafo ko kɛ mi bɔɛ huɛ ngɛ nɔ́ hami kɛ hemi mi, ja nyɛ pɛ ji asafo nɛ ye bua mi.

¹⁶ Benɛ i ngɛ Tesalonika a po, pi si kake kɛkɛ nɛ nyɛ mane mi ní.

¹⁷ Pi kaa nike ní nɛ i ngɛ hlae doo, se mohu kaa nyɛ maa gu lɔ ɔ peemi nɔ kɛ na biɛ kaa kpakpa peeli.

¹⁸ Níhi tsuo nɛ nyɛ mane ɔ ba su mi; a hiɛ kulaa pe bɔ nɛ i susu! Epafrodito ngɔ nyɛ manemi ɔmɛ tsuo kɛ ba, nɛ nɔ́ ko nɔ́ ko hia we mi hu. Nike ní nɛ ɔmɛ ngɛ kaa bɔ ko nɛ a sã ha Mawu. Bɔ kaa kikɛ nɛ ɔ jeɔ via liliili; e saa Mawu hɛ mi, nɛ e naa he bua jɔmi.

¹⁹ Ye Mawu ɔ ma ha nyɛ níhi tsuo nɛ hia nyɛ ɔ kɛ maa je e ní babauu nɛ hɛ mi ngɛ nyami ɔ mi kɛ gu Kristo Yesu nɔ.

²⁰ A je wa Tsɛ Mawu ɔ yi kɛ ya neneene kɛ neneene. Amen.

Nyagbe sɛ yemi

²¹ I biɔ ni klɔuklɔu ɔmɛ tsuo nɛ ngɔ a he kɛ ha Kristo Yesu ɔ. Nyɛmimɛ ɔmɛ nɛ a kɛ mi ngɛ hiɛ ɔ ke a biɔ nyɛ.

²² Ni klɔuklɔu ɔmɛ tsuo nɛ a ngɛ hiɛ ɔ ke a biɔ nyɛ, titli ɔ, Kaisare ɔ we ɔ mi bi ɔmɛ.

²³ Wa Nyɔmtsɛ Yesu Kristo dloomi ɔ kɛ nyɛ tsuo nɛ hi si.